الموضوع: نصيحة ( غيروا زيت الفتيس عند ٥٠ ألف )

من باب الاستفادة قلت اشارككوا اللي بيمر عليا لتعم الفائدة

طبعاً كلكوا عارفين فتيس الفانتازيا وضرورة تغيير زيت الفتيس كل ٦٠ الف كيلومتر

تجربتي : عربيتي فانتازيا ٢٠١٠ علي اواخر الاربعينات كده بقيت احس ان نقلة الفتيس من الرابع او الخامس او السادس للتاني مفهوش سلاسه والعربية بتنتش كده نتشه بسيطة بس باينه المهم كبرت دماغي وفضلت مكمل لما وصلت ٥٣ الف كيلو بالضبط وطالع من جراچ رمسيس والعربية خدت التالت او الرابع وهديت عشان كان في عربيه قدامي وبدأت أدوس تاني فطبيعي العربية تنزل للتاني لقيت رزعه في العربية رهيبه لدرجة اني افتكرت ان اتوبيس دخل فيا من ورا بصيت في المراية ملقتش اي حد حواليا طلع الفتيس !
المهم قلقت فضلت اجرب مفيش حاجه بس فيه النتشه اللي ظهرت اخر الاربعينات سافرت الساحل وانا راجع ويحصل نفس الرزعة بالضبط كانت العربية عاملة ٥٥ الف كيلو قلت لأ بقي مبدهاش وانا راجع بالشورت والشبشب دخلت علي توكيل القطامية عايز اغير زيت الفتيس ، ليه ؟!! ، ليه ازاي يعني ؟ عايز تغيره ليه والعربيه مكملتش ٦٠ ؟؟ ، عايز اغيره عشان كذا كذا كذا ،، طب تعالي يوم تاني النهارده زحمه !!، ، لأ هغيره دلوقتي :) المهم قابلت السيد مدير الفرع وحكيتله علي اللي حصل قالي الفتيس كده باظ ! يا عم غيرلي الزيت يمكن الرواسب والرايش ينزل ده معملهاش غير مرتين ، لأ الفتيس كده باظ وبعد جدال عشان يمشوني وخلاص عشان ميفتحوش اوردر بس قلتله غيرهولي وملكش دعوة قاللي انت كده بترمي فلوس الزيت علي الأرض قولتلي اه منا عارف غيره بردو

المهم غيرت الزيت والنتيجه
الحمد لله النتشه اللي كانت بتحصل علي طول بطلت تحصل خالص والنقلات بقي فيها سلاسة واضحه والرزعة محصلتش تاني الحمد لله وعامل دلوقتي ٦٠ الف

كنت عند المهندس خالد اسماعيل من اسبوعين سألني غيرت زيت الفتيس قولتله ايوه علي ٥٥ الف قالي تمام متستناش لل ٦٠
النهارده ركبت عربية والدي فانتازيا ٢٠١١ عاملة ٤٨ الف كيلو علي طول حسيت بنفس النتشه لما بنزل للتاني من حاره أعلي وقررت أغيرله زيت الفتيس في صيانة ال ٥٠ الف إن شاء الله

انصحكم بتغيير زيت الفتيس في صيانة ال٥٠ مش هتفرق كتير ١٨٠٠ كل ٦٠ الف من ١٨٠٠ كل ٥٠ الف بس خليك في المضمون وكمان عشان توزع مبلغ صيانة ال٦٠ الكبير علي صيانتين

والله من وراء القصد