الموضوع: التكييف في العربية الدوجان يا سبعاوى باشا

كلمة التكييف ضعيف دى كلمة عامة أوى، لذلك علشان نكون محددين أكثر انا هحتاج إجابة الأسئلة الآتية

1-هل التكييف ضعيف بمعنى ان كمية الهواء اللى خارجة من التكييف قوية لكن مش باردة ،

2- ام ان كمية الهواء اللى خارجة من التكييف قليلة ولكن باردة،

3-ام كمية هواء قليلة ومش باردة

4-هل الكباس بيوصل لمرحلة انه يفصل ويشتغل وللا شغال طوال الوقت،

5-هل التكييف بيطلع هواء ساقع حلو شوية فى الأول وبعدين كمية الهواء تقل لحد ما يبقى مافيش هواء خالص، ولو فصلت الكباس فى اللحظة دى وسبت المروحة شغالة تلاقي الهواء رجع يخرج بالتدريج ويكون هواء ساقع ويستمر ساقع لفترة برغم ان الكباس مش شغال؟

6-هل العربية بتسخن مع تشغيل التكييف؟

7- هل بعد ما بتشحن الشحنة بتتسرب؟

وجود العيب رقم 2 أو رقم 5 او كلاهما يشير الى ان الكويل فيه مشكلة، قد يكون فيه زيت او الريش مسدودة بتراب او فيه سدد فى مسارات الفريون

وجود العيب رقم 3 يشير الى ان الكويل به مشكلة والكباس به مشكلة

بالنسبة للعيب رقم 4 ، لو الكباس بيفصل ويشتغل يبقى لا مشكلة منه ، لكن العكس غير صحيح، يعنى لو بيشتغل طول الوقت فليس معنى ذلك ان هناك مشكلة، لكن لو الكباس بيفصل ودرجة الحرارة بالصالون مرتفعة يبقى فيه مشكلة فى الثرموستات


وجود العيب رقم 1 يعنى مشكلة فى الكباس او سدد فى الدورة (يجب مراجعة فلتر الفريون فى حالة وجوده)

وجود العيب رقم 6 يعنى ان مروحة السربنتية الأمامية بها مشكلة

وجود العيب رقم 7 يعنى وجود نقطة تسرب او اكثر بدورة التكييف

حاول تفيدنى بشكل أداء التكييف اكثر علشان اقدر اساعدك فى تحديد العيب

بص هو كدة غالبا الكباس بتاعك ضعيف،

حلا لهذة المشاكل ممكن تغير الكباس، وانصحك تجيب الساندن اليابانى

انا اعرف 2 يتوع تكييف، واحد فيهم فى شارع دمشق إسمه الجندى، عند تقاطع دمشق مع بيروت جنب بنزينة التعاون وباين وحاطط يافطة كبيرة ،عنده اسطى ممتاز إسمه سيد

وفيه واحد تانى فى المعادى، فى نهاية شارع النصر بعد مكتبة سوازن مبارك، فيه سوق تجارى (محروق حاليا وعبارة عن انقاض) فيه هناك شريف بتاع التكييف، كان له ورشة فى السوق دة بس لما اتحرق خد دكانة صغيرة كدة ورا السوق، انت اوصل عند السوق المحروق واسال فين شريف بتاع التكييف الناس هتدلك على مكانه، برضه هو ممتاز