الموضوع: Lady Design -- دهانات من وحى الخيـــــال .

السلام عليكم ورحمة الله وبركاتة


بعيد عن الزيــــوت والتشحيم والسياسة اللى كرهت الناس فى بعضيهــــا * ربنا يهدينا ويصلح احوالنا جميعا * .

= دهانــــــات ليدى =




الموضوع هيكون تقرير عن دهانات شقتنـــا وخاصة دهانات ليدى من *جوتن* اللى هتكون لمسة فنية رائعة فى السنوات القادمـــــة ونقوول باى باى للاوراق الحائط !

-- نبدء على بركة الله --

من أول سنـــــــة 2013 والحاج عايز يوضب الشقة وأحنا نأجل كل مرة لغاية لما قامت فى دماغة وقضى الأمر .. طبعا أحنا بدأنا فى اواخر شهر 4 وكنا بنصارع الوقت علشان نخلص قبل دخول رمضان وفى نفس الوقت يكون الشغل تمـــــام .. بدأنا محارة الأسقف وبعد كدة كرانيش جبس (قعدنا فيهم شهر) و 13 يوم بالتمام والكمـــال (لدهانات) .. ودة انجـــــاز طبعا *الحمدلله* لأنكوا عارفين الصنيعية ماشين حسب الغزالة يوم أأة و 10 لأ !!


بالنسبـــة للمفاضلة والمفاصلة (فى اختيار افضل النقاشين) واهم حاجة الاسعار والوقت فأحنـــا جالنا كذا واحد منهم :

+ واحد جة قال الشقة هتاخد 6 وشوش معجون ! ومصنعية ايدى 5000 LE والخامات عليك .
- الوقت : شهــــر -

+ واحد تانى قال هتاخد 3 وشوش معجون ! ومصنعية ايدى 7600 LE والخامات عليك .
- الوقت : 15 يوم وممكن تقل -

+ الــ 3 والأخير قالك هية اخرها وشين معجون ! وشاكب راكب 14000 LE بالخامات علية .
- الوقت : 7 ايـــام -

طبعا أنا قوولت نخلص مع الاخيــر دة لأنة بيقول معاة 10 صنيعية وهيخلصونــــا بدرى بدرى والحاج قال أميـن بس أحنا اللى هنجيب الخامات طبعا النقاش مرداش وقالك سيستم وأنا ماشى علية *ماتقولشى الواد صاحب شركة جوتن* وبديهــــى أنة كان هيقلبنا فى الخامات والحاج زحقلة بطريقة محترمـــــة واختارنــــا الـــــ 2 لأنة كان محترم فى مواعيدة وكلامــة .


طبعا كاتبلنــــا كل الخامات اللى هوة محتاجـــة واللى هوة طلبة هوة اللى اشنغل بية لحاجة اتبقت ولا طلب زيـــادة *وأن دل فهوة بيدل أنة فاهم وعارف شغلة كوويس*

ملاحظـــــــاتى عن النقاش :

1 - أول مرة فى حياتى اشووف حد بيحترم شغلة ومواعيدة فى فئة *الصنايعية عمومــا* .

2 - الراجل بيسلم شغلة بلمبة قلاوظ 200 وات وحيطة حيطة علشان لو فيها حاجة متستلمش منة

3 - معاة التيم بتاعة كانوا 5 دة غير الاوفيس بوى بتاعهم علشان ميعطلهمش ومعاهم اكلهم وشربهم *علشان ميكلفش العميل* _اول مرة اشوفها الصراحة_

4 - طبعا معاة لاب الخاصة بية والكتالوجات وكرتلة الالوان .

5 - بياخد كورســـــــــات فى مركز جوتن .

^^ ماشاء الله ^^

وحبيت ااخد رأيكو فى الشغل :

Pearl Purple


Pearl Fushia


Zebra Style


اخر صورة من غرفتى الخاصــــة وجبتها من النت وراجل ادهـــا على اجمل وجـــة .

يأريت اعرف رأيكوا اى فى الدهانات ,,
والتصوير برعاية N8 & BUNSH

فى رعاية الله .