الموضوع: تقرير اول سفرية بالامجراند

المشاركة الأصلية كتبت بواسطة M I D O

بسم الله الرحمن الرحيم

السلام عليكم جميعا ...
دة اول تقرير ليا بالسفر بالايمي وبقول ( ايمي ) لاني الحمد لله راضي عن العربية ولو مضيقاني في حاجة بقول امجراند
المهم طلعت النهاردة اول سفرية بالامجراند من طنطا للقاهرة ..
المسافة المقطوعة الكلية 239 كيلو بالتمام اقسموهم انتو بقي علي 2 عشان تعرفو رايح كام وراجع كام انا مش فاضي اقسم
طلعت من البيت الساعة 7 ونص الصبح وتوكلت علي الله وشغلت القرأن وقلت يا هادي بسم الله ...
مشيت الاول علي متوسط سرعة من 60 ل 80 وبعدين مطبات كتييييييييييير وبعدين متوسط سرعة من 80 ل 100 وبعدين متوسط سرعة من 40 ل 60 واخر جزء من المسفرية مشيت علي سرعة من 5 ل 10 عشان الطريق كان زحمة اوي بتاع نص ساعة
المهم وصلت الحمد لله بالسلامة و انا راجع الطريق كان مفتوح كنت ماشي علي سرعة من 70 ل 90 و اوقات وصلت ل 110 وبعدين بنزل تاني ل 90 عشان التليين وتقييمي للعربية كالاتي ..
الثبات كويس جدا رغم ان عندي حدفة يمين بسيطة لو سايب الدركسيون انما في الملفات و الفرامل ثبات ممتاز ما شاء الله
ده الكاوتش نوع سىء قدام شويه غيره

السحب علي الاول متوسط علي الثاني جيد جدا علي الثالث جيد جدا علي الرابع جيد جدا علي الخامس ضعيف
الاول طبيعى يبقى كده انت ففترة التليين

العربية سحبها جميل خصوصا في الغيار الثاني و الرابع انما الغيار الخامس تعبان اوي اوي اوي وملحوظ في المطالع و الكباري يعني ببقي طالع الكوبري علي سرعة 90 علي ما اوصل فوق بلاقي نفسي علي سرعة 75 ورجلي ثابتة علي البنزين
الخامس هيفضل كده لان العربيه تقيله و ماتفكرش تسحب عالخامس فمطلع

العزل جميل جدا ما شاء الله وحاجة جميلة في العربية
العفشة ناشفة للاسف وبحس بكل مطب وهبدة في الطريق خصوصا لو علي سرعة بحس اني راكب مراجيح
العزل فعلا حاجه رهيبه و مع الوقت العفشه هتتحسن حتى الكرسى بتاع السواق هيبقى افضل بكتير

المشاكل الي قابلتني في السفرية ..
الكاسيت بيعلق وعملها معايا 3 مرات بيقف خالص ولازم اشغلة من جديد
ده الطبيعى بس مش فكل العربيات لان عندى محصلش ده

اكبر مشكلة بقي اني لما وصلت طنطا بالسلامة ركنت العربية ورحت اشتري اكل وانا راجع لاقيت 3 واحد بموتوسيكل و 2 جمبة وواحد منهم واقف جمب العربية عمال يبص عليها ويبص علي العربية من جوة ويميل راسة كدة وبتاع طبعا انا فهمت انهم حرامية قمت مقرب من العربية وبعدين وقفت شوية قصادهم باصص عليهم وبعدين لفيت رجعت كان في سوبر ماركت في اول الشارع رحت عندة اشتري مية وطبعا عيني عليهم و للاسف الطريق فاضي لحد السوبر ماركت فقلت مينفعش اتكلم معاهم علي اساس اني صاحب العربية وهما 3 وانا لوحدي في الشارع قام بتاع الموتوسيكل ماشي و ساب ال 2 لوحدهم وجم ورايا لحد السوبر ماركت انا اخدت بالي ان واحد منههم جاي ورايا يشوف انا بعمل اية قمت قايل للست لو سمحتي مفيش مية هنا قالتلي شوف في التلاجة الي برة قلتلها شكرا وقمت جايب المية وهما واقفين برة وقمت طالع من المحل دة وواقف فاتح المية شارب بق كدة وما واقفين قصادي و العربية لوحدها في نص الشارع وبعدين قام واحد من ال 2 ماسك صاحبة وقالة يلا وقامو ماشيين انا وقفت 5 ثواني كدة وبعدين مشيت براحة خالص علي الجمب التاني من الشارع بعيد عن العربية خالص خفت حد ييجي من ورايا و المفتاح في جيبي طبعا وماشي عادي وبعدين جيت قصاد العربية بصيت بجمب كدة ملاقتش حد قمت باصص جمب العربية ليكون حد مسخبي ولا حاجة وبعدين يمين وشمال وقمت حاطط ايدي علي المفتاح من فوق جيب البنطلون ودايس فتح العربية وقمت جاري عليها راكب وقافل الباب بسرعة واول ما دخلت قفلت لوك العربية وبعدين اخدت نفسي ودورت ومشيت و امبارح برضو وانا مروح عيال فوق كوبري ماسكيين كرتونة بيض عمالين بيحدفو علي العربيات الي بتعدي وجات عليا واحدة وكان معايا صاحبي قالي شغل المساحة قلتلة لا ياعم هيبوظ الرؤية قالي طيب اقف ننضف قلتلة لا الحركات الوسخة دي انا عارفها حركات سرقة باينة اوي عشان الي يركن ينضف يبقي في ناس مستنية يقومو يقلبوة في العربية وفضلت ماشي لحد ما دخلت وسط البلد وبعدين نزلت نضفت ...
المهم السفرية كانت تمام الحمد لله بس لولا موضوع ولاد الكلب دول كان هيبقي يوم عاملي المهم يا جماعة دعواتكم والنبي ربنا يحفظلي العربية من كل سوء لان الواحد تعب علي ما جابها وكمان قسط دعواتكم ربنا يحفظني ويحفظ كل الناس المحترمين في البلد دي وربنا ينتقم من الناس المؤذيين الي موجودين في الدنيا بس عشان يأذو الناس وينكدو عليهم ومعلش طولت عليكم في الموضوع و التقييم الاجمالي للعربية حتي الاون وقبل صيانة الالف ..
السحب 6/10
الثبات8/10
العزل8/10
العفشة5/10
في المجمل العربية حلوة مش وحشة بس التقييم النهائي ليا هيكون بعد اول سفرية بعد صيانة الالف باذن الله

ربنا يباركلك فيها و يحفظهالك