الموضوع: صورتين لفرش جلد 301 و سلا اليزيه من جينز كار !!

أنا صاحب السيارة سيتروين سى اليزية وده فرش الجلد بتاعى .. وعرفت جينز كار من خلال المنتدى وقبل ما اروح دخلت على الموقع بتاعه وصفحة الفيس بوك وشوفت كرسى بيجو 301 وعجبنى جدا وروحت هناك علشان اعمل زيو بس على الطبيعة خامة القطعة اللى فى النص سيئة جدا واعترف بيها الراجل نفسه وصعبة التنظيف قدام غير انها مش فاكر قال ستان او قماش خليط بستان حاجة زى كده بس هى فى الصورة حمادة وعلى الطبيعة حمادة تانى خالص .. طبعا الكلام ده بقاله سنة بس فى بعض الملحوظات ممكن تفيدكم اهما بخصوص الأرضية أول ما رحت قالى مفيش عتب والأرضية مش هتنفع وبعدين خرج حد من عنده جوه وشاف العربية وقالى هظبطهالك فقلتله ازاى قالى هتشوف وقد كان أنا رحت التوكيل كتير وشوفت عربيات كتير عاملة أرضيات بس ما شاء الله الأرضية حتى هذه اللحظة مثالية شكلاً وتقفيلا وكل حاجة .. والفرش كمان ماشى جدا مع الصالون وخامات ممتازة .. بس طبعا السعر ساعتها قالى 2000 تقريبا وبعدين قالى 1800 كل حاجة .. بس أنا فاكر لما شوفت فرش 301 على الطبيعة وعجبنيش قلتله طب التفصيلة بتاعة الخطين اللى فى الجنب عاوز اعملهم عندى قالى اعملهملك بس مش هيكونو كويسين لان الكرسى الصلى بتاعك تقسيمته مختلفة وخليك على نفس تقسيمة الكرسى بتاعك وقد كان .. الخلاصة الجلد يستاهل اه يستاهل ومعمر ما شاء الله .. الوقت: يوم كامل من الصبح لغاية 12 بالليل .. التجربة مميزة جدا وشيك وتستاهل :)

أخر حاجة علشان الإفادة .. السعر ساعتها كانت البيجو أرخص يعنى كانت هتتعمل ب1500 جنية بينما الفرش بتاعى 1800 .. علشان فرق الخامات .. وبالمناسبة برضو الفرش كان أعلى حاجة عنده وأغلى حاجة .. يعنى لو حد بيفكر والسعر شايفه كتير هو عنده خامات كتير ساعتها قالى ممكن العربية كلها من 800 الى 2000 حسب الخامة ولما اخترت نزلى 200 وحاسبت على 1800