عرض للطباعة
السلام عليكم ،
انا معايا عربية جديدة نيسان جوك و العربية من الفوطة الزفرة بقا يبان عليها الخرابيش الصغيرة . فيه حد ابن حلال اقترح اعملها بوليش او واكس .
انا محتاج اعرف الفرق بين الاتنين و لو عايز اعملها عند حد نضيف ف مدينة نصر او مصر الجديدة يبقا فين و التكلفة كام.
الغرض اني ارجع صاج العربية زيرو تاني.
وشكرا ..
متابع
متابع
الواكس او الشمع بيعمل طبقه تحمي دهان العربيه وتديها لمعه لفترة معينه بعض الانواع تصل ل 6 شهور
ودا افضل وأأمن حاجه تقدر تحافظ بيها على دهان العربي
.. لا تسخدم بعده الفوطه الزفرة وغسيل العربيه يكون بشامبو
..
البوليش دا بيكحت من طبقة ال clear coat بتاعة دهان العربيه
وبالتالي بيشيل الدواير والخرابيش السطحيه و طبعا عيبه بيضعف الدهان وكل الخرابيش دي مع الوقت هترجع تاني
Speed , شكرا علي التوضيح , لكن لما اعمل الواكس ومستعملش الفوطة الزفرة وكل الي استعمله الشامبو افتكر الحل مش عملي , لأني لما بسيب العربية يومين مركبهاش بيكون شكلها كأنها مسروقة من كمية التراب الي عليها خصوصا اني مبركنهاش ف جراج . ف بضطر اني استعمل الفوطة الزفرة او الفرشة الطويلة الي ايديها المونيوم.
اضافة علي السؤال الاول .
هل استخدام الفرشة الطويلة دي بيأدي لنفس لمشكلة الدواير الي بتعملها الفوطة الزفرة ؟
لو عملت الواكس واستعملت معاه الفرشة او الفوطة هل هيأثر بشكل سلبي علي البوية ولا هيقلل فترة لمعة الواكس وتبقا اقل من 6 شهور ؟
طبقة ال clear colet , هل يمكن اضافتها في وقت لاحق علي البوية بتاعت العربية ؟ كأني برشها مثلا لكن مبرشش لون , برش او بدهن فقط الطبقة المفقودة ف حالة تكرار عمل البولش .
وشكرا :)
وانا كمان عندي سؤال بالمرة .. انا عملت الواكس للعربية وبعدين بعد اسبوعين كده قلت اغسلها .. غسلتها فى البيت عندي وبالصابون بتاع البيت .. بعد كام غسلة كده حسيت ان الواكس مبقاش موجود (انا عاملة من شهر ونص شهرين .. والعربية كنت بغسلها كل اسبوع)
وهل في نوع شامبو او صابون معين استخدمه في الغسيل؟
اشتري صابون مخصص لغسيل السيارة مبدئيا
الصابون العادي حامي جدا على السيارة
الفوطة الزفرة حرام بتطفي العربية تماما وبتقضي على طبقة اللمعة تدريجيا
مفيش حل للفوطة الزفرة الا بالبوليش ولازم تروح لحد كويس مش لبتوع البوية لانو بيستخدم جاز مع البوليش
بعد ما تعمل بوليش لازم العربية تاخد طبقة واكس باستمرار على الاقل مرة كل شهرين او 3 حسب معدل خروجك بالسيارة وتعرضها للشمس والاتربة
طبقة ال clear coat لو اتعمل بوليش على خطوات بيعيد بنائها يس طبعا مش زي الفبريكة
اي سيارة في مصر بعد سنة او سنتين على الاكثر بتحتاج بوليش
ملخص للموضوع علشان الناس متتعبش:
1) الصح انك بعد ما تغسل العربية بشامبو للعربية محترم ( مثلا زى ارمور أل) ... تنشفها كويس و تستخدم واكس التلميع أرمور أل أو سوناكس و بيتعمل بفوطة سوناكس الميكرو فايبر . و الحكاية دى بتتعمل على كل غسلة يعنى فى حدود كل شهر الى شهر و نص . و بعد ما تعمله بيديك طبقة حماية للعربية و مبيخليش التراب يلزق على العربية مجرد تمسحه بالفوطة الميكرو فايبر بيتشال فى ثانية و يبان لمعان العربية .. و اياك تستخدم الفوطة الزفرة أو الفرشاة نهائيا .. ببساطة همة دول اللى بيعملوا الخرابيش فالدهان. لا تلمع العربية الا بالفوطة الميكرو فايبر اللى من سوناكس ( بتعملها فى حدود 40 جنيه فى اسبينيز و بتتغسل عادى و لا بتتأثر و هتعيش معاك سنين)
2) اللى مفروض يتعمل كل سنة أو كل سنتين : التلميع بالواكس و البوليش اللى بيكون بالصاروخ و ده يفضل يا اما بالتوكيل أو بمركز كار كير محترم ( و ده بالنسبة للعربيات اللى بتتركن بالشارع و مبتتغطاش و اللى بتتعرض للشمس يفضل يتعمل كل 6 شهور) انما اللى بيركن بجراج و بيغطيها ده ممكن الواكس بالصاروخ يتعمل من 4 الى 6 سنين و ده عن تجربة شخصية و فعلا العربية بتكون محافظة على لمعانها الفبريكة.
3) افضل شئ انك تعمل واكس عربيتك اللى بالفوطة بنفسك : لأنك هتعمله احسن من أى حد بره . و العربية تاخدلها بالغسيل و الواكس بتاع ساعة الى ساعة و نصف. الطريقة:
بعد الغسيل , هتجيب الفوطة السوناكس و تحط عليها كمية قليلة من الواكس اللى بيكون سائل ( كمية صغيرة جدا ) الكمية المستخدمة بتكون لكل جزء من العربية ( باب , رفرف , سقف , شنطة ,......) و بعد ما تحطه على الفوطة تنزل على الجزء المراد تلميعة و تتحرك بحركة دائرية ( هيديك بعدها شكل كأن العربية متلحوسة) ........... بعد ما تخلص العربية كلها تجيب حتة تكون نظيفة بالفوطة السوناكس و تمسح العربية تانى من غير ما تحط واكس على الفوطة كأنك بتمسح التراب و تشيل شكل اللحوسة .. و اتفرج على العربية بعدها.
اشكرك بجد على التوضيح المفصل للموضوع ومعلش استحمل الاسئلة بتاعتي بقه:اقتباس:
المشاركة الأصلية كتبت بواسطة eslamsubaru
1- ايه الفوطة الزفرة دي؟؟ سمعت عنها قبل كده لكن معرفهاش
2- انا كنت بعد ما اغسل العربية بنشفها بمساحة الزجاج (زي مساحة الحمام كده بس بتاعت الازاز) وبعدها بنشف العربية تماما بفوطة (هي فوطة حمام بتاعت وش لكن انا جبتها مخصوص للعربية) فهل دي تنفع؟
3- ايه احسن انواع الشامبو واحسن انواع الواكس؟
4- الاسعار واجيبهم منين؟؟
وشكرا :) :b4_611:
شكرا لردك , و مفيش تعب و لا حاجة احنا اخواتاقتباس:
المشاركة الأصلية كتبت بواسطة الجنرال
1) الفوطة الزفرة دى عبارة عن الفوطة البرتقالى اللى بتشوفها فالبنزينات و بتكون استخدمت كتير و بيكون عليها شوية شحم أو زيت علشان تخلى التراب يلزق فيها لما تيجى تنضف العربية ... مشكلتها : طبقة من الزيت أو الشحم هتغطيلك العربية : اضرارها : بتطفى لون العربية خصوصا بعد تعرضها للشمس مع الوقت طبعا... و كمان الطبقة الزيتية دى بتخلى التراب الجديد يلزق اكتر على العربية فلما تيجى تمسحة المرة اللى بعدها بتضر تضغط شوية على الفوطة و ده بيسبب الخرابيش.
2) بلاش مساحة الزجاج لجسم العربية . لأن مع التكرار طبقة الشمع الأصلى بتاع العربية هتطلع من كتر الاحتكاك بالجلد. أفضل فوطة لتنشيف العربية ( فوطة قطن صافى) ( بدون حرج فانلة قطن قديمة).. أو الفوطة الميكرو فايبر.
3) الشامبوهات للعربية كتير ( من افضلها : ارمور أل , سوناكس و فيه انواع كتير هتلاقيها كلها شغالة تمام)
4) الفوطة السوناكس : 40 ج
زجاجة ارمور أل واكس : 42 ج و بتقعد كتييييييييييييييييييييييي ير
الشامبو : من 20 الى 50 ج
الله علي الكلام الجميل , المفروض ده يتضاف لكتالوج العربية :d
تسلم يا اسلام علي الشرح الوافي ده , وخليني اختصره مرة تانية هنا ومعاه كام سؤال :
1) نغسل العربية غسلة نضيفة بإستخدام شامبو ارمور اول .
2) بعد الغسلة ننشفها كويس ونستخدم واكس ارمور او او سوناكس بإستخدام فوطة سنواكس
3) نمسح الواكس بفوطة سوناكس ودي المرحلة الاخير.
السؤال هنا , انا بغسل العربية اصلا ف المغسلة مرة ف الاسبوع او مرتين ف الاسبوع من كتر ما هي بتتبهدل ف الشارع عشان احس بنضافتها ,وبتتغسل ف المغسلة بالفوم , هل لما اغسلها ف المغسلة اخلي الراجل يستعمل الفوم بردو وبعد مايمسحها اخليه يستعمل الشامبو , ولا اصلا مرحلة الفوم دي تتلغي وابدلها بالشامبو الارمور اول ؟
بالنسبة للشمع الي بالصاروخ , لو ممكن تشرح هو عبارة عن ايه , عشان انا سئلت محل كار كير قبل كدا قالي انا ممكن اعملك الواكس " الشمع " ب حوالي 90 جنيه , ووراني علبة الشمع , بس انا معرفش حقيقة هل الشمع الي بيتكلم فيه ده الي هو نفس الي انت بتتكلم فيه الي ممكن انا اعمله بعد غسلة العربية . ولا الصاروخ الي مفروض مبيتعملش الا فالكار كير.
مكرر ....
نصيحة متغسلش العربية كتير فالبنزينة : خليها مرة فالشهر : علشان المسدس بتاع الضغط الناس بتستخدمه غلط و بيقربه من العربية جدا و ده غلط على الدهان ممكن يجرحه.. خليها مرة بالشهر صيفا و مرتين بالشتاء..اقتباس:
المشاركة الأصلية كتبت بواسطة k50_
لما تعمل موضوع الشمع ده مش هتحتاج تغسل العربية كتير , مجرد تمسحها بالفوطة هترجع تلمع تانى.
الفوم المستخدم المفروض يغنى عن الشامبو ( لأنه فالأصل شامبو و بيتحول لفوم فالجهاز المستخدم) المهم يكون فوم للعربيات اصلا : ابقى بص على الكيس قبل ما يفرغه فالجهاز ده حقك و شوف مكتوب عليه للعربية و لا لأ.
الواكس اللى بيكلمك عليه الكار كير ده هو اللى احنا بنقول عليه ... و ده بيتعمل ب 40 جنيه المفروض مش 90 و ممكن يعملهولك بالصاروخ اللى عليه غطاء زى الفوطة كده (بيدى توزيع سريع للواكس)... التانى بتاع الضاروخ ده اللى بنتكلم عليه بيكون واكس و بوليش : و ده بيحتاج وقت اطول و حد فاهم كويس علشان بيستخدم البوليش و الواكس بالتناوب علشان يعملك طبقة واكس محترمة للعربية...
فيه نوع كمان بيتعمل : بيكون عبارة عن صنفرة الأول للعربية كلها بعدين واكس ثقيل ( اعادة بناء واكس العربية الأصلى) و ده بيشيل كل انواع الخرابيش و الاحتكاكات بالعربية و بترجع زيرو فعلا.. بس ده باخده بتاع 6 الى 8 ساعات شغل و مش اى حد يعمله ( بيكون فريق عمل مع بعضه)
ياسلام عليك يا اسلام باشا ,
موضوع متكامل عن الواكس مشاءلله :d
ممكن نختم ب كار كير محترم يعملنا الواكس ابو 40 جنيه ده ف مصر الجديدة او مدينة نصر ؟ وكذلك الواكس والبولش التقيل الي بياخد 8 ساعات ده تكلفته حوالي كام وانهي كار كير محترم بيعمله.
وجزاك الله خيرا علي المعلومات :)
انا اسف على التاخر في الرداقتباس:
المشاركة الأصلية كتبت بواسطة k50_
الشمع بيخليك ما تحتاجش تغسل العربيه غير كل فترة طويله
والعربيه تعملها بفوطه قطن او ميكرو فيبر هتلمع في ثانيه لان التراب ما بيمسكش فيه
الفوطه الزفرة هتشيله
وطبقة ال сlear coat
اكيد طبعا تنفع تترش بس انت عارف الرش في مصر عامل ازاي
تحياتي
اقتباس:
المشاركة الأصلية كتبت بواسطة k50_