مشروع مكتبة للادوات المدرسية

**ahmedelzeeny** · 25-11-2013 12:37 PM

يا جماعه انا بفكر فى مشروع مكتبه يا ريت اللى خبرة فىالموضوع ده يفيدنى وهل هو مجزى ماديا ؟؟؟وتكلفه بدايه المشروع مثلا اد ايه ؟؟او دراسه جدوى لمكتبه صغيرة

**ahmedelzeeny** · 25-11-2013 01:40 PM

افيدونا ولا محدش عمل مكتبه قبل كده

**nodey** · 25-11-2013 01:53 PM

مشورع كويس ربنا يرزقك من واسع فضله بس شوف دراسات جدوي تخص المضوع عشان الربحية وربنا معاك

**مصطفى-حسن** · 25-11-2013 04:47 PM

مكتبة وبوتيك وخردوات وهدايا
اعرف افيدك بكل التفاصيل من اول التجهيز لحد يوم الافتتاح

لكن مكتبة بس
معاك ربنا
احنا شعب مبيقراش

**RAPID** · 26-11-2013 03:33 AM

اساس المشروع ده هو المكان لازم تختار مكان يكون قريب من مجمع مدارس او جامعة او مصالح حكومية (سجل مدنى - مرور - مستشفيات - مجلس محلى) لان معظم شغلك واللى فيه المكسب بيكون فى التصوير والطباعة، وفى فترة الاجازات الشغل بيريح شوية

هيلزمك ماكينة تصوير كويسة وجهاز كمبيوتر وطابعة وسكانر وخط نت، وحاول تتعامل مع المدرسين فى طباعة وتصوير المذكرات وتديهم خصومات مغرية فى البداية لانهم هيكونوا جزء مهم من شغلك

اما الادوات المدرسية لازم تجيب كل حاجة الاقلام بانواعها والكشاكيل والشنط والملخصات الخارجية ومصاحف والعاب تعليمية ولوحات وكتب الوان وادوات هندسية والات حاسبة وهدايا رمزية وكل حاجة واهم شئ متقولش لزبون على حاجة مش موجودة عندك مفيش! قوله خلصت وهنجيبها بكرة عشان ميطفش ويرجعلك تانى وركز وحاول تجيب كل شئ تلاقيه فى المجال ده والاهم زى ما قلتلك فى الاول اختيار موقع المكتبة وربنا يوفقك

**RAPID** · 26-11-2013 04:47 PM

مكتبة للأدوات المكتبية ???? إنتج شبكة إقتصادية لتنمية وتطوير المشروعات

مشروع بيع أدوات مدرسية .كتب ,أقلام ,كراريس |

**ahmedelzeeny** · 27-11-2013 11:36 AM

المشاركة الأصلية كتبت بواسطة rapid

مكتبة للأدوات المكتبية ???? إنتج شبكة إقتصادية لتنمية وتطوير المشروعات

مشروع بيع أدوات مدرسية .كتب ,أقلام ,كراريس |

شكرا ع اللينكات وياريت اللى له خبرة شخصيه فى المشروع ده يفيدنى

**مصطفى-حسن** · 27-11-2013 02:06 PM

بص ياباشا
انا هبدأ معاك خطوة خطوة
اول حاجة التشطيب الداخلى للمحل اللى عندك
سيبك من الدهان والديكورات والكلام القديم والمكلف دة
انت هتدهن السقف بس ابيض
وباقى المحل كلة خشب تجليد من الارض للسقف وحوامل متنوعة الاطوال ورفوف ازاز
وبس خلاص

وعشان يبقى الكلام بالتفصيل
خشب التجليد هوة دة

اللوح مقاس 244 * 122 سعرة بيتراوح ما بين 120 الى 135 ج
وبتجيب لة مجرى معدن بعد الفتحات اللى فى اللوح تقريبا 8 فتحات
المجرى المعدن ب 8ج
والبلاستيك ب4ج

وبتجيب الحوامل او الشوك اللى بتركب في وسعرها على حسب الطول بيتراوح ما بين 85 قرش الى 3ج على حسب الطول

ودى الل انت بتعلق عليها المعروضات او البضاعة

وبتجيب حوامل رفوف زجاج ودى بتبقى محملة وسعرها بيتراوح ما بين2 الى5ج على حسب الطول

الكلام دة كلة بيبتباع فى العتبة فى القاهرة جنب حلوانى تسيباس اللى فى العتبة هتروح هناك هتلاقى سوق كامل متخصص فى تجهيز المحلات

احسب حسبتك وشوف الدنيا اية

وبعد كدة نخش عل الواجهة بتاعة المحل
وبعد كدة نخش على البضاعة