كنت عاوز أعرف من ملاك البيرسونا
أستهلاك البنزين كام بالظبط ؟؟؟
عرض للطباعة
كنت عاوز أعرف من ملاك البيرسونا
أستهلاك البنزين كام بالظبط ؟؟؟
حسب طريقة سواقتك، والطرق اللي بتسوق فيها.
كل ما رجلك خفت على دواسة البنزين، كل ما الاستهلاك قل.
الاستهلاك مثالي عند 80 كم/س، جيد عند 100 كم/س، ومعقول لحد 120 كم/س طبعًا في طرق مفتوحة. وبعد كده طالما عايز تدوس وتجري، لازم تدفع، استهلاك بنزين عالي، وده طبيعي!
فعلا يا جماعه البيرسونا اوفر قوى فى استهلاك الوقود مقارنه بسيارات اخرى فى نفس ظروف القياده يمكن علشان السمه الرياضيه الى بتميز الموتور الكامبرو ........... ولكن مثلا الاوكتافيا وموديل 2000 اتوماتيك مع اخويا استهلاكها بجد ومش مبالغه حوالى نص استهلاك البيرسونا ..... بجد فيه حاجه غلط فى استهلاك بروتون للوقود بشكل عام
أهم حاجة في استهلاك البنزين هي السواقة الهادية
يعني لما بحرق على الموتور بيديني اللى أنا عايزه فعلا لكن بيستهلك بنزين جامد وبيوصل لـ 180 - 190 في الصفيحة
لكن مع السواقة الهادية جوة المدينة بدون زحمة كتير بيقل ويوصل لـ 215 - 220 في الصفيحة ... لو في زحمة كتير شوية ممكن يوصل لـ 200 - 210 في الصفيحة ... لو التفويلة كلها خلصت في الزحمة بتعمل 180 - 190 برضه وساعات أكتر حسب مدة الزحمة والوقوف فيها (عموما الزحمة لا يمكن القياس عليها أبدا)
مع الطوالي بقى على سرعة ثابتة 120 ك / س بتعمل 270 - 300 في الصفيحة حسب سرعة الهواء واتجاهه وظروف الطريق ... وطبعا بتوصل 300 مرتاح لو السرعة ثابتة على أقل من 100 .. بس ما جربتهاش كتير
لو طوالي على سرعة ثابتة فوق الـ 160 ك/ س - عملت معايا 160 تقريبا في الصفيحة
السواقة الطبيعية عندى اللى هى شوية حرق وشوية حنيه :)
الاستهلاك بيبقى 200 كيلو لحد نص التانك بالتمام والكمال
بالنسبة للسفر التفويلة ممكن تعمل معاك 500 كيلو مستريح
سعة خزان الوقود 50 لتر.
واحد صاحبي عاوز يجيب سوزوكي سويفت الجديده
وأنا بقول له يجيب الجين 2 افضل مضمونه أكتر وماتور اقوي
بس هو قلقان من استهلاك البنزين ومن توكيل عز العرب
فهل فعلاً فرق استهلاك البنزين كبير بالشكل اللي فعلاً يقلق ويخللي الواحد يجيب السويفت ولا مش فارق كبير
وهل عز العرب اسوء من مودرن موتورز وكيل سوزوكي ؟؟؟؟
السويفت معايا بتعمل 280-300 ك/20 لتر وقود جوة البلد
البيرسونا معايا بتعمل 210-220 ك/20 لتر جوة البلد
السويفت أعتقد هاتعمل معايا حوالي 340-350 ك/20 لتر وقود في السفر ... أنا بقول تقريبا لأن لسة أول مرة اسافر بيها من كام يوم ولسة ماحسبتش بدقة كافية
البيرسونا بتعمل معايا 280-300 ك/20 لتر وقود في السفر
ده كدة متوسط استهلاك الاثنين
بالنسبة للتوكيل الجين والبيرسونا ليهم كذا مركز خدمة غير التوكيل بعكس السويفت مافيش غير وكيلها
لكن في المقابل عز العرب أسوأ بعدة مراحل من مودرن موتورز .. بالإضافة غن كل اللى في عز العرب تقريبا إلا من رحم ربي ماعندهمش ضمير أساسا
البيرسونا والجين موتور أقوى أريح في السفر عربية تحس بقوتها فعلا وأوسع من السويفت بدرجة ملحوظة وثبات أعلى ... وفئة تانية خالص حتى لو اقتربت في السعر من السويفت
السويفت عربية مريحة للمدينة في المقام الأول وممكن تسافر عادي مافيش أي مشاكل وهدفها توفير الوقود في المقام الأول وسهولة المناورة داخل المدينة باور ناعم جدا ومحور دوران قصير جدا بعكس البروتون باور تقيل شوية ومحور دوران عريض شوية
كاسيت البروتون أقوى وأحلى من السويفت بعدة مراحل
لو هو لوحده بدون أسرة أنصحه بالسويفت من غير كلام ... إلا لو بيحب يحس بقوة العربية يبقى الجين
لو معاه أسرة يبقى الأفضل له البيرسونا ... وبرضه السويفت مش هاتقول لأ ... لو الأسرة أربع أفراد فقط
الفيصل يروح يركب دي ودي ويشوف بنفسه النقط دي كلها
من خبرتى قبل كدة فى سوزوكى ( كان معايا سوزوكى التو ) , عربيات سوزوكى تستحق كل مليم يدفع فيها ...
فهى عربيات بها دقة وجودة تصنيع تقريبا مفيهاش مشاكل أو أعطال .. عربية اعتمادية بالدرجة الاولى وموفرة جدا فى البنزين بالنسبة لنفس الفئة فى العربيات الاخرى الغير يابانية ..
أما بروتون فهى عربيات قوية وثقيلة فى السرعات العالية لكن استهلاك بنزينها عالى جدا وقطع غيارها مش متوفرة فى محلات كتير وعانيت فيها من بعض عيوب الصناعة وطبعا توكيل حدث ولا حرج ( بصراحة مش عايز اتكلم عن التوكيل اكتر من كدة لحسن الواحد ضغطه يرتفع ... )
بص يا بشمهندس , صدقنى انا مش بذم فى حاجة لمجرد النقد وخلاص
تعرف ان سوزوكى اللى كانت معايا بعتها بعد أربع سنين بنفس البطارية الفابريكة .. لكن البطارية فى الساجا ودعت بعد اول خمس شهور بدون اهمال فيها .. المساعد الخلفى فى الساجا جاب زيت بعد اول 2000 كيلو متر فقط وهذا لم يحدث فى العربية سوزوكى مع انه نفس السواق ونفس طريقة المشى والبعد عن المطبات والتهور ... المراية عندى اتكسرت وروحت التوكيل قاللى احجز وعيش بقى مع نفسك وبعدها روحت لكل المحلات تقريبا ملقتش المراية الاصلية وجبت واحدة تقليد صدق او لا تصدق ( طلعت بتاعة دريكسيون يمين ) ... مرات كتير بيحصل رجرجة فى العربية وانا بسخنها والتوكيل لم يستطيع تصليحها وهذا لم يحدث فى السوزوكى ... استهلاك البنزين تقريبا 120 كيلو فى الصفيحة بدون تكييف فى وسط البلد وبالتكييف 90 كيلو بدون حرق او قرص على الموتور لانى حريص جدا فى الالتو كانت بتاخد 260 كيلو ....
فى النهاية انا بقول اللى حصل معايا بامانة بدون تحيز ...
شكراً للجميع
بس واضح ان صاحبي معجب اوي بالسويفت ومش مقتنع بغيرها
ربنا بقى يوفقه للاصلح