الحمدلله استلمت على خير بيجو 301
كنت حاجز فى فرع صلاح سالم يوم 27/8
استلمت يوم الاثنين 18/11 وروحت على خير الحمدلله

طبعا انا تقريرى دلوقتى يادوبك عن مشوار من القاهره لدمياط فقط يعنى حوالى 300 كم

العربيه رجعت بيها من القاهره بعد الاستلام و انا عارف ان الكاوتش فيه ضفط زياده (تكبير دماغ- مبحبش الزحمه ) لما رجعت ظبطه و كان على 40 و خليته 30
مبدئيا زيادة الضغط فى الكاوتش ده كان عاملى ونه فى دماغى طول الطريق (طبعا انتوا فاهمين ليه )
مشيت من فرع صلاح سالم و كانت الساعه قبل 2 الظهر ووصلت الساعه 6
طبعا الطريق كان زحمه فى القاهره لكن سالك اما بقا من اول ماوصلت بورسعيد بجوار المجرى الملاحى و الطريق بقا حاره واحده (تأمينا لان كنا ليلة يوم 19 ذكرى محمد محمود)
كل ده كلام
نبدأ الجد بقا من اول مامشيت من الفرع
بدأت اتحرك لاقيت صوت الحزام بيرن موسيقى و فضل يرن لما صدعنى اضطريت اربطه
طبعا طول الطريق وانا بحاول انى معديش 3 ع ال RBM لكن طبعا هي بتسرح مع نفسها
كذا مره جبت ال 120 كم
لكن كنت برجع دايما لل rbm بتاعى ال هو 3

العربيه الحمدلله تسارعها حلو جدا
استهلاكها فى البنزين لحد دلوقتى كويس اوى
اتعودت عليها بسرعه شكلها عشريه
الكرسى مريح الى حد ما انا جربته وهو عالى ع الاخر و بعدين وطيته ع الاخر و لسا برضو مش عارف انهو وضع الاريح كل حد و راحته بقا
نرجع لموضوعنا كنت ماشى من التوكيل وهي فيها بنزين من بتاع اوروبا كان 5 شرط من 8
يعنى تقريبا 31 لتر
مشيت طول الطريق و فولت لما رجعت دمياط اخدت 43 لتر لحد الزور و كانت عامله تقريبا 280 كم او اكتر بحاجه بسيطه مش فاكر اوى

ملاحظاتى بقا :-
1-العربيه شنطتها ماشاء الله واسعه بشكل مدهش صاحب التصميم ده تسلم ايده
2- تبقا قاعد ع الكرسى مش شايف غير التبلوه و الاسفلت بس انا مش فارقه معايا و حفظت ابعاد العربيه بسهوله
3- مجربتش الكنبه الخلفيه لكن هي واسعه ماشاء الله
4- العربيه دى ينقصها وحدة رفع و تبقا تحفه تاريخيه
5-عصاية الفتيس بحس انها ضعيفه شويه مش عارف دى صح ولا خزعبلات
6- الفتيس سلس جدا ماشاء الله و حركته حلوه و ظريفه -->سريع و سهل
7- ماشاء الله تسارعها جميل و لكن انا معدتش 120 لكن ال rbm 3 = حوالى 110كم
*استهلاك الوقود حوالى 220 كم فى الصفيحه و ده شيئ مطمئن نفسيا
*زمايلنا الملاك كان بيقولوا فى تاخير فى استجابة الفتيس او نتشه مابين اول و تانى و انا رأيى الشخصى انها مسألة تعود و عادى يعنى سايسها انت
لكن موضوع التاخير ده حقيقى حسيت بيها بتتاخر و تجيب تسارع عالى يعنى كذا مره عملت كده
تحس انها بتقولك ونبى ياشيخ تصبر عليا و هطلعلك اداء يبهرك من غير حرق زياده بس انت تصبر
ليه بقول كده لان لما اتاخرت معايا نقلت على rbm تحت ال 3 و ع 60 كم/س و دى كانت النقله التانيه
8- لما ظبطت ضغط الكاوتش على 30 حسيت بفرق كبير اوى مع انى مكنتش مضايق الاول بس كنت عارف ان العفشه مش مرتاحه كده
9- بالنسبه للعفشه حلوه اوى لكن كثبات و كده مقدرش اقول رأيى لكن لحد دلوقتى تمام
....و بالمناسبه انا جربت التكييف وانا حارج من القاهره عجبنى جدا وكان الجو حر
و بعدين قلبت برد و شتاء طول الطريق يعنى تقريبا من العاشر لحد دمياط

انا عارف انى اتكلمت كتير و هيبقا تقرير ممل استحملونى بقا

و ادعولى ربنا يباركلى و يحفظنا من العين