مش عيب تقول مش عارف

**Omar Tito** · 21-11-2013 12:15 PM

فى موضوع يا جماعة نفسى نتكلم فى مع بعض و هو ان النهاردة بيصعب على اى حد يقول ما اعرفش

انا لسة مشترى عربية تويوتا ياريس 2007 من حوالى اربع ايام أكيد كل واحد فينا بعد ما بيشترى عربية زمايلة بيكونوا اول ناس بتتفرج عليها

تبص تلاقى واحد يقولك ياريس يا نهار اسود ما لقيتش الإ الياريس
فى اية يا عم مالها يقولك الثبات صفر
واحد تانى ييجى يقولك العربية غير مؤمنة تماماً و الكبوت صغير جدا و أى لا قدر الله حادثة تبقى مشكلة كبيرة
و تبص تلاقى واحد تانى يقولك يانهار اسود ياريس كدة انت رميت فلوسك ف الشارع ادعى ربنا لما تيجى تبيع تجيبلك ربع اللى انت دفعتة فيها طبعاً

انت لو لسة ما إشترتش و تيجى تسمع أراء الناس دى هتبعد على طول و أكيد لو هتسمع ليهم و تديهم ودانك هتقول انا لبست خلاص كدة

دلوقتى بقى فى نوعيات من البشر و للاسف بقت أغلب البشر بيصعب علية مثلاً يقول مش عارف أهم شىء يتكلم و يحرق و يقول حتى لو عمرة ف حياتة ما ركب تويوتا أصلا بس هو لازم يتكلم
نفسى لما حد يتسأل على رأية و خصوصاً ف العربيات لو يعرف و عن تجربة يتكلم و لو مش عارف يقول مش عارف و الله ما عيب

الشعب المصرى لازم يخلى البايع فى نكد و الشارى فى نكدين

البايع لازم يتقالة يا نهار اسود دة تمن تبيع بية دى العربية تجيب اكتر من كدة بكتير و اضحك عليك

و المشترى لازم يتقالة تدفع المبلغ دة كلة عشان تجيب العربية دى دة انت لو كنت قولت لى كان فى ادامى bmw 2013 على سبعين ألف جنية و فبريكا و زيرو

عاوز اقول من الموضوع فى فئة معينة من البشر لازم تصدر لهم الطرشة طالما أنت مقتنع بالشىء 1000 فى ال 100

**amr011111** · 21-11-2013 12:20 PM

بص يا باشا
القصه ديه مكرره كتير
بص لما اشتريت عربيه ليا وبعد كده الميكانيكى يسألك جبتها بكام تقوله الرقم تلاقيه بينه وبين نفسه بيضحك ضحكه صفرا ان الواحد اتضحك عليه وان العربيه زياده عن سعرها بكيتر وان الواحد زبون
ويمصمص شفايفه على ان مفتح ونيور ( مش عارف اكتبها ازاى :)

ساعة الجد مش هتلاقى حد يجيبلك عربيه بالسعر اللى بيقولوا عليه وده عن تجربه

طالما اشتريت استمتع بالعربيه وسيبك من كلام الناس

وبعدين لو افترضنا ان عربيه مش ثابته لشخص ممكن متحسش بالموضوع ده
واحد بيسوق طرق سفر وواحد بيسوق طرق داخل البلد

فطنش تعش تنتعش

**محمد سماحة** · 21-11-2013 12:44 PM

احنا شعب مفتح بطبعه و نوًر :)) اعتقد ممكن تتكتب كده شدة ع الواو :)

**amr011111** · 21-11-2013 12:46 PM

المشاركة الأصلية كتبت بواسطة محمد سماحة

احنا شعب مفتح بطبعه و نوًر :)) اعتقد ممكن تتكتب كده شدة ع الواو :)

وكسره تحت النون

**محمد سماحة** · 21-11-2013 12:47 PM

المشاركة الأصلية كتبت بواسطة amr011111

وكسره تحت النون

**S O P H O S** · 21-11-2013 01:01 PM

يا باشا كل ده كلام
العربية نظيفة وبشتري صناعة واسم شركة
وحتي الماتور معروف هو ماتور ايه ومتجرب كام سنة فالعربية الي قبلها
وعمل اسم ونجاح قد ايه
هي قاعدة اركب العربية جرب احكم اذن = المعرفة
والله اعلم
تحياتي ..

**monamize4** · 21-11-2013 02:03 PM

اعتقد كلنا مرينا بالتجربة دى

**ahmed sa3ed** · 21-11-2013 02:41 PM

لسا من اسبوع بالظبط حصل الموقف دا مع ابويا

اقنعت ابويا انو يجيب بيجو 508 وعجبتوا وبيسال زميلوا عليها

الى قالوا بلاش بيجو فيها مشاكل فى الكومبيتر
والتانى قالوا هات فولكس جيتا بيجو ايه الى انتا عايز تجيبها

وطبعا كلهم فتى وهرى من غير اى معلومه وطلبت من ابويا انى اكلم الراجل الى قالوا فى مشاكل فى الكومبيتر واكتشفت انو مش عارف اى حاجة خالص وبيفتى وخلاص

الخلاصه اراء الناس مهمه بس فرق بالى بيتكلم صح وبين الى بيفتى

والعربيه معاك استمتع بيها وانتا الى فى ايدك تحببهم فيها كمان او تكرهم

ومبروك على العربيه