ضوابط ومعاير لسوق المستعمل

**mado_xxx** · 08-12-2013 08:28 PM

السلام عليكم اخوانى فى المنتدى
طبعا كلنا ملاحظين العك والخرط الى موجودين فى سوق المستعمل
بداية من الاشخاص الى بتتعامل معاهم
تلاقى كل واحد لمؤاخذة سرسجى يأجر كشك ويكتبلك عليه مش عارف ايه موتورز ( بيع وشراء واستبدال)
وتدخل المعرض تحس انك داخل فترينة بانجو من طبيعة الاشكال الى موجودة فيه
وطريقة المعاملة

تانى حاجة الاسعار
طبعا حدث ولا حرج عن الاسعار الى بتضرب كاءنك بتضارب فى البورصة
تلاقى العربية سعرها 1 ج يقولك 11ج وتيجى تقوله ازاى ياعم
يقولك ياباشا الاسعار غليت والعجل قليل _- انا بقى بتغاظ من كلمة العجل دى هو احنا فى جنينة- شوف الزيرو بقى بكام دلوقتى
ياعم الحاج انا مالى ومال الزيرو احنا بنتكلم فى مستعمل يعنى حاجة سعرها بيقل مع الوقت
يقوم ميردش عليك
لسة واحد قايلى اباشا الحكومة طلعت قرار وزودت اسعار المستعمل 18%
بصراحة كنت هقواه دى سياسة امك دى يا مزيكا
تقوله خلاص نشوف العربية ... طبعا لو العربية مش عنده لازم تقدم طلب لصاحب العربية عشان تاخد معاد وبعد مايوافق لازم تروح لسيادته تحت بيته .... وطبعا زى مانتوا عارفين اكتر منى بتطلع حاجة غير الى انت عاوزاها اساسا وساعات مبتلاقيهاش عربية

تيجى انت بقى عايز تبيع
اول ماتدخل على سيادته لازم يبص للعربية بقرف
وطبعا لازم يطلعلك القطط الفطسانة حتى لو العربية نازلة من السما
ويقللك فى سعرها الارض
ويرددلك المقولة الشهير
اباشا مفيش احسن من البيعة السهلة يعنى تنزل 1 ولا 2 عشان البيعة تمشى
زطبعا بيقولك كده بعد مايجيبلك سعر العربية تحت الارض
هل ياترى الكلام ده فى مصر بس ولا ى العالم كله
وهل فى ضوابط ممكن الحكومة تاخدها عشان نزبط العك ده

ياريت منكم ياجماعة
كل واحد يقول اقتراحاته

**ahmedteam** · 08-12-2013 08:43 PM

على رأى واحد صديقى : انت فى مصر عايش على مسئوليتك الشخصيه

مفيش ظابط و لا رابط على اى شىء لا تعليم و لا صحه و لا اى شىء

معلش بس كلامك سمع معايا لأنى بسمع نفس الكلام و الالفاظ وكلمه العجل برده

التجار بيغلو الزيرو على مزاجهم فى عربيات متشال منها كل الاوبشنز

و اللى بيتحكم فى سوق المستعمل شويه ناس من اللى انت واصفهم فى كلامك و كل واحد بيحدد السعر على مزاجه و هوا قاعد ع القهوه

الموضوع محتاج حزمه من الضوابط و القوانين واكتر من كده ناس بتراقب و تنفذ ده

و ده شىء صعب يحصل للأسف فى ظل الفوضى اللى عايشين فيها

**mado_xxx** · 08-12-2013 08:46 PM

والله فعلا كل واحد عايش على كف عفريت
وماشيين برحمة ربنا

**velkouf** · 08-12-2013 08:58 PM

ابعد عن شغل المعارض حتى لو كانت اخر عربية فى البلد
كلهم نصابين وحرامية و المحترم فيهم كذاب
كنت ببيع عربيى البيجو فى معرض وقعد يقنعنى انى ادخلها فى 132 وكانت العربية من برة حلوة وشكلها مغرى
وطبعا بتوع المعارض شغلهم كلة بليل
وانا بتفرج على العربية بعتوا كام واحد تبعهم علشان يتفرج وقعدوا يغنوا على بعض قدامى ان العربية حلوة وتستاهل
وفعلا شربت المقلب واخدت العربية
الصبح نزلت اتفرج فى النور لقيت العربية فيها لحامات فى الشاسية
وفى الاخر بعد خناقات وحوارات رجعت العربية بعد خسارة 500 جنية بالعافية واخدت عربيتى

**mado_xxx** · 08-12-2013 09:15 PM

ياراجل
حد يدخل بيجو- الاسطورة- مع 132
ع العموم ربنا يباركلك

**monamize4** · 08-12-2013 09:39 PM

عندك حق فعلا
الواحد بيشوف عربيات اصحابها بيسعروها باسعار غريبة
مبتبقاش عارف دا عبيط و عامل نفسه ناصح و هيبيع بالغالى و لا دا نصاب و بيستعبط

**monamize4** · 09-12-2013 12:32 AM

المشاركة الأصلية كتبت بواسطة mado_xxx

ايه ده
هو الموضوع برضه وصل للصعيد

الطمع لا دين له

**hugan** · 09-12-2013 12:40 AM

المشاركة الأصلية كتبت بواسطة velkouf

ابعد عن شغل المعارض حتى لو كانت اخر عربية فى البلد
كلهم نصابين وحرامية و المحترم فيهم كذاب
كنت ببيع عربيى البيجو فى معرض وقعد يقنعنى انى ادخلها فى 132 وكانت العربية من برة حلوة وشكلها مغرى
وطبعا بتوع المعارض شغلهم كلة بليل
وانا بتفرج على العربية بعتوا كام واحد تبعهم علشان يتفرج وقعدوا يغنوا على بعض قدامى ان العربية حلوة وتستاهل
وفعلا شربت المقلب واخدت العربية
الصبح نزلت اتفرج فى النور لقيت العربية فيها لحامات فى الشاسية
وفى الاخر بعد خناقات وحوارات رجعت العربية بعد خسارة 500 جنية بالعافية واخدت عربيتى

المعارض شغاله ومكسبها مش من البيع
مكسبها من ترجيع العربيات المشمومه اللي بيدبسوا فيها الناس
تعدي علي اي معرض يوميا بالليل تلاقيه فيه خناقه
بين واحد ادبس في عربيه خرده وعايز يرجعها
وبين صاحب العربيه وصاحب الكشك