المشاركة الأصلية كتبت بواسطة ahmed travco
شوفي... عفشة الشارك -ببساطة- تقدري تقولي انها مش في نعومة الكورولا والفلوانس، ولا في نشوفية الفانتازيا والسيراتو (الشكل قبل الأخير)... يعني هي متوسطة وفي نفس الوقت مريحة الى حد كبير في السفر (انا 90% من سواقتي بتبقى سفر وطرق سريعة)... العربية مقاس كاوتشها مثالي (205/60 r16) فمش هتحسي بالتفاصيل الصغيرة قوي في الطريق... ولكن زي ما قلتلك هي مش ناعمة قوي برضه...
بالنسبة لموضوع العزل... العربية صوت موتورها رياضي خصوصا لما بتقرصي + كاوتش الفابريكة نوعه "دانلوب" ياباني ممتاز جدا في الفرامل ومش بيزحف ولا بيلم زلط... لكن نقطة ضعفه فعلا انه خشن جدا وصوته بيبقى مسموع خصوصا خصوصا مع الأسفلت الخشن... ففعلا اغلب الصوت المسموع بيبقى منه لأني لما بمشي على طريق القطامية-السخنة (المعروف بنعومته الشديدة) تقريبا مش بسمع صوت للعربية غير على السرعات العالية زي اي حاجة تانية...
ومرة تانية بأكد... الحاجات اللي شفت عزلها يفرق عن الشارك بشكل يمكن ملاحظته كانت السيراتو والكورولا بالترتيب... غير كده صدقيني الفروق مش اللي هية بس احنا بنسمع حاجة ونفضل نرددها لحد ما تلزق في العربية وخلاص... والله العظيم عربية زي الكارينز عزلها فعلا سيء جدا جدا عن تجربة ذكرتها في اكتر من مشاركة هنا... بس سبحان الله عمرنا ما شفنا حد بيذم في عزل الكارينز زي ما تقريبا كل واحد بيذكر الشارك لازم يقوم بالواجب ويقول ان عزلها هو الأسوأ!!!! فعلا حاجة غريبة...