السلام عليكم
في حد عندو معلومات عن المرض ده
عرض للطباعة
السلام عليكم
في حد عندو معلومات عن المرض ده
اعمل سيرش على جوجل فية مقال عنة فى اليوم السابع
عانينا منة و الحمد للة بعد فترة قصيرة كانت الامور تمام يفضل استخدام فيتامين ب
التهاب فى العصب اللى بيتحكم فى عضلات الوجه و الفكين (نص الوش بالطول) و بيسبب شلل فى العضلات طى لحد ما الالتهاب يتعالج و يتعمل جلسات علاج طبيعى عشان العضلات ترجع تانى
هو محتاج و قت. عدم استعجال و راحه نفسيه طبعا مع ادويه ضاده للالتهاب و فيتاين بى و بتاخد قطره عشان عينك اللى جفنها مبيقفلش متلتهبش و هتضايق شويه لما تاكل و الاكل و الميه يقعو من بقك بس هتتعود بسرعه
الموضوع بياخدلو شهر شهرين و سببه اما مفسى او تعرض من سخونه شديده لبروده شديده او العكس او التهاب حاجه فى الوش تسمع فى العصب .... ربنا معاك
بياخد وقته ويعدى ، والأمور بترجع كما يرام
بس يفضل عمل علاج طبيعى لاسراع بالشفاء
شكرا ليكم على الردود
وعافانا وعافاكم الله
الموضوع مش خطير ان شاء الله
بس لازم تجنب تيارات الهواء البارد تماما و تدفئة المنطقة المصابة و المواظبه على فيتامين b1 ,3 & 6
فى البداية الدكتور ممكن يوصف حقن او حبوب كورتيزون حسب شدة الألتهاب ..... المواظبه عليها و الألتزام بمواعيدها و جرعاتها مهم جدا
احيانا كتير بيبقى فيه ألم و صداع قوى ........ بس بالصبر و العلاج شهرين بالكتير و كل حاجة ترجع زى ما كانت
و ربنا يشفى مرضانا جميعا
الموضوع سهل والشفاء مضمون ان شاء الله
اختي اصيبت بيه نتيجه تعرضها لهواء مباشر من التكييف
الاعراض : خلل في حركه عضلات جانب من الوجه يظهر اثناء الكلام ويؤثر علي اغلاق جفن العين اثناء النوم
العلاج : تروح لدكتور مخ واعصاب وهايكتب علي كورتيزون ( خفيف ) وفيتامين ب 12
وموش فاكر كان في مضاد حيوي ولالا ومرهم لوضعه في العين اثناء النوم لترطيبها نظرا لعدم قفل الجفن جيدا حتي لايسبب جفاف للعين
العلاج ده لازم يكون تحت اشراف الطبيب
وعلاج طبيعي لعضلات الوجه في مركز علاج طبيعي
الطبيب ده في مصر الجديده وشخص محترم وموش بتاع اشتغالات واسعاره حلوه بالنسبه لاطباء المخ والاعصاب علما بانه استاذ في طب عين شمس
وبالشفاء ان شاء الله
نصيحه منى (الموضوع ده حصلى مرتين او تلاته) مره بسببب زعل شديد اوى و الباقيين كان التهاب شديد فى الجيوب الانفيه سمع فى العصب .... بلاش كورتيزمو لا خفيف ولا تقيل .... الدكاتره بيدو كورتيزون عشان الالتهاب يروح بسرعه بس الكورتيزون اضرار كتير ... الافضل ادويه عاديه مضاده للالتهاب مع العلاج الطبيعى و تستحمل الكام اسبوع و متتضايقش :)
ربنا معاك و يشفيك ان شاء الله
يا فندم ما فيش حاجة اسمها بلاش كورتيزون
التهاب العصب السابع يجب ان يعالج بالكورتيزون إﻻ لو فيه ما يمنع استخدامه عند المريض، بالإضافة إلى العلاج الطبيعى من أول يوم.
إللى يختلف بقى استخدام مضادات الفيروسات وده على حسب الكشف على الحالة.
اما عن أضرار الكورتيزون فلن يشكل أى خطورة لو اتكتب بجرعة سليمة حسب الوزن ولمدة قصيرة وتم سحبه سريعا.ً
انا بالفعل رحت لدكتور مخ واعصاب اسمه خالد صبح
وشخص الحالة التهاب في العصب السابع
وانا كنت عارف لاني دورت في النت وعرفت التشخيص قبل ما اروح للدكتور
المهم انو كتب العلاج ده
حقن ليفابيون فيتامين ب--حقن ديبو ميدرول---برشام زوفيراكس--قطرة tears naturale --جيل للعين كورنيريجيل
وطبعا كتب جلسات علاج طبيعي
والجلسات عبارة تعرض الجزء المصاب لحرارة بلمبة اشعة تحت حمراء وجهاز تاني بيتحط على الخد
والملاحظ بعد جلسة الاشعة دي ودني بتوجعني
وبالنسبة للعلاج ده هل فيه كورتيزون
هو كاتب حقنة كل 3 ايام لمدة شهر
وعلى فكرة الحمد لله الحالة بسيطة
يعني محدش بياخد باله الا لما بلفت نظرة
يعني فمي في الحالة العادية شكلة عادي لاكن عند الكلام او الضحك فيه عوجة
والعين الشمال طبعا حركة الجفون صعبة والحاجب ساقط حاجة بسيطة
وحضرتك مش موافق على الحقن بصفة عامة ولا على الديبو ميدرول خاصة
وهل فيه اقراص ليها مفعول الديبو ميدرول
هو فعلا جراح مخ واعصاب
واسطرة مخ وكذا حاجة في الروشتة
وهو استاذ في الجامعة والمفروض كان ينتبه لحكاية جرعة الكورتيزون دي خصوصا انو وصفي الحقن كل 3 ايام لمدة شهر بدون تخفيف الجرعة وانا اعرف ان الكورتيزون لازم يسحب بجرعات اخف من البداية ولا يتم سحبه مرة واحدة
وخصوص اني اراجعه اكيد حضرتك عارف انو مش هيراجع اللي كاتبة
عشان كده قلتلك بلاش كورتيزون
هو بيحاول يلم الموضوع بدرى بدرى عشان العضلات متقفش خالص بس هتقف و متضايقش .... هتاخد وقتها مع العلاج الطبيعى و تروح ان شاء الله
شكرا لمتابعتك واهتمامك
هو انا قريب من امبابة او المهندسين
وبعدين حضرتك طالما الحالة معروفة والتشخيص معروف
وانا كتبت العلاج لحضرتك هل المشكلة في حقن الديبو ميدرول فقط ولا العلاج ككل
يعني ايه البديل للحقن
وهل في خطورة لو وقفت الحقن مرة واحدة انا خدت حقنتين
انا شاكر جدا لحضرتك
وياريت تليفون وعنوان الدكاترة وحضرتك ترشح مين
ويا ريت اسم الاقراص ايه البديل للحقن وما هي الجرعة وهل هي كرتيزون وشكرا مرة ثانية لتعبك
سبق إصابتي بهذا المرض منذ فترة
والموضوع مش محتاج طبيب مخ وأعصاب ، علاجه محفوظ حتى عند أطباء الامتياز
العلاج الاساسي هو الكورتيزون للأسف ، ومش هتلحق تعاني من أضراره
لان الاضرار تظهر إذا كانت مدة تعاطي الكورتيزون طويلة
وزي ما قال الزميل يفضل أقراص وبلاش حقن
بس خلي بالك ، الكورتيزون لازم تاخده بالتدريج ، قرص لمدة يومين ، ثم قرصين ، ثم ثلاثة ، ثم أربعة
ولازم تبطله بالتدريج أيضا ، وهذا أهم ما في الموضوع
وربنا يشفي كل مريض
ان شاء الله
د/ خالد
انا رحت النهاردة للدكتور وكلمتو على موضوع حقن الديبو ميدرول
قالي دي افضل علاج واحسن من الاقراص وانها 40 وافضل من انواع تانية في الخطورة ومفيش خطورة من استخدامها مرة كل 3 ايام لمدة شهر ايه رايك في الكلام ده
انا راجعت الدكتور اللي كشفت عنده د /خالد صبح
حبيت اشوف رايه واراجعه زي ما طلبت مني في البداية
قبل ما اروح لدكتور جديد ويلغي العلاج ويبدا من جديد
حضرتك عارف مفيش دكتور بيعتمد حاجة كتبها دكتور قبله
زميلي العزيز
زي ماسبق وقلت لك علاج العصب السابع سهل لكن لازم يتم تحت اشراف طبيب
بالنسبه للكرتيزون فده ضروري وبيكون جرعه خفيفه والدكتور اكيد سالك اذا كنت مريض سكر او اي مرض مزمن اخر لان فيه ضوابط لاستخدام الكورتيزون فطمئن
اما حكايه ان العلاج بتاعك فيه كورتيزون او لا ممكن تسال الصيدلي في اي صيدليه وهايقولك بس اتاكد انه صيدلي موش بياع وخلاص
وحسب معلوماتي المتواضعه ان الكورتيزون بيتم وقفه تدريجيا وده مهم
وبالشفاء ان شاء الله
هتكلم عن جزء العلاج الطبيعى فقط ودا تخصصى ان شاء الله,
ا[OVERLINE]ولا[/OVERLINE] تشخيص الحاله هو التهاب العصب السابع فى اى من الناحية اليمنى او اليسرى
ثانيا التحسن فى الحالة : تعتمد نسبة الشفاء على مدى شدة الاصابة وعمر المريض
وبعض الامراض المصاحبة واغلبها التهابات الاعصاب او السكر (وغالبا ما تحتاج لفترة علاج اطول).
متى يبدأ المريض فى جلسات العلاج الطبيعى : يفضل ان يبدأ المريض بعد 10 عشرة ايام من بداية العلاج الدوائى الموصوف من قبل اخصائى امراض المخ والاعصاب.
مما تتكون جلسة العلاج الطبيعى : تتكون جلسة العلاج الطبيعى من شقين
الشق الاول هو العلاج بالاجهزة الكهربية العلاجية وتشمل 1-تيار الفارادك وهو تيار كهربى يشبة نفس التيار الكهربى التى تعمل بها عضلات الجسم (ويفضل ان تكون شدة الجهاز من خفيفة الى متوسطة حتى لا تصاب العضلات بتليف بسبب طبيعة عضلات الوجة المختلفة عن باقى عضلات الجسم....
2-العلاج بالحرارة ويفضل استخدام مصدر للحرارة الرطبة مثل جهاز الكمادات المائية وهو افضل من الاشعة تحت الحمراء والتى تعتبر مصدر للحرارة الجافة
3- جهاز الاشارات المرجعية (bio feed back) وهو جهاز يستخدم فى التمرينات العلاجية لعمل تحفيز للعضلات الضعيفة وعمل تثبيط للناحية السليمة حتى نحصل الاتزان مابين الناحيتين
4-التمرينات العلاجية وتشمل -التليك اليوى بطريقة معينة لزيادة الدم لعضلات الوجة وتنشيط الدورة الليمفاوية لازالة الورم والفضلان
-تمرينات تنشيط عضلات الوجة باستخدام عضلات الرقبة
-تمرينات مساعدة لكل حركات الوجه
-واهم تمرين هو (deep friction massage(وهو عبارة عن الضعط بطريقة معينة على جزع العصب المصاب (خلف الاذن ) حتى يتم ترتيب خيوط العصب الملتهب بانتظام والعودة للعمل بصورة طبيعية
5-برنامج العلاج المنزلى : ويشمل كمادات مياه دافئة لمدة عشرة دقائق يوميا
بعض التمرينات المنزلية
بعض النصائح منها عدم التعرض للبرودة والشخونة المفاجئة عدم التعرض لتيارات الهواء القوية لبس نظارة شمسية للحفاظ على العين من الاتربة
فى النهاية بانتظام العلاج الدوائى مع العلاج الطبيعى (خمس جلسات فى الاسبوع)تقل بعد ثلاثة شهور الى (ثلاث جلسات فى الاسبوع )تقل بعد سنة الى جلستين اسبوعيا حتى تقل الى جلسة واحدة حتى ثلاث سنوات وبعدها يتوقف العلاج .
ملحوظة بعض الحالات تحتاج لاسبوعين والبعض اكثر وقد تصل الى ثلاث سنوان طبق لكل حاله
مع التمنيات للجميع بدوام الصحه
د/محمد يوسف العفيفى
اخصائى العلاج الطبيعى