حادثة دهشور الزقازيق ولحظات من الرعب
النهاردة اثناء روتين العذاب اليومى فى رحلة الذهاب الى المنصورة الساعة 6:00 الصبح بالتحديد كنت قصاد مزلقان فى الزقازيق مش عارف اسمه:D حد بقى يقولى اسمه ( المزلقان دا فى وش بنزينة كالتكس فى اول طريق بنها-الزقازيق ولو دخلت المزلقان هاتطلع عالطريق اللى هايوديك لجامعة الزقازيق )
وضعّنا، كنا واقفين مستنيين مرور قطر حربى طويل ماشاء الله فوق الدقيقتين ودا رايح اتجاه بنها ولسة بنقول ياهادى وكله كبس عالمزلقان لاقينا الراجل مافتحش السلسلة لان فيه قطر تانى فى نفس الوقت جاى من بنها عكس الاولانى.. صبرنا شوية واول ما المزلقان فتح عينك ماتشوف الا النور
عقلية معملية فذة من اندر العقليات اللابشرية -اللا حيوانية حتى لا نظلم الحيوانات- الاربع حارات بتوعنا مسدودين من الميكروباصات اللى مشيوا مخالف فيهم بسبب "فقاقتهم" ..هما لسة هايقفوا فى الصفوف بتاعتهم زى باقى الناس العادية اللى مابتفكرش؟؟!! دول اذكى منى ومنك طبعا وبالتالى مشيوا مخالف
وبعد طول انتظار وزحمة الناس وقفنا وش لوش فوق شريطين القطر ييجى دقيقتين الطريق مابيتحركش وفجأة لاقيت سواقين الميكروباصات المخالفين بيلفوا بسرعة ويعدلوا وشهم ...قلت فى نفسى ضغط الناس الملتزمة جاب نتيجة مع الاشكال دى اخيرا
فجأة لاقيت دوران الميكروباصات المخالفة بقى بهيستيريا شديدة وبدأوا يطلعوا من المنطقة المرصوفة فى المزلقان ويحشروا نفسهم فى القضبان البارزة عشان يلفّوا وفى الاخر اللى يحشر نفسه فوق رصيف له مطلع ،، واللى يدخل وش لوش فى عربية قدامه من غير مايسيب فرق
قلت اكيد فيه ظابط حضر وهياخد نمرهم وطبعا الدتيا لسة ليل وبرد وقافل الشباك فمكنتش سامع جرس المزلقان وهو بيصرخ تحذيرا لوجود قطر تالت جاى
الوضع الحالى، نص عربيتى فى شريط القطر الاولانى والنص التانى فى الشريط التانى على شمالى عربية تريللا بمقطورتين ودى واخدة الشريطين مرتاحين وعلى يمينى عربية مرسيدس e200 نفس وضعى
لحظات من الرعب وانا حاسس ان القطر ممكن ييجى من ناحية العربية التريللا من غير ماشوفه لانها حاجبة كل الرؤية عنى بس ارتحت شوية لما لاقيت القطر جاى من على اليمين وانا شايفه
ايوا هو الضوء اللى جاى من على بعد 200 متر دا
الكلاكسات زادت والناس بدأت تهرب من عربياتها ماعدا اللى سايقين العربيات وتبّاع النقل نزل يجرى ناحية القطر وعمال يحركله الجاكيت بتاعه فى محاولة فاشلة عشان يقف
العربيات بدأوا يزنقوا فى بعض ودا ادانا مساحة صغيرة نلحق نهرب فيها والحمد لله بتاع النقل كانت المساحة قصاده اكبر فلحق يلم عربيته كلها
وانا مالحقتش غير انى ابعد عن الشريط الاول بتاع متر ونص اذا مكانش اقل لكن بتاع المرسيدس كان فعلا اقرب للشريط الاول جدا والحمد لله ان القطر جاى من على الشريط الاول لاننا كنا مزتوقين فوق الشريط التانى
سيبنا عربياتنا تواجه مصيرها ونزلنا منها احنا كمان بنجرى ...الديزل عدى الحمد لله ودى كانت بداية مبشرة بس المسافة بينه وبين عربيتى اقل من متر فعلا وانا منتظر حاجة بارزة من عربيات الركاب تلطش عربيتى لكن المسافة مابينه ومابين المرسيدس كانت صفر بمعنى الكلمة ومعرفش ازاى ماخبطهاش
عدينا عربياتنا بعد ما الطريق فتح مرة واحدة بقدرة قادر مع اعتذارات غير مقبولة طبعا من سواقين الميكروباصات المخالفين وساعتها بس عرفت ميكانيزم التبول اللا ارادى ازاى بس الحمد لله انى كنت داخل الحمام قبل مانزل من البيت :d
عضلات الجسم بالكامل مش تحت السيطرة ..الرجل مش بترعش ، دى بتتنطط فوق دواسة البنزين
اول 11 ولا 15 مطب قابلونى مع انى حافظهم عن ظهر قلب لبستهم كلهم واحد واحد
وبسبب الحالة النفسية والبدنية محدش وقف عشان حتى يشتم سواقين الميكروباصات المخالفين مع انى ماعرفش ازاى فى ساعتها ماشديتش الصليبة واستغليت وضعى ووضعهم وعملت فيها مجنون من الصدمة وكسرتلهم ازاز عربياتهم
المهم ان الموضوع عدى بسلام الحمد لله بس طبعا مش هايكون اخر مرة طول مامفيش شرطى
دلوقتى عايز اروح اشتكى واطلب لو حتى كاميرا وهمية عشان المخالفين يخافوا بس مش عارف اروح للمرور ولا للسكة الحديد واروح لمين بالظبط جواهم وازاى اخليهم يهتموا بالموضوع
ياريت اللى يعرف يفيدنا والحمد لله على كل شيء
وربنا ينتقم من العقليات المريضة دى ويرحمنا منهم