الموضوع: أرجو المساعدة من خبراء الهيونداى - ماتريكس 2006 ولا 2007

شوف يا سيدي
الماتريكس عربيه كويسه جداً كسياره عائليه (يعني مش شد وجري والكلام ده بس كعربيه لأسره فوق الممتازه) فأنا أنصحك بيها بشده
وأنا اليومين دول ناوي أشتري عربيه جديده وبمنتهى الأمانه لو كان في منها جديد بسعر يناسب أمكانياتي كنت جبت واحده تانيه كمان بدون تردد
بالنسبه للفرق بين موديل 2006 و 2007 هي تقريباً واحد مفيش أي أختلاف
الأتنين كانوا نفس الوبشنز تقريباً والاتنين كانوا كوري كوري مش تركي زي موديل 2008 وانت طالع
وعلى فكره لو لقيت موديل 2008 تركي تناسبك هاتها برضوا ومتقلقش منها هي تركي بس نضيفه جداً
كان فيه سنه 2005 تقريباً نزلوا منها عربيه كاتيجوري أعلى فيها حبه أوبشنز زياده إللي أنا فاكره منها أن كان فيها مساحات في الزجاج الخلفي ولمبه أستوب في الزجاج وفتحة سقف وسبويلر فوق باب الشنطه الخلفيه (ده اللي أنا فاكره)
بخصوص الجير بوكس هي مفيش فيها مشاكل عامه في الجير بوكس الاوتوماتيك والحمد لله يعني لاقدر الله لو في مشكله في الجير بوكس هتكون نتيجه سوء أستخدام أو أهمال في الصيانات لكن بالاستخدام الطبيعي الجير بوكس جيد وسلس في النقلات يعني مش هتحس بنتشه في النقله ولا حاجه

طبعاً أحب أقول لك على بعض مزايا العربيه

- مساحه كبيره
- أماكن تخزين متعدده
- أرتفاع عن الارض
- بالمقارنه بالسيدان بتبقى كاشف الطريق أفضل بكتير بسبب أرتفاعك
- قطع الغيار متوفره ومش غاليه
- الصيانه سهله وفي كل مكان هتلاقي اللي بيفهم فيها
- مطلوبه جداً في أعاده البيع
- أستهلاك بنزين طبيعي وغير مرتفع
- صاج العربيه ناشف مش خفيف زي موديلات هيونداي اللاحقه

وبالنسبه للعيوب من وجهة نظري

- العفشه ناشفه شويه (وده طبيعي في أي عربيه عاليه)
- سحبها بطيء في بدايه الطلعه لكن بعد كده بتبقى تمام
- الثبات معقول بشكل كبير بس طبعاً في عربيات تانيه أكثر ثباتاً منها زي الالنترا 2006 واللانسر البومه بس الموضوع ده مش هتحسه غير بعد الـ 130 -140 كم لكن أقل من كده هي تمام جداً
- الكراسي غير مريحه بعض الشيء وبالأخص في الكنبه الخلفيه (وده في الغالب هتلاقيه في أي عربيه عاليه مش بتبقى مريحه زي السيدان)
- الكاسيت والسنتر لوك والانذار الزباله اللي كان حاتطهم غبور في العربيه أنا غيرت السنتر لوك والأنذار ومستحمل الكاسيت بالعافيه (في الغالب هتلاقي اللي بيبيعلك العربيه مغيرهم أصلاً)

ملحوظه بخصوص المواصفات :
في ماتريكس خليجي وفي ماتريكس معاقين بتيجي من بورسعيد وبيتعملها أفراج جمركي بعد كده
دول بيبقى فيهم أوبشنز أعلى من المصري واللي بتيجي من بورسعيد مش بيبقى أسمها ماتريكس بيكون أسمها لافيتا

أتمنى أكون أفادتك على قد ما أقدر ومعلش الرد جه متأخر شويه بس أنا لسه شايف أستفسارك دلوقتي