السياسة اكلت دماغنا وزادت نسبة الغم والكآبة والسواد في حياتنا
مبقاش لينا نفس حتي نفرح

كل شعوب العالم بتحتفل بفرقها وبيتمنوا اليوم اللي يترفع فيه علم بلادهم ويفرحوا ويحتفلوا

واحنا بنعتبر الفوز والاحتفال مؤامرة من النظام علشان يلهي الشعب "يالا سخرية القدر"

وبقينا بنستني تواريخ محددة لاحياء ذكري قتلي وشهداء باعمال عنف تؤدي لمزيد من القتلي والشهداء

ايامنا كلها بقيت انتظار لتاريخ احياء ذكري قتلي ودائماً في انتظار وترقب للجماعة الثوار لتجديد التظاهر واعمال العنف وماذا سيفعلون وندعي ربنا يستر ويعدي اليوم ده علي خير

والجيش والشرطة في حالة تأهب مستمر وبقي مهمتهم محاصرة الميادين وتفريق المتظاهرين علشان لو سبنالهم الفرصة هيتجمعوا باعداد كبيرة وهتبقي فوضي تاني ونعيد القصة من الأول

وبعدين نرجع نقول الشرطة مش شايفه شغلها ومش بتطارد المجرمين والبلطجية والحرامية وقطاع الطرق طيب هما هيطاردوا المجرمين ولا هيطاردوا الاخوان واعوانهم الثوار اللي كل يوم في مكان جديد

وانا من هذا المزنق اطالب بفتوي تحريم لكرة القدم لأنها تذهب العقول...والغاء كأس العالم لأنه رجسُ من عمل الشيطان وقتل جميع لعيبة الكرة لأنهم أبالسة وعلي رأسهم ابوتريكة لأنه زنديق يظهر بوجه ملاك

كما اطالب بالغاء الجيش والشرطة والحكومة ومش عايزين رئيس احنا نعيش كدة من غير ما حد يتحكم فينا ويقرفنا بس الجماعة الاخوان والثوار بتوعهم مش هيلاقوا حد يثوروا ضده ممكن بقي يثوروا علي حكومات الدول اللي حوالينا يعني يطلعوا علي اسرائيل من بتوع علي القدس رايحين شهداء بالملايين (اهم يبقوا عملوا حاجة مفيدة في حياتهم وثاروا ضد العدو بجد وميبقاش كلام وخلاص)
وشية يطلعوا علي امريكا الشيطان الأعظم (بس ياتري امريكا هترحب بيهم ماهما المفروض حبايب والمصلحة واحدة ولا هتعمل فيهم زي مابتعمل في اللي بيحب يتظاهر ضد الجيش والشرطة عندهم)
.........((((انا باين عليا قلبت الموضوع سياسة برده))))......مش بقولكم السياسة اكلت دماغنا