المرور في كوكب مدينة الاسماعلية الشقيق

**أبو آسر** · 12-12-2013 08:10 PM

بشكل عام مدن ومحافظات الأقاليم أكثر هدوءا وأدبا واحتراما والتزاما من القاهرة اللي أصبحت لا تطاق سواء من الزحام الرهيب الغير مبرر أحيانا أو من أخلاق السائقين اللي أغلبهم بيكونوا وافدين من محافظات تانية وبيؤمنوا جدا بالمثل اللي بيقولك: البلد اللي متعرفش حد فيها @#$% وامشي فيها !! فأصبحت القاهرة زي لا مؤاخذة مقلب الزبالة اللي كل واحد بيروحها يرمي زبالته فيها بالرغم من إن نفس الشخص ده لو رجع بلده أو قريته بتلاقيه حاجة تانية وبيلتزم زي ما الناس ملتزمة لأن الموضوع عامل زي العدوى الكويس بيعدي اللي حواليه والسيء بيعدي اللي حواليه والعدوى في القاهرة سلبية للأسف مش إيجابية
طبعا الكلام ده كقاعدة عامة وكل قاعدة ليها استثناءات لكن مصر كلها كقاعدة عامة برده لو قارنتها ببلاد تانية كتير هتلاقي إن مصر عبارة عن مقلب زبالة كبير بس المرة دي مش الوافدين هما اللي بيرموا فيه ؛ أهل البلد نفسهم هما اللي بيرموا فيه
وإلى الله المشتكى

**Y a r i s** · 12-12-2013 08:31 PM

انا بضم صوتي. لاصواتكم كلكم
وبالفعل اسماعلية وبور سعيد لمن رحتهم اتفاجئت ازاي الناس ملتزمة حتى ايام حسني وكنت حتى ببقى واقف على الاشارة الساعه اتنين بالليل وعاوز اكسرها وهتجنن. ايدي بتاكولني يا اخي بس شايف الناس واقفه. ملتزمة معايا زي زيهم. بكل احترام وادب ... ده بالعكس بقه اقولكم على حاجة نظرة سكان المحافظات لينا كبتوع قاهرة وبالذات ايام مكانت نمر العربية ملاكي جيزة او ملاكي قاهرة. كانو بيبصولك بقررررررررف لمجرد ان عربيتك ملاكي قاهرة او جيزة لانهم عارفين ان بتوع القاهرة معندهمش اي التزام باخلاق المرور او الذوق او الادب الي هيا فنون السواقه ومتستغربش لمن عربية من القاهرة. ماشية في اسكندرية ويفتح الشباك وييقوم مطوح كيس زبالة منووو :) ويمشي عادي ولا كانو عمل حاجة بكل برودة دم مع انو لو بص في مرايت العربية ويتفرج على منظر كيس الزبالة الي اتفرش في الشارع كلو مع الهوى وسرعة العربيات هيلاقي الدنيا بقت فرح وبزرميطة وراه .