السهم دليل ايه .. حلاوتك يا عم سيد

دعوة غريبة جدا في اعلانات التلفزيون كل يوم تدعو الفقراء والبسطاء (بواب / خادمة / سائق تاكسي وغيرهم ) الى المشاركة في البورصة وشراء اسهم ليكونوا اصحاب ملك وكل منهم صاحب مصنع وصاحب بنك كما يقول الاعلان.. والسهم دليل الملكية.. وحلاوتك يا عم سيد

في حين تأتينا الأخبار بانخفاضات حادة في البورصة (سواء المصرية او العالمية)

انا مليش في البورصة وما افهمش فيها انما اللي بيحصل ده مسخرة ... اني ادعو اللي محوش 100 جنيه و1000 جنيه وبالكتير اوي 5000 جنيه انه يحطهم في البورصة



http://www.moheet.com/image/38/225-300/388251.jpg

ادنى مستوى للأسهم المصرية منذ عام ونصف

القاهرة: أنهى مؤشر البورصة المصرية الرئيسي "case 30" تعاملات الأسبوع الثالث من شهر سبتمبر على تراجع حاد بلغت نسبته 13.5% فاقداً أكثر من 1107 نقاط من قيمته في أسبوع ليغلق عند مستوى 7066.21 نقطة هي أدنى قيمة سجلها المؤشر منذ 18شهراً.

هذا هو الفكر الجديد .......................
و حلاوتك ياعم سيد لما تقول ............. ( بيع يا لطفى ).

معاك فيه وجهه نظر حضرتك بس كان ليا سؤال حتى لو معاك فلوس اقل مبلغ ممكن تستثمره فى البورصة هو كام مع العلم انى لا اعلم شئ فى البورصة

فاروق جويده كاتب مقال جامد فى هذا الموضوع فى اهرام الجمعه

بس هي ليه الدعوة دي أصلا؟ انا مستغرباها جدا الصراحة.. و حيث انه ثبت علميا ان الحداية ما بتحدفش كتاكيت - على مقولة أخونا حسام حسن - فأنا بتساءل هايستفيدوا ايه لما البسطاء يشتروا أسهم في شركات و يستثمروها في البورصة؟ :dunno:

:smilielol5::smilielol5:انهم هيلاقو حد يشترى اسهم الشركات اللى وقف حالها اليويمن دول لان مفيش حركه شراء تقريبا الاى فى مجموعه شركات معينه و كبيرة زى فودافون مدينه الانتاج الاعلامى كدة

عاوزين ينفضوا الناس

وقلة قليلة فى البورصه المصريه اللى بتكسب وبتكسب بمئات الملايين وده على حساب الغلابه اللى قالوا نجرب نستثمر فى البورصه

مش لاقيين غير الغلابه

ماهو الناس رجعت تسافر الخليج وتجيب فلوس من هناك بعد ما كانت الحكاية دى اضمحلت فى التسعينات

زى ما اتنفضوا فى التمانينات بمجهودات مخلصة من الريان والسعد

يتنفضوا الأيام دى فى البورصة ، والطعم فى الحالتين هو الطمع فى فايدة اكتر من فايدة البنك

فن النصب من قديم الأزل هو فن يقوم على ان تقدم الضحية المال المنهوب بنفسها الى النصاب وفى 90% من الاحوال يكون ذلك عن طريق طعم يتم القاؤه للضحية يجعلها تطمع فى مكسب كبير لقاء ما تخرجه من مال ، وهى دى اللعبة اللى اتعملت ايام الريان فى التمانينات، وايام تخفيض الدولار ورفع الفايدة على الجنيه فى التسعينات،وايام البورصة النهاردة

الحكايه ان البورصه لما و قعت اليوممييين اللى فاتوا دول كل الناس كانت بتبيع و كان المشترى طبعا ياما العرب او الاجانب بالتالى ملكيه لاسهم و الشركات دى بقت عند الاجانب و العرب و الحكومه خافت من كده غير كده كمان لما كل الناس تبيع فى و قت واحد السوق هايتهدا اسرع ماهو مهدود

عمرى ما شفت حد كسب من البورصة دى!

سمعت بس :)

حد فيكم يعرف حد كسب من البورصة، يعرف.... مش سمع عن حد كسب؟؟!

اقتباس:

---

عمرى ما شفت حد كسب من البورصة دى!

سمعت بس :)

حد فيكم يعرف حد كسب من البورصة، يعرف.... مش سمع عن حد كسب؟؟!

---

أناكسبت مرة في سهم العز لحديد التسليح كنت شاري 100 سهم بسعر 89.77 و بعت على 97.33
و ده كان اعلى سعر تقريباً و صله السهم هو وصل في نفس اليوم 98 تعرف السهم ده بقى بكام
حوالي 29×2 يعني 58 جنيه ( 29× 2 لان السهم حصله عملية انقسام مع زيادة رأس مال الشركة ) الكلام ده كان في أبريل 2008

هما عايزين يلموا الفلوس من الناس الغلابة دى بأى طريقة ممكنة علشان دول مش حايدفعوا ضريبة عقارية و لا ضريبة دخل يعنى بياخدوا دعم و تعليم و صحة مدعمة (وان كانت كلها خدمات رديئة و زبالة ) و مش بيدفعوا حاجة تذكر و معظمهم ناس فكرهم محدود ان مكانوش جهلة مايعرفوش القراة و الكتابة و كلمة انت مالك فى الخرابة دى و انت صاحب البنك او المصنع ده و دليل الملكية و الهجس ده كلة بيزغلل عيون و امخاخ الناس دى فيقوموا يجروا يشتروا الترام او العتبة الخضرا زى اسماعيل ياسين بالظبط .
من الاخر كده البلد دى و حكومتها مستخسرين اى مليم فى جيوب الناس و عيونهم فيه

فعلا يا اخى
حتى الناس اللى فى الدويقة مستخسرين لكل اسرة شقة وبيحطوا كل 3 اسر فى شقة
حد سمع قبل كدا فى العالم 3 اسر تعيش فى شقة
على اساس ان الشقة 3 حجرات
يعنى الاب والام والاولاد فى غرفى 3 فى 3 متر بالكتيير
وحمام ومطبخ مشترك
فى شفة لا تتجاوز فى احسن الاحوالى ال 65 متر
بينما الاراضى تعطى هبات ونفحات مجانية لكبار البلد
والسيارات تعطى من التوكيلات هدايا للوزراء
وفى الاخر زعلانيين ان الناس شمتت من حريق الشورى!

لا حول ولا قوة الا بالله

من فترة قال لى رئيسى فى العمل عن البورصة
انها ما هى الا وعاء كبير نضع فيه البسطاء و الطامحين الى المكسب السهل المزين بالورود و اللى معاهم بالعافية ثمن ما اشتروه من اسهم
يلموا دوول كلهم و يعصرونهم عصرا و يصفونهم تصفية:beatdeadhorse5::beatdeadhorse5:
لكى يشرب العصير المصفى المقطر الكبار بتوع البورصة "الكبار بجد"
مش كل واحد معاه قرشين تعريفة مليم و يشترى كام سهم و يقولك انا بضارب فى البورصة و مشغل فلوسى فيها
حاجة تحزن بجد

اقتباس:

---

المشاركة الأصلية كتبت بواسطة hoko_mosha

معاك فيه وجهه نظر حضرتك بس كان ليا سؤال حتى لو معاك فلوس اقل مبلغ ممكن تستثمره فى البورصة هو كام مع العلم انى لا اعلم شئ فى البورصة

---

لا يوجد حد ادنى للاستثمار في البورصة .. ولكن بعض الشركات تشترط حد ادنى لتكوين محفظة بيكون 10000 في بعض الشركات ويصل الى 50000 في شركات اخرى ..
ولكن من خبرتي اقولك ان اقل مبلغ ممكن تتعامل فيه هو 10000 عشان تعرف تتحرك كويس ..

اقتباس:

---

المشاركة الأصلية كتبت بواسطة محمد عز

عاوزين ينفضوا الناس
وقلة قليلة فى البورصه المصريه اللى بتكسب وبتكسب بمئات الملايين

---

اقتباس:

---

المشاركة الأصلية كتبت بواسطة GoldenManEye

عمرى ما شفت حد كسب من البورصة دى!
سمعت بس :)
حد فيكم يعرف حد كسب من البورصة، يعرف.... مش سمع عن حد كسب؟؟!

---

والله الموضوع مش كده خالص .. ياما كسبت وياما خسرت برضه ..
اهم حاجة في الموضوع : الوعي - العلم - الصبر
وعشان كده موضوع دخول البسطاء(البوابين والسواقين) في البورصة انا شابفة انه كااااارثة ..
عشان الناس دي معندهاش وعي ولا علم واكتر حاجة يعرفوها ان " السهم دليل الملكية " و " سهم في الايد انت مالك ومستفيد" :clown:
ولو حد فيهم السهم نزل بيه تاني يوم .. هيجري يبيع عشان يلحق نفسه من الخسارة (وهو مش فاهم حاجة ) وفيه ناس مستنية هتلقط منه اسهمه برخص التراب ..
والموضوع مش ناقص اصلا جهل وبيع عشوائي ..

لو حبيت ابسط الموضوع شوية عشان اللي ملوش في البورصة .. هقول :
عارفين لعبة الاستميشن بتاعت الكوتشينة ..
انت لو بتلعب مع حد ملوش فيها .. هيلعب غلط والعك اللي هيعمله مش هيخسر نفسه بس .. لا هيخسر اللي حواليه كمان ويبوظ الدور ..:ANSmile05:
وهي بايظة بايظة مش ناقصة ..

اقتباس:

---

المشاركة الأصلية كتبت بواسطة Ramytoyota

الحكايه ان البورصه لما و قعت اليوممييين اللى فاتوا دول كل الناس كانت بتبيع و كان المشترى طبعا ياما العرب او الاجانب بالتالى ملكيه لاسهم و الشركات دى بقت عند الاجانب و العرب و الحكومه خافت من كده غير كده كمان لما كل الناس تبيع فى و قت واحد السوق هايتهدا اسرع ماهو مهدود

---

ياريت العرب والاجانب يشتروا .. مكانتش وقعت كده
دول بقالهم 4 شهور بيبيعوا ..
ربنا يستر ..

متابع باهتمام

للمهتمين .. باب خاص
تابعونا ........

http://www.nilemotors.net/Nile/showthread.php?t=40261

اقتباس:

---

المشاركة الأصلية كتبت بواسطة Miss_Pharma

لو حبيت ابسط الموضوع شوية عشان اللي ملوش في البورصة .. هقول :
عارفين لعبة الاستميشن بتاعت الكوتشينة ..
انت لو بتلعب مع حد ملوش فيها .. هيلعب غلط والعك اللي هيعمله مش هيخسر نفسه بس .. لا هيخسر اللي حواليه كمان ويبوظ الدور ..:ANSmile05:
وهي بايظة بايظة مش ناقصة ..

---

و الله العظيم انتي زي الفل اول مره اشوف بنت بتعرف استميشن و الله بجد احييكي لأنها لعبه جامده بتحتاج تركيز و حسابات متغيره طول فتره اللعب
ده غير اني بشكرك مره تانيه علي اهتمامك انك تشاركينا علمك في مجال البورصه و ربنا يوفقك

اقتباس:

---

المشاركة الأصلية كتبت بواسطة GoldenManEye

عمرى ما شفت حد كسب من البورصة دى!

سمعت بس :)

حد فيكم يعرف حد كسب من البورصة، يعرف.... مش سمع عن حد كسب؟؟!

---

والله انا دايما بقول كده لكل معارفي
لأن فعلا احنا بنفخم المسائل
لو واحد كسب من 100 واحد
يقولك ده البورصه بتكسب والناس تتجن وتتهبل وتجري عليها
مع ان فيه 99 واحد خسروا

ولكن نقول ايه على ضعف النفوس

ربنا يعافينا ويعفو عنا