الموضوع: نويت اشترى الاوبترا ----حد ندمان او ليه تحفظات

المشاركة الأصلية كتبت بواسطة د.عماد صلاح

شوف ياسيدي ...خليك معايا وواحده واحده كده
التقفيل ...ممتاز و احسن من الصني بسنين ضوئيه بل وكمان يوازي البيجو 301 و متكلف عنه و انا شفت الاتنين معايا اوبترا و هجيب للمدام 301
الثبات ....وصلت بيها ل 170 كيلو و العرابيه بتبوس الارض الصراحه ثابته فعلا
الوسع و الراحه ...مريحه جدا في السفر و المسافات الطويله رحت بيها الساحل و دمياط و الصالون الخلفي واسع جدا
التكيف ....ممتاز و انا شاريها 25 7 يعني في عز الحر
البنزين ...من 10 الي 12 و نصف كيلو في اللتر
الفتيس ...ممتاز و استجابته هايله و يسعفك و يتطبع بسواقتك و ناعم جدا
الصاج ....السقف و الكبوت طري جدا بيلب تحت ايدك
الفرامل ..اتحسنت جدا بعد اول 1000 كيلو العربيه عامله 6 الالاف كيلو الوقتي
السحب ...بتاكل معظم العربيات اللي حواليها ولو شغلت زرار الهولد محدش يقف جنبها خالص
الاعتماديه ...العربيه متجربه بتاع 8 سنين و مشاكلها قليله وقطع غيارها متوفره و الميكانيكيه دايسين فيها
اعاده البيع ...سهل و جيد جدا
الشكل الخارجي ....شوف بقي دي اذواق و انا شايفها عربيه وقوره و كلاسيكيه و شكلها بيفرحني ...لكن في ناس في المنتدي بيبني كل كلامه عن العربيه عن وجهه نظره الشخصيه في شكلها اللي يقلك شكل قديم و واحد قبل كده قال عليها شكل منغولي و كلام فاضي كده ...اللي يخلي الكلام ده مالوش وزن هو ان الشكل ده ازواق يعني انا لا احب شكل الهيونداي الجديده رغم ان معظم الناس بتحبها اعمل ايه ذوقي كده فمش واقعي ولا منطقي انك تهاجم عربيه عشان شكلها قديم
الكماليات فقيره جدا مفيش غير الكاسيت السي جي و اماكن تخزين كتيره
يعني عربيه بتاعه خدمه و شقي عربيه تخدمك مش انت اللي تخدمها
وانت نورت المنتدي و ربنا يوفق الجميع

المشاركة الأصلية كتبت بواسطة كابتن أهلاوى

مع احترامى للناس اللى بتقول بيجو او ستروين فالاتنين فاشلين تماما على مستوى الصيانة وقطع الغيار ....حاجتهم باسعار مش طبيعية نااااااااااااااااار بجد ...ومعقدة جدااا فى التصليح ومش اى حد بيصلحها...حد فى دماغك معادلة ديما خليك ماشى عليها...كل مازادت الكماليات والرفاهيات كل مازاد قصادها المقابل اللى بتدفعه فيها فى الصيانة والتصليح والاسعار....الاوبترا فقيرة نسبيا فى الحاجات دى لكن عملية جدا ومناسبة لبلادنا ولطبيعة اقتصادنا جدااا

ليس هناك ما يقال بعد ما قيل من الاساتذة المحترمين
واحب اضيف حاجة
و انا موجود في معرض المصرية بجرين بلازا بسموحة باليكس
وجدت سواقين الشركة جايبين عربيات جديدة وبيحطوها للعمال في الجراج ليتم غسيلها
فسالتهم:
س: انا عايز عربية في حدود ال 120 الف جم وحيران بين التيجو والاوبترا والنيسان والبيجو
اختار ايه؟
ج: السائقين في فم واحد الاوبترا
س:طيب يا جدعان البيجو ال 301
ج: الاوبترا برضه
س: طيب يا جماعة الخير رتبوا العربيات من الافضل للاقل
ج: 1) اوبترا
2) 301
3) نيسان الشكل القديم وبلاش الشكل الجديد نهائي
4) التيجو وبلاش تدخلها في المقارنة اساسا
س: طيب البيجو يا جدعان مالها؟
ج: اركب بيجو 508 او نوع اخر وبلاش ال 301
س: طيب ياجدعان الاوبترا قدمت وليس بيها كماليات والبيجو والنيسان وبتاع
ج:قالوا لي انت بتشتري عربية كاساس قوية ولا بتشتري كماليات ليس ليها اساس
المحصلة
انا استغربت جدا وقتها
وبعد كده بعد ماحجزت النيسان الصني الشكل الجديد غيرت واشتريت الاوبترا الاتوماتيك وانا سعيد جدا وحاسس ان ربنا كرمني بوحش رهيب وغول بياكل العربيات