اوعى اوعى اوعى تاخد مليم من اهلها
مش عايز اكرر كلام الاعضاء بس لو معاك تمن الحاجه اعملها معكش متعملش سيبك من حوار زى ابنهم و الفيلم ده مفيش كلام من ده ساعه الزعل هتبان الحقيقه
دى الخلاصه و دمتم للنضال على راى اخونا صدام
عرض للطباعة
اوعى اوعى اوعى تاخد مليم من اهلها
مش عايز اكرر كلام الاعضاء بس لو معاك تمن الحاجه اعملها معكش متعملش سيبك من حوار زى ابنهم و الفيلم ده مفيش كلام من ده ساعه الزعل هتبان الحقيقه
دى الخلاصه و دمتم للنضال على راى اخونا صدام
اسمع كلام والدك هو عنده خبرة أكتر في الحياة وبلاش تحرجة وتحرج نفسك مهما كلن درجة الحب عند الزعل بتبان حاجات تانية
السلام عليكم ورحمة الله وبركاته ...
انا مش هاقول غير كلمتين ((((طاعة الوالدين)))) ...
انا عايز اقولك ان سبت حاجات كتييير عروسة او وظيفة علشان الحاج او الحاجة مش مستريحين وكنت ببقى متضايق وانا سايب بس احتراما ليهم مقدرش اقول لأه والحمد لله فى الاخر بيطلع رأيهم صح ...
السلف تلف والرد خساره
ورحم الله امرئ عرف قدر نفسه
انت بسم الله ماشاء الله فاضلك القليل عديت الخطوات الصعبه يبقى اسمع كلام الوالد أحسن
وبشكل عام زى ماالاناس قالت مع اول مشكله حتى لو رديتهم ممكن ممكن يقوللك فاكر لما ساعدناك
واالله اعلم بنفوس الناس وهما عاوزين يفرحوا ببنتهم
عشان مطولش عليك جاااامل ولاتتجاملش والوالد كلامه صح بالنسبالى
هو نقطة تانيه بعيد عن الكلام اللى اتقال
لم نفسك وامشى على ادك وبعد الجواز هتجيب اللى انت عايزه وتملى شقك
لكن متحاولش تضيع كل اللى معاك وترهق ابوك وتستلف من الناس وكل دا هيتعبك بعد الجواز
عروستك اللى انت خاطبها وفرحان بيها (ربنا يفرحك بها طول عمرك) وعايز تجبلها اللى هي عاايزاه بس مع كل تجارب البشريه فى جميع انحاء العالم شويه وهتكون علاقتها بيك زي علاقتك باسرتك ومش هتكون اقوي غالبا
امشي على ادك و متضغطش نفسك وواحده واحده واهم حاجه فى الجواز العقل
الافضل لك متاخدش
العلاقات مبتفضلش حلوة علطول وحيجى يوم وحتتخانمقوا (اى بيت بعيد عن الاحلام بتحصل فيه خناقة كبيرة) ومهما كانت الاخلاق كويسة ممكن تلاقى كلمة ملهاش لازمة
على فكرة بصرف النظر عن الزعل والكلام اللى بيقلهولك دلوقتى انك مش راضى تاخد الفلوس.... بس من جواهم حيبقوا مبسوطين انك مش راضى تاخد فلوس منهم
لو الفلوس جاية جاية استلفهم من اى حد او من الوالد وردهملوا
بدون احراج و لا كسوف انا نفسي كنت سالف من حمايا 30 الف جنيه لاني كنت زيك جيت في الاخر و شطبت و الحمد لله سددتهم بس انا عملت كده بنائا عل حاجتين:
1-ثقتي في الناس ده الحمد لله ناس محترمين وانا من اول يوم زي زي ابنهم و دلوقتي انا معزتي اكتر من ابنهم والله
2- الناس دول عارفين من اول يوم شافوني فيه و على لسان والدي اني مجوز نفسي بنفسي محدش ادالي حاجه لله حتي اللي اخدته من اهلي دفعته و برضوا عارفين اني الحمد لله عندي وظيفتي و هيا لله الحمد حلوه فانا مش داخل طماع
الخلاصه لو اضطريت و واثق في نسايبك اتكل على الله
انا مش عارف اذا كنت اخدت الخطوه ديه ولا لأ
لكن نصيحه - أوعى تاخد فلوس من مراتك او اهلها
والنبى لو ردت الطاق عشره - اصبر وبلاش الخطوه ديه
صباح الفضايح - خد المثال ده
كنت محتاج مبلغ كان حوالى 37 الف واخدتهم من مراتى - مع اول مشكله اهلها اتكلموا على الفلوس ديه
رديت الفلوس - وبعدها كنت بوضب شقتى واخدت من مراتى 5 الف وبرضو حصلت مشكله اسمع الجمله ديه وكانت من اهل مراتى
هيه دايما واقفه معاك وكل الخير اللى انت فيه بسببها فااااااااااكر لما سلفتك المره اللى فاتت ساعة لما كنت بتعمل ....................... وحتى وانت بتوضب شقتك هيه واقفه معاك ومسلفاك 5000 جنيه - بس يا سيدى وبقالى 4 سنين اهو- كل لما يحصل اى موقف يتحكى عن الشهامه والمروءه والجدعنه اللى اتعملت معايا (مع التأكيد انى اتنيلت رديت الفلوس ديه)
واحد صاحبى ده بقى اللى كان لقطه
اتقدم لواحده مستواها المادى اعلى منه - المهم انه كان رايح يشترى شقه صغيره - حماته قالت له بص يا ابنى الموضوع ده هايبقى سر بينى وبينك وبين بنتى - بدل ما تشترى شقه صغيره نشترى شقه كبيره بالنص وتكتب بأسمك انت وبنتى من غير ما حد يعرف
المهم بعد رفض وجدال وانا راجل ولا يمكن وعلى جثتى والكلام الفاضى ده - الشاب الوسيم وافق - بس يا سيدى انا كل اللى فاكره لما اتخانقوا ان حماته كانت بتقول انه مش عارف داخل على طمع وعايز يضحك على البت علشان ياخد فلوسها ويربطها جنبه بحجة الشقه
والله العظيم انا عارف انها قلة اصل منى بس انا لما الست قالت كده انا كنت فعلا هاتدخل لغاية لما شوفت شكل صاحبى - كنت هاموت من الضحك - عارف الواد كان نازل عليه سهم الله ومتنح وخلاص فاضله تكه ويعيط - المصيبه ان الواد ابن ناس اوى ومحترم اوى اوى اوى - تحس انه فى مدرسه وواحد عمل مصيبه ولبسه فيها وهو مش عارف يعمل ايه
وبعد كل اللى انا كتبته ديه نصيحتى ليك - استلف من اهل مراتك - بس وحياة ابوك ابقى تعالى احكى لنا ايه اللى حصل - خلينا نضحك شويه (هو هابقى انا لواحدى ولا ايه)