طبعا انا عارف ان لما كاوتش العربية يتخرم دى بتكون بمثابة تجربة قاسية جدا. وخصوصا بقة لو كان دا اول خرم تقابلوا فى حياتك

المهم قدر الله وما شاء فعل وكاوتش العربية الامامى يمين اتخرم وجيت اطلع بالعربية الصبح لقيته على الارض.
طبعا انا بحمد ربنا انها جت على اد كدا لأنى انا واسرتى كنا مسافريين بالعربية اليوم اللى قبليها 500 كيلو تقريبا. فالحمد لله انه مش عمل معانا اى حركة مش ليها اى لزمة فى الطريق.

المهم لما لقيت الكاوتش على الارض كدا مشيت على اقل من مهلى لحد بتاع الكاوتش. على بعد 50 متر من الجراج. وانا رايح قابلنى جارى وقالى طالما الكاوتش لسة جديد خلى بتاع الكاوتش يلحمه لحام داخلى.
وطبعا بما انى ابيض فى الحوار دا. لما رحت لبتاع الكاوتش لقيت خرمين فى مداس الكاوتش (الجزء المواجهه للارض) عملت زى ما جارى قالى ولحمتهم داخلى

لما جيت هنا المنتدى وحاولت اقرى عن موضوع اللحام دا. فلقيت اختلاف فى الاراء على نقطة اى انواع اللحام افضل. الداخلى ام الخابور.

المهم اسئلتى بقة. انه لحام افضل فى الحالة بتاعتى دى؟
وليه جارى قالى طالما جديد يبقى الحمه داخلى؟
وهل فيه خطورة على الجنط نفسة انى امشى عليه مسافة ال 50 متر والكاوتش نايم؟
وهل المفروض انقل الفردة دى ورا عشان فى خطورة عليها وهيا ادام ولا عادى؟

واشكركم مقدما واعتذر على الاطالة.