انا طول عمرى مش مقتنع بالتأمين وخصوصا بعد ما عرفت الاخطاء الشرعية للتأمين التجارى
فرحت جدا لما عرفت ان فى شركات تأمين تعاونى فتحت فى مصر ونويت انى لما اجيب عربية جديدة اروح أئمن
لما اشتريت الشارك قررت انى ائمن عليها فى بيت التأمين المصرى السعودى وبسبب انهم قالولى انى لازم اروح بالعربية >مش عارف ليه < قعدت مكسل وقبل الحادثة بايام قررت انى اروح لكن قدر الله غالب وطبعا بيعت العربية حادثة وخسرت اكتر من اربعين الف -قدر اله وما شاء فعل
قررت بعد كده تانى اءمن على اى عربية اشتريها وفعلا لما جبت الكروز اتصلت ببيت التأمين المصرى السعودى وعملت معاينة عند الشغل عندى وكان المبلغ المطلوب كبير جدا والنسبة عالية واشار على احد الزملاء هنا بشركة وثاق وفعلا لقيتها تأمين تكافلى بنفس الشروط تقريبا الا بعض الحاجات البسيطة وكانت نسبتهم اقل وفعلا تعاقدت معاها
بعد ايام بسيطة ابتلانى ربنا بواحد راكب بروتون خيش فيا من ورا وكسر الاكصدام وعوج الجسر وطبعا بدأت اجراءات التصليح
زيارة لمركز الخدمة علشان مقايسة
زيارة لشركة التأمين علشان معاينة وموافقة على المقايسة
زيارة لمركز الخدمة علشان نبتدى نصلح
زيارة لمركز الخدمة علشان اركب -أخ ده الاكصدام مش هوا
زيارة لمركز الخدمة علشان نركب الصح -اخ اللون مش مظبوط واقعد معانا 6 ساعات لحد مركبت الحاجه وطبعا فى عيوب ومحتاج اروح تانى وبصراحة مش فاضى -المهم خدت الفاتورة ودفعت 3206
زيارة لشركة التأمين علشان اسلم الفاتورة واعاين الخلع
تليفونات طوال 10 ايام
الشيك طلع انهارده الحمد لله بس مخصوم من الفاتورة الاتى :
1- 100 جنيه فتح ملف
2- 290 جنيه قيمة 10% لانى صلحت فى التوكيل مش تحت السلم -مع انى صلحت فى العوض جروب وبدهانات كابسى!!!!!
3- 126 جنيه 5% مستنق يعنى تمن قطع الغيار اللى اتفكت ولما اعترضت قالولى روح سلمها فى البراجيل يعنى علشان 126 جنيه اروح لحد البراجيل !!!!
ولما اعترضت وطلبت المنتج (الوسيط بينى وبينهم) قالى انه هيجيبلى 100 جنيه كاش واسلمه الحاجه -طبعا حاجه تنقط وانا مش عايز ال 100 جنيه دى وربنا يعوضنى خير
4- حوالى 35 جنيه ضرايب ومصاريف ادارية
يعنى بالبلدى الشيك طالع ب 2650 ومخصوم من الفاتورة 556 جنيه يعنى 17% من قيمتها
طب انا ليه مأمن على العربية ب 4650 جنيه ومن غير نسبة تحمل
علشان الاقى نفسى مصلح خبطة مليش ذنب فيها ودافع المبلغ ده
دا انا لو صلحتها كانت هتكلف 150 جنيه لحام الشرخ و250 دهان سكينز واشتريت دماغى من التليفونات والمشاوير وحرقة الدم تلات اسابيع (اسبوع اصلاح واسبوعين الشيك)
نفسى افهم ليه مفيش حاجه فيكى يا مصر بتمشى عدل ومن غير فهلوة علشان نبخس الناس حقهم
هل مطلوب منى انى ادفع لشركة بتكسب ضرايبها ومصاريفها
لأ وايه عاملين معايا واجب ومخصموش منى 5% استهلاك لانى موديل السنة رغم ان الحادثة حصلت والعربية عاملة 1500 كيلو ولسه باكياسها
يعنى ايه يخصموا منى مستنقذ امال هما فايدتهم ايه مش انهم يجيبولى بدل اللى باظ ولا بيجيبوه وعينهم فى 5% منه
بجد انا دمى محروق من الظهر ومش عارف ايه فى بلدنا بيمشى صح من غير حرقة دم