طلب نصيحه بخصوص فليشيا

**noway** · 17-09-2008 04:21 PM

السلام عليكم كنت عايز اشتري عربيه اليومين دول و دي بصراحه اول عربيه ليه و خبرتي مش قد كده و قدرتي الماديه حتي 35 الف مش اكتر ..محتاج عربيه جيده و مش مهم الكماليات و تتحمل لاني هسافر عليه بصوره شبه يوميه ... في واحد صاحبي قاللي ال128 افضل لحالتك عربيه رخيصه و قطع غيار متوفره و رخيصه و الكويسه جدا تعمل 27 الف و في واحد تاني قاللي خد الفليشيا 95 و هي عنده حاليا لكن خفت من موضوع السخونه اللي الناس هنا في المنتدي بيتكلموا عليه ...بصراحه انا مش عاوز اوجع دماغي و انشغل في العربيه عايز عربيه تريحني فايه رايكم.. ملحوظه انا كتبت الموضوع ده بعد قراءة عدة مواضيع هنا في منتدي السكودا و بالعكس فحيرتي اصبحت اكتر ... علي فكره انا من المنصوره للعلم بس فهل قطع السكودا متوفره هنا و هل في حل لمشكله الحراره.

**hazem_khidr** · 17-09-2008 11:16 PM

هات اكسيل او سويفت افضل ليك
عربيه بشنطه و تستحمل السفر و مش خشنه زي الفليشيا و فيها كماليات
الفيليشيا في رايي عباره عن لادا متنكره

**noway** · 18-09-2008 06:14 AM

الاكسل و الاكسنت الكويسه بتدور في الاربعينات و ده فوق قدرتي و ان كنت مقتنع بنعومة الهيونداي في القياده ..طيب ايه رايك في السوزوكي سويفت

**noway** · 19-09-2008 02:05 AM

شكرا حازم ما اخدتش بالي انك بتنصح بالسويفت في ردك. اوكي انا شايف ان السويفت برضه افضل.

**waelgaber** · 22-09-2008 11:35 AM

بص انا عندى سكودا وموضوع السخونة محلول ومفهوش مشكلة لان الموضوع كلة مكانيكى بيفهم وقبل متشترى العربية جربها على فكرة دى تانى عربية لية اشتريها سكودا وسعر العربية الى انتا بتقول عليها حوالى 30000 لو حالتها جيدة وتكون عادة مفيهاش اى كماليات والله انا كنت كرهت العربية دى بس بعد لما حاليت المشكلة مريحانى خالص وربنا يوفق

**noway** · 22-09-2008 03:30 PM

طيب يا وائل انا العربيه دي معروضه عليه ب32 الف و حسب كلام صاحبها و هو شخص امين فهي محتاجه مصاريف في حدود الف جنيه (بطاريه و الزجاج الامامي محتاجين و حاجات تانيه ) العربيه فيها سنتر لوك و مكيف ياباني مش الاصلي و فابريقه جوه بس فايه رايك تستاهل ام لا.. انا خايف من موضوع الخشونه اللي بيقولوا عليها و قطع الغيار الغاليه و السخونه يا ريت تقولي الميكانيكي بتاعك عمل ايه لاني بقالي شهر مش عارف اخد قرار .. و يا ريت تقولي رايك برضه في الاكسل 1300 سي سي بدون كماليات لانه في نفس المستوي السعري. آسف علي التطويل. تحياتي لك

**waelgaber** · 26-09-2008 01:56 AM

السلام عليكم بالنسبة للسعر كويس مش وحيش بس اتاكد ان المصريف دية على الحجات الى بتقول عليها بس يعنى مش تلقى بعد كدة عفشة ولا اى شىء تانى وجرب العربية فى وقت الظهر مع التكيف ودوس جامد وياريت يكون طريق سريع علشان تختبر الحرارة وه والله عربية كويسة بالنسبة للعربية الاكسل هى مش وحشة بس من وجهه نظرى عربية ضعيفة وبص على العربية دى كويس من عند السقف والكبوت هتلقى تعريج بصيت ودة بسبب الهواء يعنى الصاج ضعيف اما الاسكوداء صاجها جامد وامان على الطريق تقيله وموضوع الخشونى علشان الكتينة جنزير ودية المفروض بتتغير بعد 80 الف كيلو ومش هتسمع صوت للعربية خالص ومين الى قلق ان قطع الغيار غالية انتا سالت عليها بنفسك وعلى فكرة حاجتها بتعيش ومش غالية ولاحاجة وربنا يوفقق

**waelgaber** · 26-09-2008 02:22 AM

موضوع السخونه نحصرة فى نقطتين الاولى ان دائره التبريد مغلفه ومينفعش ان يكون بيها اى تسريب ولو بصيت وتكون المياة مش بتنقص والتانى ويش السلندر ودة بيكون الاغلاب وبيجنين الناس ويس السلندر دة مشكلته ان المياه مع الوقت بتبهدله وبيحصل فى تنقير ودة بيسبب وجود هواة بالقربة وحل المشكله دة ان يزود الويش وبعدين يقشط على علام الفبريكه ويركب جوان واحد بس ويتجيب من البنزينه علبتان دواء قله بخصوص ويش السلندر ودة بيعمل على معالجه اى صداء موجود داخل الماكينه وده سعرة 35 جنية مش اقل ولا ازيد هى دية كل الشغلنه

**amir** · 26-09-2008 05:04 AM

المشاركة الأصلية كتبت بواسطة hazem_khidr

الفيليشيا في رايي عباره عن لادا متنكره

يا راجل يا طيب بلاش النوع ده من الاهانه للفيليشيا, كانت معايا 5 سنين, و الله عربيه جامده جدا جدا يمكن مش ناعمه زي الياباني طبعا بس عربيه الماني مجمعه في التشيك و الثبات و القوه و التحمل شعارها و قطع غيار معمره فوق الوصف ده غير ان مع الصيانه الدوريه و تظبيط علبه الدريكسيون و العفشه العربيه بتبقي جامده
لادا ايه بس اللي بتقول عليها بقي العربيه مع خشونتها النسبيه ارحم بفارق رهيب عن اللادا, انا سقت اللادا شويه و عارف احساس سواقتها ايه, و كأنك بتركب الدب الروسي ذات نفسه في زمن الحرب العالميه التانيه!!!!!!
بس اكيد في عربيات انعم و اكثر رفاهيه منها في نفس السعر زي الاكسنت موديلات 99 فما فوق و الاكسيل و اللانوس طبعا

رجاء متزعلش مني بس مقارنه الفيليشيا باللادا و ال128 مقارنه ظالمه جدا جدا جدا و الناس هنا اكيد معاها العربيات دول و عارفين الموضوع ده