عاوزة اشترى عربية جديدة ومحتارة جدا شوية اقول الهوندا سيتى (يابانى وجميلة لكن اعادة البيع الناس بتشتكى منها) وشوية اقول الفلوانس (جذابة وواسعة واصلا كان نفسى اوى اوى فى العداد الديجيتال لكن الناس بتقول بلاش فرنساوى عشان اعادة البيع برده )وشوية اقول لأ الياريس الجديدة ( يابانى وآخر موديل واكيد هتكون موفرة فى البنزين عشان موتورها ال 1300) .. لكن فى الآخر بحاول ابعد عن تفكير البنات واعجابهم بالشكل فقط :o_stupid[1]:

المهم ... عاوزة افكر معاكم بصوت عالى وآخد رأيكم مثل صديقكم هنا ..

دلوقتى انا سواقتى عنيفة مثل الشباب (يمكن عشان اتعلمت على لادا :) فبمشى مش بيهمنى وخصوصا لما بكون متعصبة عصبيتى بتطلع فى السواقة (فبالتالى عاوزة عربية تستحملنى) وعقلى صغير مع اي حد بيغلس على فى السواقة مش بهدى غير لما بسبقه وطبعا لكم ان تتخيلوا كم الشتايم اللى بخدها من الناس طول ما انا ماشية ( مش عشان بسوق غلط لكن عشان بسوق بسرعة فى شوارع داخلية :) وساعات ببقى عاملة زي الميكروباص )

ثانيا عاوزة عربية عالية (كنت هشترى السانديرو الستيب واى) اللى منعنى بس انها مانيوال.. برغم ان ناس قالولى ان طالما انا بحب السواقة وبستمتع بيها وبسوق عدد ساعات طويلة يبقى المانيوال هو الافضل بالنسبة لى ..... لكن بصراحة برضه الشوارع بقت زحمة بدرجة متعبة تخلى اى حد محتاج للاوتوماتيك... كفاية يوم زى مظاهرات جامعة الازهر دى .. وصلت شغلى فى 3 ساعات...

ثالثا نفسى نفسى فى عربية لما ادخلها اكون منعزلة عن العالم يعنى لما اقفل الزجاج مسمعش غير نفسى بيتهيألى صعبة دة :)

رابعا .. كنت فكرت برضه فى الاوبل كورسا الجديدة .. عشان قولت لنفسى سواقتى دى عاوزة حاجة المانى عشان تستحملنى وفى نفس الوقت شبابية وصغيرة لكن الناس رجعت خوفتنى من اعادة البيع وغلو قطع الغيار.. وفى حد قالى متجيبيش عربية اوتوماتيك اقل من 1600 وانتم اكيد عارفين ان الكورسا 1400 بس . ( واصلا مش عارفة مدى صحة المعلومة)

خامسا استبعدت النيسان تيدا الجديدة نظرا لغلو سعرها (160000) كتير جدا على هاتش باك

سادسا كنت هتجنن على البيجو 208 لكن استبعدتها برضه عشان الشاشة قالوا لو باظت محدش هيعرف يصلحها :(((((

وانتقلت اختياراتى للهوندا سيتى والشارك و البيجو 301 و الياريس الجديدة السيدان...

اكثرهم اقرب لنفسى الياريس ثم الهوندا ثم الشارك ثم البيجو

الياريس 1300 ( ده هيخليها موفرة فى البنزين ) وفى نفس الوقت يابانى موديل 2014 لكن بخصوص ان الاوتوماتيك مش حلو فى موتور 1300 (مش عارفة مدى صحة المعلومة) !! وسعرها (14000) اول فئة اوتوماتيك
السيتى 1500 ( بحبها لكن المنتدى هنا بيقول انها تقريبا مش ماشية فى الشارع وبالتالى هنخسر فيها عند اعادة البيع واعتقد انها واطية كمان ) سعرها (150000) اول فئة اوتوماتيك
البيجو 1600 ( طبعا انا شايفة ان فى انحياز ليها جدا سواء فى المنتدى هنا او فى المعارض ) بس مش عارفة ليه نفسيا انا مش مقبلة عليها سعرها ( 136000) اعلى فئة للاوتوماتيك
واخيرا
الشارك 1600 مش متأكدة من سعرها لكن سعرها على كونتاكت كارز (150000) لأول فئة اوتوماتيك
ومش عارفة انتم بتقصدوا ايه من موضوع ان عيبها عزلها ؟؟؟؟؟ لكن اللانسر عموما لا يختلف عليها اتنين واعتقد برضه برغم قلة انتشارها مقارنة بالبومة لن يلغى كونها يابانى واعتمادية ومعمرة واعادة بيع جيدة..

تعبت بقى ساعدونى فى الاختيار