شوف حضرتك
انا معايا سيراتو 2011 خليجى كاملة بفتحة سقف من حوالى ثلاث سنوات
وبصراحة انا لا انصح بالسيراتو مع انها معايا للاسباب الاتية
العربية ككماليات كويسة جدا بس عفشتها أسوء ما تكون حاجة كدة بشعه طبعا العيب الاساسى فى طرقنا الجميلة بس هى طرقنا الموجودة وخلاص ولازم نأقلم نفسنا عليها
فالسيراتو كعفشة فى الطرق المصرية بصراحة لا تحتمل دة طبعا بالنسبالى عل الاقل وإن كان دة رأى أغلب ملاكها
قطع غيارها الاصلية زى تيل الفرامل والفوانيس الامامية والخلفية والمرايات غالية
يعنى قطعة الفانوس الخلفى الموجودة فى الرفرف فقط سعرها جديد اصلى 575 جنية واستيراد حوالى 400 جنية والديبو التيوانى 200 جنية تقريبا ولاحظ أن السعر دة لا يشمل قطعه الفانوس الخلفى الموجودة فى الشنطة
المراية جديدة اصلى كهرباء باشارة ليد ضم بتعمل حوالى 1350جنية جديدة واستيراد حوالى 800 او 900 جنية وتيوانى حوالى 250 جنية
اما الموديل الى قبل كدة ارخص يعنى المراية كهرباء باشارة عريضة اصلى بتعمل حوالى 500 جنية
التيل الاصلى حوالى450 جنية وفى طبعا الكورى بس طبعا بيبوظ الطنابير
فلتر الزيت اصلى بحوالى 25 جنية
البوجيهات الاصلية 180 جنية
فلتر هواء اصلى 90جنية
فلتر تكييف اصلى 160 جنية
وطبعا الاسعار دى غالبا زادت
إستهلاك البنزين عالى نوعا ما
فى رعشة خفيفة فى العربية لما تيجى ترفع الزجاج الكهرباء أو تنزلة وكنت فاكر انها عندى لوحدى لكن اتضح لى انها موجود عند الكثير من ملاكها والسبب ان البطارية الفابريكة ضعيفة 45 امبير ولما تغيرها ببطارية 55 امبير كل دة بيروح
العربية بتزيق من الكاوتشات بتاعة الابواب بعد فترة لكن لسة محصلتش عندى
طبعا الصاج ضعيف جداااا تقدر تقول كدة ورق لدرجة ان الرفرف لم اتخبط عندى السمكرى رجع جزء كبير منه بأيدة فقط بدون اى ألة
والدهان بردة ضعيف
المميزات
انتشارها وبالتالى سهولة البيع بس دة سبب بردة فى زيادة سرقتها
ووجود قطع الغيار جديد واستيراد وتجارى
كماليات عالية
ارتفاع عن الارض مناسب نوعا ما بس اذا العربية محملة فهتحك فى المطبات
واسعه من جوة والشنطة واسعه بردة
تكييف ممتاز
موتور قوى صوته مش عالى وتسارع كويس جدا
فتيس ستيبترونيك بيديك خيار المانيوال والاتوماتيك
ثبات كويس جدا لحد سرعه 160 تقريبا ولكن يجب الحذر فى السرعة من مطبات الهواء بسبب نوعية العفشة الخلفية
بصراحة اذا رجع بيا الزمن انا مكنتش هشترى السيراتو بعد ما سقتها وعرفتها
ويمكن اذا كانت طرق مصر افضل مكنتش ندمت انى اشتريتها
طبعا ان مش هبيع لان اسعار السيارات ارتفعت بشكل كبير جدا وكمان الفئة من السيارات الى انا ناوى عليها معنديش مقدرة مادية حاليا لشرائها
_من الاخر السيراتو كويسة بس الطرق عندنا مش كويسة علشان كدة متنفعش فى مصر
المفضلات