بسم الله الرحمن الرحيم

ازيكم يا جماعة يارب تكونو بخير ...
من يوم السبت وانا بحاول ارخص تخيلو .. و المرور فية عدم التزام و اهمال و قلة ادب ولا مبالاة و و و و مش هعرف اوصف لان الي حصل ميتوصفش ....
رحت السبت عملت فحص وجهزت الملف وخلصت كل حاجة بس جواب اعتماد الصناعة كان لسة مجاش وروحت وقالولي تعالي بكرة .. رحت الاحد لاقيت الجواب وصل قلت يافرج الله الحمد لله ورحت عشان ارخص وقفت في طابور دة لو اسمة طابور اساسا الناس كلها بتزوق في بعض المهم وقفت من الساعة 9 الصبح للساعة 12 ونص عشان اخد اعتماد جواب الصناعة و اخدتة بعد معاناة وزق وزعيق معا الناس الي بتزوق وكلام معا الموظفين الي سايبين الشغل وبيفطرو ويشربو شاي وسجاير وبعدين رحت اقدم الملف ملاقتش الموظف راح فين يا جدعان اهو الموظف اهو .. لو سمحت عاوز اقدم الملف يقلي ثواني ويمشي ربع ساعة نص ساعة هوة راح فين قالك دة ساب الشغل وروح
طب وبعدين ؟؟ تعالو بكرة ..
رحت الاثنين الي هوة النهاردة الساعة 8 ونص قلت عشان احجز دور بقي فين الموظف قالك واخد اجازة ووقفت في طابور حوالي 20 واحد لحد الساعة 10 لحد ما البهوات ادركو ان الموظف غايب ومفيش مكانة حد وبعتولنا موظف تاني اقل ما يقال عنة ان السلحفاة لو لفت حوالين كوكب الارض هتكون اسرع منة علي مايخلص ملف واحد ..
المهم عدا ساعة و الاستاذ خلصت 4 ملفات وانا واقف وبقول يااااااااارب يا مسهل حلها من عندك يارب ..
بعدين جات واحدة ست وقفت جمبنا قام الموظف واخد منها الورق قام الراجل الي علية الدور قالة انا الي المفروض تاخد ملفي قام الموظف قايل راجل مرة وست مرة قالة بس دي لسة واصلة قالة ماليش دعوة لسة واصلة ولا لا الي قدامي طابور ستات يبقي راجل وست قام الراجل مزعق معا الموظف قام الموظف قايلة انت بتتكلم ازاي كدة وشبط فية وقال والله منا شغال وساب الشباك ومشي عدت ساعة وظابط معدي قلنالة الي حصل راح للموظف يتحايل علية تخيلو ؟؟ اة وربنا يقلة معلش عشان خاطري روح و الموظف والله منا رايح المهم ..
اخدنا بعضنا وطلعنا علي مدير المرور قالنا هبعتلكم ظابط وبعت فعلا بس الظابط معملش حاجة والي حصل انة قالنا خدو ارقام وتعالو بكرة هتدخلو اول ناس ودة الي عملناة ومشينا ولو كنت خلصت امبارح كان زماني مستلم ومرخص
معا العلم اني ماشي من المرور الساعة 1 وربع ... بدون طبعا اي نتيجة
ما علينا بقي من كل دة .. انا الي شفتة في اليومين دول مشفتوش في عمري كلة ..
موظفين حكوميين و 100 خط تحت حكوميين دي بيشتمو الناس و الي يقول يلا يابن ال .... ويلا يابن ال ... ويحصل خناقات بين الناس و الموظف الي واحد قالة ياعم بطل اكل واشتغل ورانا مشاغل قام قايلة طيب عليا الطلاق منا شغال وساب الشغل وروح و الناس مشيت وقلة ادب وبهدلة وعدم احترام وهمجية وبلاوي ..
كل الي اقدر اقولة ياااااااااااارب خرجني من البلد دي علي خير واخلص دراسة واسافر واسيبلهم البلد بالي فيها ....
دعواتكم معايا الله يكرمكم اخلص بكرة بقي الورق عشان اخلص من المشوار الزفت دة و القرف الي انا فية دة