تجربة شراء سيارة مستعملة 2
بعد تجربتى اﻷولى (تجربة شراء سيارة مستعملة)
و اللي كانت مع عربية بيكانتو..لكن محصلش نصيب بعد الكشف فالتوكيل
أنقل إليكم تجربتي الثانية مع عربية هيونداي i10 2011
البداية كانت عن طريق واحد معرفة دلني على معرض شغال فالعربيات
طبعا المعارض بتبقى أسعارها أغلى من السوق 2000 أو 3000 بس لو حد سمعته كويسة بتاخد العربية و أنت مطمن.
المهم مواصفات العربية كالتالي
هيونداي i10 موديل 2011
28000 كم
فابريقا دواخل و خوارج
مانيوال -سنتر-تكييف-esp
السعر 64000
رحت شفت العربية عند المعرض و اتبعت النصايح اللي قرأتها فالمنتدى هنا قبل كده
بجد فرقت معايا أوي و الناس ساعتها بتكلمك على أنك راجل فاهم مش مشتري على نياته
برضه في فيديوهات مفيدة جدا عن كيفية شراء عربية مستعملة على اليوتيوب
على ما أتذكر اللي عملها اسمه eric the car guy
بدأت أبص على صاج العربية و الفروقات بين الكبوت و الشنطة و اﻷبواب و جسم العربية
العربية بسم الله ما شاء الله كويسة
في حتة صغيرة بس عند تانك البنزين زي حكة و مش مرشوشة و لا حاجة
مشيت إيدي على الفريم بتاع الزجاج و على العتب من تحت و على خطوط العربية
كله تمام حتى اﻵن
:B4_611:
فتحت اﻷبواب و الشنطة والكبوت و قفلتهم
إتأكدت أن زجاج السيارة أصلي
بصيت على اﻹستبن
بصيت على الكاوتش اللي راكب
مشيت إيدي على السقف و بعدت عنه حوالي متر و خدت نظرة فالضي
بعدت عن العربية حوالي 2 متر و لاحظت وزنها على اﻷرض
شلت الفرش اللي فالشنطة و بصيت على الصاج تحتها
فتحت الكبوت و إتأكدت إن مبدئيا مفيش أي تسريب زيت أو مياه
طبعا عملت كل ده بعد مكنت دورت العربية عشان أسيبها تسخن و ألاحظ حرارتها
طلبت من العامل فالمعرض يدوس على اﻹكسرتير و أنا ورا العربية و لاحظت العادم اللي خارج
حطيت إيدي و كتمت الشكمان لثانية و إتأكدت إن العادم نضيف مفيهوش زيت و لا مسود
رحت جمب الموتور و لاحظت صوته ككان معقول بعد كده شميته فلقيت ريحة غريبة
فاﻷخر إكتشفت إن الريحة من ناحية عربية بيجو 508 موتور تربو....الجهل وحش
بكده خلصت التشيك الخارجي
و إن شاء الله التشيك الداخلي أنقله فالمشاركة القادمة
:Oc_sun1[1]:
يتبع
تجربة شراء سيارة مستعملة 2 (متابعة)
السلام عليكم و رحمة الله و بركاته
في حاجة نسيت أكتبها فالمشاركة اﻷولى و هى الضغط على أطراف العربية اﻷربعة للتأكد من حالة ا
المساعدين حتى جلد المساحات بصيت عليه
نبدأ فإجراءات التشيك الداخلي ركبت العربية بصيت على الباب و إرتفاعه عن اﻷرض بعد زيادة وزني فالعربية للتأكد من حالة المساعدين
خدت بصة على الصالون ككل...الصراحة بسم الله ما شاء الله بحالة المصنع
بصيت على السقف و نقط إلتقاء القوايم بالسقف
حالة التابلوه و الزراير و حالة الفرش
ولعت التكييف
بصيت على وزن العربية من كابينة القيادة
الصراحة نسيت أدور الدركسيون يمين و شمال و أنا واقف....بس كان المفروض أعمل كده
جربت اﻷنوار والمساحات و ملقتش مياه فرشاشات المساحات...طلبت من الراجل يزودها و شيكت عليها
شيكت على فتح تانك البنزين و الكبوت من الداخل
فتحت درج التابلوه و بصيت عليه
غيرت وضع المرايات و كرسي السائق و الراكب اﻷمامي
بعد كده طلبت من البائع قيادة العربية ...وافق و بعت معايا عامل
العربية كانت ناعمة نقلاتها سهلة فراملها ممتازة عداداتها شغالة..و استغربت أن ملهاش عداد rpm
لﻷسف رفض أني أفتح بالعربية و كان آخري التالت
وده كان عيب و ميزة في نفس الوقت
عيب ﻷني كنت عايز أشيك على العفشة و سحب العربية على السرعات
و ميزة ﻷن الراحل كان خايف على العربية فأكيد مسابش حد غيري برضه يدوس عليها
لفيت بالعربية حوالي 10 دقائق جربت أجيب آخر الدركسيون يمين و شمال و الحمد لله مكانش ليه أي تعليق
رجعت للبائع و اتفقت معاه على فحص العربية فالتوكيل
حاول يقنعني أني أجيب حد يبص عليها و خلاص أو أوديها أي ورشة نكشف عليها بحجة أنه هيبقى أرخص بس أنا رفضت
وكلمت التوكيل و حجزت فحص حالة و اتفقت مع البائع أقابله هناك
يتبع
:36_1_37[1]:
المروووووووووووووووووووور
مع آخر فصل في التجربة و أسوءها..............المرور
الصراحة والدي اللي راح مش أنا عشان كان ورايا شغل
و اللي حصل كالآتي
العربية مرور طوسون و إحنا مرور أبيس
والدي قال ينقل أحسن عشان يبقى جمبنا
لكن فوجئ أن اللوح الجديدة متتنقلش من مرور لمرور بدل في نفس المحافظة (معلرفش الكلام ده فأسكندرية بس و لا كل المحافظات)
قال خلاص أرخص سنتين كمان على السنة اللي فيها عشان مفضلش رايح جي و المرور أساسا بعيد عني
أبويا كان واخد معاه مندوب المعرض عشان هو يتعامل
و بالفعل إداله اللي فيه النصيب و سابه يعيش
ساعتين و الرخصة جت
الله أمال مالك زعلان ليه مالموضوع حلاوة أهو
زعلان عشان هناك الرشوة عيني عينك و مفيش حاجة بتخلص غير بالمعرفة أو الرشوة
الحال فمرور أبيس أحسن شوية في رشاوي و معارف اه بس مش عيني عينك
والدي قالي لو كان ينفع أجدد عشر سنين كنت جددت و إستريحت
و يمكن نعمل تمثيلية فقد لوحات عشان ننقل مرور أبيس....الله المستعان
دعواتكم بالبركة