الفرامل و الكارثة المروعة

**r0xer** · 20-09-2008 09:31 PM

الحمد لله على كل حال و قدر الله وماشاء فعل.

إمبارح بعد ما كنت في عز فرحتي الموضوع قلب بغم..

كان معايا فيرنا "مش عربيتي" وهي عربية صديقي المقرب جدا وهو سايبهالي لأنه سافر من أسبوع ونص كدا عشان العمرة و إمبارح كان هو و أخوه معايا و فضلنا نأمرك بالعربية و نخمس قبل الفطار "في منطقة مهجورة تماما في المنوفية"

ولكن فجأة!! وبعد الإنتهاء من اللعب والشقلباظات أكتشفت إن الفرامل مبقتش زي الأول !

1- حاسس إنها الدواسة بقت بتحتاج إنها تنزل لتحت أكثر عشان تبدأ تفرمل؟

2- مبقتش تقف زي الأول بسرعة في الحالات المفاجئة.

3- الكارثة المروعة بقا هي إني كنت هخبط عربية تانية إلنترا في إشارة هناك أثناء توجهي للمنزل و لكن الحمد لله الخسائر كانت في طاستين الجنب الشمال . وللأسف عسكري المرور غبي ومقدرش يفهم إن المشكلة من الفرامل مش مني.

4- الفرامل كانت بتصفر شوية كدا إمبارح..؟ يعني مش زي المعتاد . الكاوتش كان بيعمل صوت كأنه صوت تفحيط أو فرامل مفاجئة

5- الشيء الغريب جدا هو إن العربية بتهدي كويس!! يعني لما بحب أهدي العربية بتهدي كويس جدا لكن المشكلة فيها في الوقوف تماما!

ياريت ياجماعة تنصحوني أعمل أيه و أوديها لمين؟ و غالبا هتكون فيها أيه ؟

العربية عاملة 8900 كيلو. وهي موديل 2007 و أنا حاليا في أرض الوطن "شبرا" روحت بيها إمبارح على الطريق الزراعي (عارف إنه غلط و إستهتار بس الحمد لله ربنا ستر) و النهاردة الصبح أخدتها وحاولت اجربها ولاقيت إن الوضع أحسن من إمبارح معرفش إزاي!! لكن طبعا مش الطبيعي لا..

أرجو النصيحة وشكراً لكم لأن دي أمانة و مش هقدر أسلمهاله غير لما تكون زي ماكانت.

**r0xer** · 20-09-2008 11:21 PM

أي تعليق طيب ياباشمهندزين ؟ عايز أوديها الصبح فياريت نصايحكم.؟

**shoudy2005** · 21-09-2008 01:24 AM

انت بتقول بتحمس يبقى اكيد كنت بتشد الهاند و انت ماشى يبقى التيل اللى ورا اتاكل ده كل اللى اقدر افيدك بيه

**ahmedsrs** · 21-09-2008 01:27 AM

لو الدواسة بتاعت الفرامل ساعات تبقى عالية وساعات متلقيش فرامل يبقى الماستر ضرب لو فى تصفير جامد مع الفرامل يبقى فى مشكلة فى التيل لو بصيت على الأربع عجلات ولقيت عجلة غرقانة زيت من جوة والزيت ناقص يبقى كليبر او مكبس ضرب وبيسرب زيت ومبيمسكش لو فيه صوت تنفيس والفرامل محجرة يبقى عمت السرفو ضربت

**r0xer** · 21-09-2008 02:13 AM

لا مفيش أي زيت نازل على الأربع فرد و الفرامل مش محجرة. وفي فرامل ولكن زي ماقلت لما بحتاج وضع الوقوف تماما بحس ببطئ شوية عن الأول.

وفي تصفير فعلا ولكن مش بإستمرار....يعني أحيانا وأحيانا لا.

طيب لو رحت بيها للميكانيكي هل هيعرف التيل بايظ ولالا ولا لازم اوديها التوكيل عشان يرفعوها وكدا؟

ومتشكر جدا يا أستاذ أحمد ليك.

**nobody** · 21-09-2008 02:18 AM

رجلش الفرامل اللي ورا

و متبقاش تفحط بالعربية تاني

**Ahmed Anwer** · 21-09-2008 02:23 AM

من كلامك كده الفرامل شغاله بس العربية بتتزحلق و تصفر

فممكن يكون الكاوتش اتاكل و نعم او الزوايا بتاعته اتلخبطت شوية

فميدئيا ممكن تعملها ضبط زوايا و ترصيص

و الله اعلم

**osamaelbaz** · 21-09-2008 02:54 AM

اولا مكنشى ينفع تعمل كدة فى عربية واحد امنك عليها انت لازم تروح التوكيل تظبطها وتشوف العيب فى اية وحاول تحافظ عليها وإن شاء الله بسيطة

**Ahmed Hassan** · 21-09-2008 03:15 AM

زي ما الاخوه قالولك... التيل ورا اتاكل... فمشوار الفرامل اصبح اطول شويه.. روح رجلش التيل الخلفي... و ممكن برضو تبص على ضغط الكاوتش و الزوايا علشان علشان موضوع صوت العجل.