مشكله بعد 100

**magdy12380** · 13-11-2013 01:33 AM

لو سمحت انا بشترى بروتون ويرا 2004
العربيه كويسه جدا ف اول 3 سرعات
لما العربيه بتوصل لسرعه 100 لمبه check بتقيييد والعربيه بتتخنق ده ممكن يكون ايه
وهل ممكن يكون ليه حل
واحد صحبى معاه بروتون قالى ده عيب حساس سرعه
سئلت عند ناس كتير محدش عنده وو التكييف بيخنق العربيه
برجاء الافاده

**mido_soliman** · 13-11-2013 01:41 AM

لازم تتحط على كمبيوتر فى التوكيل او مركز صيانه معتمد
غير كدة متشتريهاش وريح دماغك

**magdy12380** · 13-11-2013 01:42 AM

طيب يعنى حضرتك شايف ان العيب ده مش هيروووح منها
لانى بصراحه عاوز اركب حاجه بروتون وتكون نضيفه وف نفس الوقت يكون صاحبها مضمووون
برجاء افادتى

**Mamoud salah H** · 13-11-2013 04:46 AM

دة حساس شكمان يا باشا

**marieneer** · 13-11-2013 08:55 AM

نفس المشكله معايا فى الجين2 2007.لمبه الاعطال بتنور عند 130 وساعات عند 100 وغيرت حساسين الشكمان جداد.وغيرت البوجيهات وغيرت فلتر الهواء ونضفت البوابه وشيكت على كل الفيش والوصلات وغيرت زيت الفتيس بالكامل وكمان زيت الموتور بالمره والفلاتر ونضفت تنك البنزين بنفسى وغيرت فلترين بنزين ورا بعض وحطيت 95 كمان وجربت العربيه.لسه اللمبه بتنور عند 130 كل اللى فرق ان السحب بقى كويس جدا.بس أنا قررت ان أحل المشكله دى وكان اخر حاجه معملتهاش ان اسقط الشكمان وانضفه وهو ده اللى عملته.رفعت العربيه عند البيت وحليت علبه البيئه طلعت بتشخلل والفحم الكربونى اللى فيها كله مكسر حتت حتت.نضفتها وحليت علبه النص كمان فيها شخلله لحد ماوصلت لعلبه الديل وكانت مليانه برضه.نضفتهم كلهم وركبت الشكمان وجارى التجربه النهارده ان شاء الله.المهم على ما أعتقد نظرا لان الشكمان كان كله مكسر من جوه فعمل سدد وقلل خروج العادم ونظرا لان خروج العادم بيزيد عند 130 فكان ولابد ان لمبه الاعطال تنور لان فى باك بريشر فى ماسوره العادم .وعلى العموم انا هجرب النهارده وجارى حل الموضوع.

**marieneer** · 13-11-2013 09:00 AM

نسيت أقول حاجه كمان وأنا بنضف تنك البنزين كنت رافع مضخه الوقود بره فابالمره غيرت القلب بتاعها بواحد جديد لان القديم كان بيزن جامد وكان فى صوت ونه فى الطلمبه تسمعها وانت بره العربيه كمان.

**yousefsemsem** · 13-11-2013 11:04 AM

بص ياباشا ده حساس شكمان افصل فيشته وجرب لو مانورتش يبقي منه وتغيره لو نور تاني يبقي الموبينه ضعيفه وتغير بالمرة طرمبه بنزين

**eng.m7md.ali** · 13-11-2013 11:39 AM

المشاركة الأصلية كتبت بواسطة marieneer

نسيت أقول حاجه كمان وأنا بنضف تنك البنزين كنت رافع مضخه الوقود بره فابالمره غيرت القلب بتاعها بواحد جديد لان القديم كان بيزن جامد وكان فى صوت ونه فى الطلمبه تسمعها وانت بره العربيه كمان.

تسمحلي استفسر

حضرتك فكيت قلب الطلمبة ازاي لاني عملت قرد عشان تتفك ومعرفتش .. وحاجة كمان .. قلب الطلمبة بتاعت لانسر كريستالة هتمشي عندنا ولا اجيب بتاعت بروتون؟

**alaziz** · 13-11-2013 01:23 PM

متابع بعد التجربه !! بس انا كان عندى نفس المشكله فى الانوس و كان حساس الشكمان و اتحلت المشكله بعد التغيير . المهم نشوف بعد الصيانة الجامدة دى العيب كان فين !!
عبد العزيز صلاح

**marieneer** · 13-11-2013 01:41 PM

فعلا قلب الانسر بيركب على طلمبه الجين2 هتلاقيه بيتباع فى علبه لونها أزرق وأحمر والقلب جوه كيس بلاستيك ومتغلف وجواه شويه زيت بس فى مشكله صغيره مش هتعجبك.السحب والتجميع للعربيه مش هيرضيك لأن ببساطه قلب اللانسر حجمه أصغر من الأصلى بتاع البروتون ومختلف فى وزنه كمان وعن تجربه لأنى ركبت الاتنين وجربت وكانت النتيجه ان أنا فكيت قلب الانسر اللى كنت جايبه ب160جنيه وركبت قلب الجين2 الأصلى ب220 جنيه.بالنسبه للفك والتركيب مفيش أسهل منهم .هتفك الحلقه اللى مربوطه فوق المضخه بعد فك خرطوم السحب والطرد والفيشه طبعا.وعلشان عوامل الأمان شيل كابل البطاريه.بعد ماتفك الحلقه اللى ماسكه المضخه زقها فى اتجاه الشنطه لجوه هتدخل معاك. ارفع المضخه 2سم علشان تعرف تشيل الجوان وده لازم يتشااااااال قبل أي حاجه علشان يوسعلك الخلوص بتاع التنك.بعد رفع الجوان حاول توسطن ايدك فى نص التنك بالضبط ويكون معاك فى ايدك الثانيه مفك عاده طويل.دخل المفك جوه المضخه على الشفه المدوره هتلاقى 3 بنوز ماسكين المضخه فى بعض .انطر البنوز دى لبره وتكون ايدك التانيه ماسكه المضخه وبترفعها لفوق وانت بتنطر البنوز.هتلاقى المضخه طلع نصها أو اكتر بره التنك.كمل رفع وتكون ايدك عدله هتلاقى المضخه فى ايدك بره التنك.صفى البنزين اللى فيها وخدها بره العربيه.بنفس المفك العاده اللى معاك فك العوامه عن طريق نطر البنوز وحل الفيشه اللى على الموتور.هتلاقى المضخه نصين في ايدك.خليك ماسك النص اللى فيه الموتور بس.دوس على الموتور لتحت هيتفك وبعدين شيل الخرطوم الاسود.ركب القلب الجديد اللى انت هتجيبه.ركب الخرطوم واتأكد انه راااااااااااااااكب كويس وداخل شحط وياريت تربط أفيز للأمان.وبعد كده اعمل كل الخطوااااااااات السابقه بس بالعكس.حاول تركب العوامه كويس علشان تقرا معاك صح.
ملحوظه هاااااااااااامه جدا جدا.
فى فى جسم المضخه على الداير برووووووز. وفى فى فتحه التانك مجرى حرفu وكمان فى الجوان يراااااااااااعى تركيب البروز فى المجرى وكمان فى الجوااااان علشان التنك ميبظرش منك بنزين وانت بتفول العربيه
وشكرا