انا عمال اقارن بين الموتورين دول و شايف ان الكلام كتير عن المايفك 1.6
فى حين انا عندى وجهة نظر خاصه بمصر و الطرق المصريه و البنزين الردىء الموجود فى مصر
المقارنه بتهم فئة السائقين اللى عايزين موتور للاستخدام اليومى و فى نفس الوقت يتميز باداء رياضى و قوه محترمه بغض النظر عن الجرى و الشد و التنافس مع الغير
فى حاجه مهمه عند المقارنه بين الموتورين دول و هى نسبة الانضغاط و عدد لفات الموتور
بالنسبه للمايفك
4G92-MIVEC DOHC 16 Valve
Total Displacement - 1,597 cc
Bore - 81.0 mm
Stroke - 77.5 mm
Compression Ratio - 11:1
Maximum Output - 128 kW (174 PS; 172 bhp) at 7,500 rpm
Maximum Torque - 167 N·m (123 ft·lbf) at 7,000 rpm
بالنسبه لل 2.0 لتر
4G94 SOHC 16 Valve MPI
Multi-Point Injection (MPI)
Total Displacement - 1999cc
Bore - 81.5mm
Stroke - 95.8mm
Compression Ratio - 9.5:1
Maximum Output - 92 kW (125 PS; 123 bhp) @ 5,200 rpm
Maximum Torque - 176 N·m (130 ft·lbf) @ 4,250 rpm
يبقى دلوقتى المايفك معدل انضغاطه 11:1 و بيطلع 172 حصان عند 7500 لفه و عزم 167 نيوتن عند 7000 لفه اى بيطلع قوته على ار بى ام عالى و بعد الانجاج بتاع المايفك و مع معدل الانضغاط العالى يبقى هيحتاج حرق كمية كبيره من البنزين و كمان معدل الانضغاط ده بيحتاج اوكتان 95 عشان يديك اللى انت عايزه من الموتور طبعا اوكتان 95 هنا فى مصر لا يعطى قيمه حقيقيه يعنى هو فعلا مش 95 ده غير ان تمنه غالى لكتير من الناس فبيضطرو يحطو اوكتان 92 و ده بيأدى ان الموتور ممكن يسقف او ممكن كفائته اللى انت منتظرها منه تقل كتير
بالنسبه لل 2000 سى سى 4g94
معدل انضغاطه 9.5:1 و بيطلع 123 حصان عند 5200 لفه و عزم اكبر من المايفك 176 نيوتن عند 4250 لفه
يعنى بيطلع قوته يعتبر على ار بى ام متوسط و ده يعنى انه هيكون اجريسيف فى الميد رانج لكن هيديك نهاية سرعه اقل من المايفك و لو عملتله بووست فى فيلتر الهوا و البوجيهات و تعديل عادم ممكن يوصل ل 135 حصان و العزم اعلى من المايفك و مع معدل الانضغاط بتاعه فهو هيمشى ببنزين 92 زى الفل
و طريقة حرقه للبنزين هتبقى اقل من المايفك لان عدد لفات الموتور اقل و نسبة الانضغاط اقل و عدم احتوائه على تقنية المايفك
نيجى نبص للطرق المصريه الغير صالحه للاستخدام الآدمى هتلاقى ان انت لو من محبى التسارع
فاغلب التسارع اللى بتعمله بيكون فى الميد رانج لان الطريق مش هيساعدك اكيد زحمه و مطبات و اسفلت مكسر
يبقى لو قلنا ان سائق مصرى عايز موتور محترم بعزم محترم و حصان محترم ادائه يجلب الارتياح و الرضا له بغض النظر عن موضوع السباقات مع الغير و التنافس مع سيارات الغير
فهل نقدر نقول ان الموتور ال 2000 سى سى 4g94 هيكون اختيار افضل بكثير من الموتور ال 1.6 المايفك من الناحيه الاقتصاديه و من ناحية الاداء على سرعات متوسطه تناسب الطرق المصريه
ايه رأى رجالة اللانسر فى الموضوع ده اتمنى المناقشه
ملاحظه : المعلومات اللى انا قلتها دى فهم شخصى يحتمل الخطأ فلو انا قولت حاجه غلط برجاء تصحيح معلوماتى
المفضلات