تجربة شراء سيارة مستعملة 2

**abohend** · 19-11-2013 08:40 AM

بعد تجربتى اﻷولى (تجربة شراء سيارة مستعملة)
و اللي كانت مع عربية بيكانتو..لكن محصلش نصيب بعد الكشف فالتوكيل
أنقل إليكم تجربتي الثانية مع عربية هيونداي i10 2011
البداية كانت عن طريق واحد معرفة دلني على معرض شغال فالعربيات
طبعا المعارض بتبقى أسعارها أغلى من السوق 2000 أو 3000 بس لو حد سمعته كويسة بتاخد العربية و أنت مطمن.
المهم مواصفات العربية كالتالي
هيونداي i10 موديل 2011
28000 كم
فابريقا دواخل و خوارج
مانيوال -سنتر-تكييف-esp
السعر 64000

رحت شفت العربية عند المعرض و اتبعت النصايح اللي قرأتها فالمنتدى هنا قبل كده
بجد فرقت معايا أوي و الناس ساعتها بتكلمك على أنك راجل فاهم مش مشتري على نياته
برضه في فيديوهات مفيدة جدا عن كيفية شراء عربية مستعملة على اليوتيوب
على ما أتذكر اللي عملها اسمه eric the car guy
بدأت أبص على صاج العربية و الفروقات بين الكبوت و الشنطة و اﻷبواب و جسم العربية
العربية بسم الله ما شاء الله كويسة
في حتة صغيرة بس عند تانك البنزين زي حكة و مش مرشوشة و لا حاجة
مشيت إيدي على الفريم بتاع الزجاج و على العتب من تحت و على خطوط العربية
كله تمام حتى اﻵن

فتحت اﻷبواب و الشنطة والكبوت و قفلتهم
إتأكدت أن زجاج السيارة أصلي
بصيت على اﻹستبن
بصيت على الكاوتش اللي راكب
مشيت إيدي على السقف و بعدت عنه حوالي متر و خدت نظرة فالضي
بعدت عن العربية حوالي 2 متر و لاحظت وزنها على اﻷرض
شلت الفرش اللي فالشنطة و بصيت على الصاج تحتها
فتحت الكبوت و إتأكدت إن مبدئيا مفيش أي تسريب زيت أو مياه
طبعا عملت كل ده بعد مكنت دورت العربية عشان أسيبها تسخن و ألاحظ حرارتها
طلبت من العامل فالمعرض يدوس على اﻹكسرتير و أنا ورا العربية و لاحظت العادم اللي خارج
حطيت إيدي و كتمت الشكمان لثانية و إتأكدت إن العادم نضيف مفيهوش زيت و لا مسود
رحت جمب الموتور و لاحظت صوته ككان معقول بعد كده شميته فلقيت ريحة غريبة
فاﻷخر إكتشفت إن الريحة من ناحية عربية بيجو 508 موتور تربو....الجهل وحش
بكده خلصت التشيك الخارجي
و إن شاء الله التشيك الداخلي أنقله فالمشاركة القادمة

يتبع

**exelence** · 19-11-2013 09:43 AM

منتظرين التشيك الداخلى

**kar!m** · 19-11-2013 10:02 AM

متابع ...

**abohend** · 19-11-2013 11:46 AM

hema

أنا معاك أن كان ممكن أبص على زيرو بس العربية عشان أختي و هي عايزة هاتشباك و ده كان شرط أساسي فعملية البحث و اﻹختيار
عشان كده كان دايما الخيارات
i10 picanto punto spark

**abohend** · 19-11-2013 12:45 PM

السلام عليكم و رحمة الله و بركاته
في حاجة نسيت أكتبها فالمشاركة اﻷولى و هى الضغط على أطراف العربية اﻷربعة للتأكد من حالة ا
المساعدين حتى جلد المساحات بصيت عليه
نبدأ فإجراءات التشيك الداخلي ركبت العربية بصيت على الباب و إرتفاعه عن اﻷرض بعد زيادة وزني فالعربية للتأكد من حالة المساعدين
خدت بصة على الصالون ككل...الصراحة بسم الله ما شاء الله بحالة المصنع
بصيت على السقف و نقط إلتقاء القوايم بالسقف
حالة التابلوه و الزراير و حالة الفرش
ولعت التكييف
بصيت على وزن العربية من كابينة القيادة
الصراحة نسيت أدور الدركسيون يمين و شمال و أنا واقف....بس كان المفروض أعمل كده
جربت اﻷنوار والمساحات و ملقتش مياه فرشاشات المساحات...طلبت من الراجل يزودها و شيكت عليها
شيكت على فتح تانك البنزين و الكبوت من الداخل
فتحت درج التابلوه و بصيت عليه
غيرت وضع المرايات و كرسي السائق و الراكب اﻷمامي
بعد كده طلبت من البائع قيادة العربية ...وافق و بعت معايا عامل
العربية كانت ناعمة نقلاتها سهلة فراملها ممتازة عداداتها شغالة..و استغربت أن ملهاش عداد rpm
لﻷسف رفض أني أفتح بالعربية و كان آخري التالت
وده كان عيب و ميزة في نفس الوقت
عيب ﻷني كنت عايز أشيك على العفشة و سحب العربية على السرعات
و ميزة ﻷن الراحل كان خايف على العربية فأكيد مسابش حد غيري برضه يدوس عليها
لفيت بالعربية حوالي 10 دقائق جربت أجيب آخر الدركسيون يمين و شمال و الحمد لله مكانش ليه أي تعليق
رجعت للبائع و اتفقت معاه على فحص العربية فالتوكيل
حاول يقنعني أني أجيب حد يبص عليها و خلاص أو أوديها أي ورشة نكشف عليها بحجة أنه هيبقى أرخص بس أنا رفضت
وكلمت التوكيل و حجزت فحص حالة و اتفقت مع البائع أقابله هناك
يتبع

**abohend** · 20-11-2013 01:30 PM

قابلت مندوب المعرض عند توكيل غبور اللي فالنزهة جمب أنطونيادس و مصانع رجب
إستقبالهم مش بروفيشنل زي الشركة العالمية (توكيل كيا و رينو)
المندوب مش مستحمي أوي زي الشركة العالمية و العملية مش منظمة و دقيقة بنفس قدر توكيل كيا.
بس الفحص على الموتور و العفشة و الكهرباء و السمكرة و الدوكو كل ده ب193 جنيه
أنا شايف أنه رقم قليل قريب من أسعار الورش
توكيل كيا خد 330 من غير ميكشف على الموتور و لا السمكرة و الدوكو و قالي روح العامرية لو عايز تكشف عليهم
الموضوع خدله حوالي 4 ساعات كتير مقارنة بالكيا.,..الكشف كان في ساعتين
الحمد لله العربية تمام من كله لكن الصدمة كانت في تقرير حالة الدهان
العربية رشة جمب يمين و إكصدامين و كبوت
طبعا أنا جالي إحباط
بس الغريب ساعتها كان رد فعل المندوب بتاع المعرض
قعد يحلف بالله أن العربية فابريقا و مطلعتش من الجراج بقالها سنتين
طلبنا مقابلة مهندس الدهان و أكد المعلومة
ساعتها مندوب المعرض طلب فحص العربية مرة تانية
خدها المهندس و دخلنا معاه الورشة جوه و قعد يفرجنا على عيوب الدهان حتة حتة
الصراحة أمور فنية أوي و صعب مشتري عادي ياخد باله منها
بس طمني و قالي العربية مش مخبوطة لكن الواضح أنها إتحكت و إترشت و ده بنسبة 70% حصل فالمعرض و صاحبها بيشتريها زيرو فمتقلقش
ساعتها توكلت على الله و قلت بدل الحالة الفنية للسيارة كويسة أنا هاخدها و أحاول أنزل مع البائع بناءا على التقرير بتاع الدوكو
المهم رجعت المعرض و كل اللي عرفت أنزله 500 جنيه
خدها ب63500 بدل 64000
و إن شاء الله أنقل لكم إجراءات البيع و الشراء
بس ورونا الردود
تسقيفة يا ناس ميصحش

**exelence** · 20-11-2013 01:35 PM

شرح مفصل زى الفل الف مبروك عليك

**abohend** · 20-11-2013 06:38 PM

الظاهر الموضوع مش مفيد و مفيش أي ردود
بس عموما الأجر على الله.....نكمل
إتفقنا على يوم الإستلام و طريقة الدفع
يوجد 3 طرق مشهورة
1- دفع المبلغ كامل و تسجيل العربية
2- دفع معظم المبلغ و إستلام العربية و عمل عقد بيع إبتدائي و تأجيل الباقي لحين الإنتهاء من إجراءات التسجيل
3- دفع عربون و عدم إستلام العربية مع عمل عقد بيع إبتدائي و تأجيل إستلام العربية و إجراءات التسجيل بعد دفع باقي المبلغ

أنا بميل للإختيار الأول و الثاني لكن الثالث لازم حد تكون ضمنه لأنه لو طلع نصاب سيبقى الحال كما هو عليه و على المتضرر اللجوء للقضاء و يبقى معاكش غير عقد بيع إبتدائي...حتة ورقة ممكن يطعن فصحتها.

المهم إتفقنا على الإختيار الثاني و دفعت 60000 و إستلمت العربية و صورة الرخصة بتاعتها و العقد الإبتدائي و صورة رخصة البائع و المفتاح الأصلي
و بقى مع البائع المفتاح الإحتياطي و الرخصة

بعدها ب24 ساعة خلصنا إجراءات التسجيل و إستلمت بقية الأوراق (الرخصة-العقد المسجل-التوكيل الموجود بالعربية) و المفتاح الإحتياطي و إديتله بقية فلوسه
الصراحة فلوس التسجيل كان مبالغ فيها أوي
يعني عربية2011 و 1100cc يبقى رسومها1850 كتير يا عالم
المهم أنهيت إجراءات البيع و الشراء و جاري نقل الملكية بالمرور و سأنقل إليكم التجربة بعد إنتهائها بإذن المولى عز و جل
رغم إن مفيش ردود

**محمود السويدي** · 20-11-2013 08:44 PM

الف مبروك علي العربية وععقبال السبورتاج
مجهود جبار

**hugan** · 20-11-2013 08:58 PM

1000مبروك
الستجيل غالي لاءن العربيه استيراد مش تجميع محلي
التجميع المحلي رسومه اقل
بس انت كنت ممكن تنزل 1000او 1500 بسبب دهان الجنب والكابوت
بس زي الاخوه ماوضحوا
1850 رسوم تسجيل والعربيه فوق ال 60
كنت اشتريت فيرنا زيرو

الموضوع: تجربة شراء سيارة مستعملة 2

LinkBack

أدوات الموضوع

عرض

-

فكرة برضه -

الفحص بالتوكيل -

إجراءات البيع و الشراء -

-

المواضيع المتشابهه

تجربة شراء سيارة مستعملة

شراء سيارة مستعملة

طلب شراء سيارة مستعملة بالاسكندرية

إجراءات شراء سيارة مستعملة

الى كل من يريد شراء سيارة مستعملة !!!

الكلمات الدلالية لهذا الموضوع

المفضلات

المفضلات

ضوابط المشاركة