يا جماعة عايز اوبل كورسا 1200 سىسى

**kaboo4** · 18-09-2008 01:45 PM

يا جماعة ايه رئيكم فى الكورسا 1200 سىسى انا عجبانى و عايز اشتريها فى حد عندة واحدة عايز يبعها يفضل تكون موديل 97 ها تساوى كام فى رئيكم يا رجالة ارجوا المساعدة تلفونى 0167966766

**Ahmad Allawy** · 19-09-2008 05:29 PM

والله يا باشا سبحان الله..
انا الايام دي احتمال ابيع عربيتي..
و هي موديل 97 فعلا..
بس باشوف عربيته تانية دلوقتي.. ولو في نصيب و الموضوع ده مشي..
يبقي ممكن اتوكل علي الله و ابيع..
خليك متابع معايا بس و انا ان شاء الله هاعرف سعاتك اخر الاخبار اول باول..
لو هاخد العربية اللي شوفتها هاقولك و نشوف هنعمل ايه..
ولو محصلش نصيب.. ممكن اساعد سعاتك انك تلاقي واحدة نضيفة..

بيتهيألي انا اخر سعر كنت شوفته ليها كان اواخر التلاتينات و اوائل الاربعينات..
جسب الموديل و الحالة بقي..
بس خليك متابع معايا.. و ربنا يكرم ان شاء الله و كل شيء نصيب..

**kaboo4** · 22-09-2008 02:18 PM

ولاهى انا فى السوق و بسال عليها ديما هى عربيت حضرتك الى فيها فتحت سقف و نزلة بجنوط 13 الاصلى بتعها ولا العاديه و فيها تكيف الاصلى و شغال ولا لا و هل هى فبريكة برة و جوة ولا لا و كمان لو فبريكة جوة بالكاسيت الاصلى بتعها ولا مغيرة كل دى حجات تفرق فى السعر بس بأمانة على حسب الى شوفتة فى السوق كورسا نضيفة بتبداء من 34 و انت طالع لحد 38 اما موضوع ال 40 فعلا فيه ناس عايزة تبيع بالاسعار دى بس مش بتبيع خالص خدها كلمة صدق و فى الاغلب معارض سيارات و طبعا اكيد حضرتك عارف ان معاض السيرات على الاقل اعلى ب2 جنيه و الله الموفق انا اهم حاجة عندى الحالة و بعد كدة السعر مش مهم

**kaboo4** · 22-09-2008 02:18 PM

2 جنية اصدى الفين جنيه

**Ahmad Allawy** · 22-09-2008 03:14 PM

فاهمك طبعا..
شوف بقي بالتفصيل..
العربية فيها جنوط سبور جي ام اصلي مش الحديد العاديين..
هي نازلة بيهم كده..
العربية فيها فتحة سقف..
العربية مش بتنزل مكيفة اصلا..
كل ال1200 اللي هنا في مصر مش نازلة مكيفة..
الناس اللي مركبة التكييف هنا..
و انا عربيتي مش مكيفة..و الضفيرة بتاعتها تشهد.
الضفيرة بتاعتها اول فتحة تتعمل فيها انا اللي عملتها لما ركبت كتاوت نور..
كفاءة الموتور بتاعها 85% و ده من الفحص اللي اتعمل ف التوكيل.. قبل ما اشتري..
و ليها ملف صيانات ف التوكيل باسم المالك القديم.. و حاليا في كل الحاجات اللي عملتها مكتوبة بالتواريخ عندي..
العربية فبريكة جوة بس.. لكن رشة برة..و حاليا فيها خبطة في حجم العملة المعدنية في حرف الرفرف اللي قدام شمال..
الكاسيت الاصلي بتاعها و صوته نقي جدا لكن للأسف انا شاريها كده بالكاسيت نفسه بايظ.. بس شغال راديو تمام.. و السماعات صوتها نضيف و نقي جدا..
و مش هتفرق قوي يعني عشان تمن الكاسيت الاصلي الياباني الباناسونيك بتاعها استيراد 300 جنيه.. مش قصة قوي يعني.. و اي كاسيت غير ده مش هيشتغل علي شاشة المعلومات اللي ف التابلوه.. انا موضوع السعر.. انا هاقولك ليه انا طالب كده فيها..
انا شاريها في شهر يناير اللي فات ب 38.5 بالظبط..
اللي اتعمل فيها باسعاره..:
اسطوانة و ديسك لوك الماني اصلي و قواعد موتور.. 1500 جنيه..
العفشة كلها مشدودة بالكامل من اقل من 3 شهور.. بالتفصيل..
4 مساعدين بلشتاين الماني و بيض مقصات و بيض بارات فيبي الماني و بطاحات 1800 جنيه..
و في شهر 7 اللي فات ده في طقم كاوتش بريدجستون ياباني 13 175/70 ب 1350 جنيه..
و علي فكرة.. الواحد كان ممكن يسترخص و يعمل شغل اي كلام..
يعني فردة كاوتش باظت.. غيرت ال4.. مروحتش جيبت واحدة بس.. و جيبت 4 ياباني..
لما مساعد باظ و ضرب زيت مغيرتش واحد بس.. ولا حتي 2.. و مجيبتش استيراد.. لأ جيبت الاصلي و 4.. و هكذا.. يعني مصروف عليها اكتر من 4 الاف جنيه..
يعني العربية مصروف عليها.. و اللي هياخدها بالامانة.. كل اللي هيعمله فيها انه هيغير الكبالن..
و تمنها جديد حوالي 350 جنيه الجوز.. تقريبا.. و بالاتفاق ممكن اعملهم انا كمان..
و كمان 15 الف كم.. المفروض تتغير طلمبة المية و سير الكاتينة و ده ف الصيانة الدورية بتاعتها كل 40 الف كم.. و تمنهم 350 جنيه.. يعني مفيش اي مشاكل..
بس .. دي حالة العربية.. و علي فكرة.. في حاجات من اللي غيرتها لسة سليمة و موجوده عندي ف البيت.. و اللي هياخد العربية هياخدها..
زي ديسك الدبرياج.. و المساعدين الخلفي و بلية مقص....
و ببساطة ممكن ابيع بسهر اقل من كده بس هاشيال الجنوط و الكاوتش ابيعهم.. و اجيب كاوتش تعبان و جنوط حديد.. صح..؟؟ بس انا افضل اني ابيع العربية اغلي شوية بس متعملش فيها اي حاجة.. و كمان في حاجة.. انا عشان كده مش هابيعها ف السوق.. عشان انا عايز اللي هياخدها اكون عارفه.. عشان اتابعها معاه..ولو فيه اي حاجة اقوله يشتري منين.. و يعملها فين..
و يبقي عارف الهيستوري بتاع العربية بالكامل.. و يكون مقدر الشغل و التوضيب اللي معمول فيها..
دي ببساطة اسباب طلبي فيها سعر اعلي من السوق شوية..

**kaboo4** · 23-09-2008 12:09 PM

شكرا على الرد و الاهتمام طبعا الكلام الى بتقولة جميل و اكيد عربيتك تستاهل بس احب اوضح شويت حجات انى بالفعل لقيت عربيات موديل 94 و 95 مكيفة تكيف اصلى هى نزلة بتكيف و تكيف تلاجة على فكرة و الحاجة المشتركة بين العربيات دى انها فيها فتحت سقف و كمان فيها فيها الجونوط الاسبور الاورجينال الى حضرتك بتقول عليها دى بتكون نزلة مع العربية و خصوصا الى فيها فتحت سقف يعنى حضرتك مش مزود حاجة و بالنسبة للكاسيت انا عارف سعرة و شفت بعض السيارات فيها راكب و شغال و فيها الى مركب سى دى بلير و طقم صوت جميل وو الحاللات طبعا متفوتة و مش عايز احلف بس عايز اقولك ان العربية دى بتبداء من 29 لحد 38 انا عارف ان فية فرق كبير فى السعر مهما انت بئى زودت و نضفت مش بتجيب بظبط ممكن تقول ان توبها مش بيزيد عن 38 بظبط ممكن اوضحلك زى ال 127 بصرف النظر عن الامكنيات عربية توبها 15 لو نضيفة اوى لو حد قالك بتعتى ممتازة ب22 حتقولوا ايه متهيئلى اقل واجب تسيبوا و تمشى و انت الكسبان انشلة يكون مركب عربية تانية فيها مشكلتى بئى انى عايز عربية اركبها مش اظبطها بعد كدة اركبها انا مش فاضى انى ااعمل سمكرة او دوكو اخرى خغير سير الكتينة و السيور المهمة و اغير زيت اكتر من كدة مش حعمل كل الى شوفتى الى زى حضرتك محتاج يتغير كبالن و الى مخبوط خبة خفيفة فى الرفرف و الى العربية متجرحة من برة جامد و محتاجة تاخد وش نضافة و الى مستريحتش ليها حسيت ان صحبها اصلا مش مهتم بيها يعنى ممكن تقول انى ممكن اجمع عربية واحدة كاملة من 3 عربيات معلش انا اسف طولت عليك بس دى حكايتى بأمانة مع الكورسا الى بحترمها

**Ahmad Allawy** · 23-09-2008 04:07 PM

كلامك واقعي..
بس هو شوية مايل لكلام سوق السيارات.. اللي هو كلام التجار..
عشان اللي بيتكلم في سعر.. لازم يكون شاف الاول..
انا ساعة ما عرفت بموضوع العربية اللي معايا دي قبل ما اشتري كان الطبيعي ف السوق اصلا 40 و انت طالع.. و انا سمعت 38.5 و مش مكيفة قولت كتير.. عشان التكييف لوحده 3 الاف و شوية..
لكن لما روحت و شوفتها.. غيرت رأيي و ابسط حاجة اني لو مكانش عجبني السعر كنت امشي.. لكن حالة العربية خلتني اخدها.. حتي لو كانت اغلي من توبها الف مثلا..
و اللي قالك ان العربية تكييفها اصلي يبقي مكانش جايبها من التوكيل..
و مكانش بيتعمل لها صيانة ابدا في التوكيل.. لأنها مكانتش نازلة تبع منصور..
ده لو كان كلامه حقيقي اصلا انها نازلة كده..
ممكن يكون تكيف اصلي بس هو شاريه استيراد و مركبه.. يعني مستعمل من الاخر..
عشان مفيش منه جديد علي فكرة..ولا ف التوكيل.. الا لو جابه هيبقي جايبه من المانيا باكتر من 7 الاف جنيه.. و ده مستحيل.. :)
العربية بالفرش الاصلي بتاعها.. و زي الفل و التنجيد معقول جدا .. و الموكيت الاصلي
و كل حاجة ف الصالون بحالتها تقريبا..
و نسيت اقولك ان العربية فيها ايموبلايزر.. (مفتاح مشفر) وده مش موجود غير في موديل 97 بس..ولو علي الكبالن بالاتفاق ممكن اصلحها.
وموضوع الجنوط ابسط حاجة ممكن ابيعهم انا بالكاوتش الجديد.. هيجيبوا فلوس.. و احط مكانهم جنوط حديد و كاوتش تعبان.. و محدش بيبص علي الحاجات دي وهو بيشتري.. و خاصة الكاوتش.. يعني مش هتنزل من تمن عربية عشان الكاوتش تعبان..
وبعدين ابسط حاجة اللي بيشتري عربية بيتي بيبقي مهتم بالهيستوري بتاع العربية..
و الهيستوري بتاع العربية ف التوكيل زي ما قولت لسعاتك.. لحد ما اخدتها انا..
و بعدها كل حاجة عملتها مكتوبة عندي.. بالتواريخ و الكيلومتر ف العداد..
و كمان مواعيد تغيير الزيوت و السيور و التيل و كل حاجة..
يعني العربية حتي مش محتاجة تغير سيور ولا تيل ولا حتي زيت..
وموضوع الكبالن ممكن تستني شوية.. عشان لو كانت حاجة ملحة كنت غيرتها انا..
بس.. لو السعر مش مناسب ليك.. خلاص براحتك طبعا و البيع و الشرا نصيب..
و انامش هابيعها ف السوق ابدا..مستحيل..عشان كده كنت عايز ابيعها لحد اعرفه عشان زي ما قولتلك قبل كده يقدر الكلام ده..
وبعدين هاقولك حاجة.. ان العربية دي لحد شهرين فاتوا كانت بتوصل ل 42 الف جنيه..
انا مش عارف ازاي دلوقتي اخرها 38.. انا مش مقتنع..مش هتنزل 4 الاف جنيه في شهرين..
و انت واضح انك جيبت السعر ده من السعر اللي سمعته من الناس ف السوق.. مش كده..؟؟
خلي بالك برضه ان السوق اللي بيتفرج فيه نسبة كبيرة جدا منهم تجار.. و بيخسفوا بسعر العربية الارض.. يعني الفين بالميت.. لو مكانش اكتر كمان.. عشان يطلع مكسبه هو..
و عشان كده انا قولتلك اني مش هابيع العربية ف السوق..يا اما لو بيعت ابيع بسعر اعلي من اللي هيجيلي ف السوق بالفين علي الاقل..

**fanckoosh** · 24-09-2008 01:47 AM

والله يا احمد بيه لو معاياه المبلغ ده كنت اخدتها على طول يكفى انك شخص محترم بس زى ماكنت قايلك انى عايز فى سعر 35000 بس ده قبل ماعمل حادثة بالعربية بتاعتى وتترمى للكسر والحمد لله بس عموما ربنا ييسرلك الحال ويكرمك وتبيعها ومبروووك مقدما على العربية الجديدة وربنا يباركلك فيها ويكفيك شرها

**Ahmad Allawy** · 24-09-2008 02:41 AM

الف حمد لله عللي سلامتك ودي اهم حاجة..
و فداك العربية.. و الحمد لله انك انت سليم..
و ربنا يكرمك علي دعائك ليا..

**ramyfawzy** · 24-09-2008 05:46 AM

معلش يا بو حميد
هتسمع نفس الكلام ده لو فعلا حبيت تبيع عربيتك
مش مهم انت صرفت قد ايه على عربيتك
المهم فعلا هيه بتعمل كام في السوق
وطبعا منهم لله الجماعة اياهم اللى بوظو السوق وخربوه
تصدق العربية الابيزا اللى كانت معايا (1300 ومكيفة وجنوط بس كوبيه) بيقولولي تستاهل كام؟؟؟؟
25 الف جنيه ؟؟؟؟؟؟؟؟؟؟؟؟؟؟؟؟
بذمتك وانا راضي زمتك واحنا في رمضان
فييييييييييييه ابيزا ب 25 الف ؟؟؟؟؟؟؟؟؟؟
نصيحة ليك يا صديقي ---- ماتبعش العربية وخليك راكبها لحد ما تزهق منها وبعدين ابقى بيعها براحتك
وكمان برضه نصيحة تانية ---- ماتقعدش تقول انا عملت فيها كذا وكذا وصرفت قد كده
عشان للاسف الشديد ماحدش بيقدر الكلام ده
وكل سنة وانت طيب

رامي (ابو احمد و يوسف)

الموضوع: يا جماعة عايز اوبل كورسا 1200 سىسى

LinkBack

أدوات الموضوع

عرض

-

-

-

-

-

المواضيع المتشابهه

opel كورسا موديل 1995 المانى 1200 سىسى فى الاسكندريه

عايز اوبل كورسا هاتش بال 1200

عايز اوبل كورسا هاتش بال 1200

عايز اشترى اوبل كورسا مستعمله و مش عارف انه احسن 1000 سى سى ولا 1200 سى سى

الكلمات الدلالية لهذا الموضوع

المفضلات

المفضلات

ضوابط المشاركة