الموضوع: عايز اشتري فيكترا بدل الاسترا

المشاركة الأصلية كتبت بواسطة medo111

ازيكم يا جماعه يا رب تكونو بخير في البرد دا
الموضوع وما فيه ان انا عايز اغير العربيه وممكن علي تمن العربيه الي معايا دي اكمل ل 100 الف لكن في نفس الوقت عايز حاجه قطع غيارها رخيصه زي عربيتي وتكون ثابته زي الاوبل عموما يعني مش هروح اجيب عربيه قطع غيارها رخيصه زي الهيونداي وفي نفس الوقت اخسر حاجات تانيه ومحتار

ومش عايز اجيب الاسترا الي بعدها عشان انا عايز اتوماتيك فا فكرت في الفيكترا ال بي 2 ال 2000 سي سي لان عايز ابعد بردو عن الايكوتيك وعايز بردو اداء متور عالي يبقي مفيش قدامي غير ال2000 سي سي فا انا محتار فا يا ريت تفكرو معايا وتنصحوني
وياريت بالاخص محمود (maam) يفيدني لان كان معاه استرا وبعدها جاب فيكترا

هل يا حوده انا هزعل ؟ انا عايزك تحط في دماغك كماليات الاسترا وانها عمرها ما مسكت حراره معايا لا في صيف ولا غيرو والتكيف بتاعها زي الفل انت عارف طبعا الحاجات دي

لو حد عندو اي اقتراح او عربيه تانيه يا ريت يفيدني

انا حاسس اني متلغبط شوية من كلامك
الفيكترا بي 2 2000cc بتكون ايكوتك
الفيكترا بي1 هي اب موتورها مش ايكوتك سواء 1600 او 2000

بس الي انا مش فاهمة ازااي حضرتك مش عايز تجييب استراh عشان ات عايز اوتومااتيك وهيا فيها فتيس اوتو
النقطة التانية ليه حضرتك عايز تبعد عن الايكوتك دة موتور زي الفل ومفيهوش مشاكل ولا بيجيب كنترولات ولا بسخن ولا الكلام الي بيتقاال دة خالص ماشاء الله عليييه

هى استرا اتش فى منها مانويل ولا منزلتش غير ايزى ترونك

المشاركة الأصلية كتبت بواسطة maam

انت فين يا أيمن باشا ، بعتلك على الواتس اب ، عايزين نطمئن عليك انك وصلت بالسلامة

ميدو ، انت قدام أمرين
1- كماليات ودلع وعفشة ناعمة وصالون واسع للراكب الأمامي والخلفي وثبات مرضي الى حد ما
2- ثبات عالي جدا على الطريق وعربية شيك جدا من برا وجاهزة للتعديل مع نقص الكماليات والدلع والتقفيل المعفن وطابلوه موديل 1860 وعفشة هاتكرهك في حياتك وصالون ضيق جدا للراكب الأمامي (ركبك ضاربة في الطابلوه) والراكب الخلفي

- لو لازم ولابد من الفيكترا ، ماتفكرش غير في cdx ، فرش جلد محترم ماشوفتش زيه لغاية دلوقتي + طابلوه شيك + كماليات ودلع أحسن من الأسترا

- خلاصتي مع الفيكترا المانيوال ، بقيت بكره اليوم اللي انزل فيه بالعربية نظرا للمنقطة اللي ساكن فيها

هو حضرتك الوصف السئ ده عن الفكيترا
لو اه ممكن اعرف لييه
انا معايا فيكترا ومش حاسس بالكلام دة

المشاركة الأصلية كتبت بواسطة maam

ديه وجهة نظري يا محمود بيه ، دا مش فرض رأي على الناس
وبالرغم من كدا دا لا يمنع ان الفيكترا عفشتها ناشفة ، وخامة فرش الأبواب بالصالون سيئة جدا وانها ضيقة جدا من ورا
وياريت ماتجيش تقولي زي المرة اللي فاتت انك مجربتش تركب ورا فمعندكش فكرة هي ضيقة ولا لأ :)

انا كنت حابب اعرف ليييه وجهة النظر السيئة دي اتكونت عند حضرتك مش اكتر عشان انا قليل اوي لما بشووف حد بيعيب علي العربية دي

ولو جينا للحق وبالمناسبة انا اقر واعترف انها ضيقة من ورا عشان لسة كنا راجعيين من السفر امبارح وكنت راكب ورا ومكنتش سايق وفعلا حسييت انها ضيقة وكنا 3 اشخااص شباب وكل واحد لابس كتيير وبالطوهات وكدة وحسييت فعلا بضيق الكنبة الخلفيية مقارنة باللانسر مثلا

يمكن انا عندي التقفييل افضل عشان عربيتي اوروبي مش عارف هل بيفرق عن المصري ولا لا بس في كل الاحوال هو مرضي بالنسبالي وفرش الباب قطيفة ناعم جدا ومفيهوش بلاستيك غير قليل