المشاكل التى قد تواجهك فى اسبيرانزا 516 !!!

**Eng_Ahmed_Hamdy** · 20-09-2008 10:25 PM

السلام عليكم و رحمة الله و بركاته
بصراحة انا اول ما دخلت منتدى الاسبيرنزا دورت على موضوع يخص المشاكل و العيوب اللى قابلت ملاك العربية A516 لكن ما لقتش موضوع محدد بيتكلم عن كده ..... كنت بشوف فى بعض ردود من الاخوة الاعضاء شوية مشاكل كده بس للاسف مفيش موضوع يجمع المشاكل ديه كلها فى مكان واحد .... اولا عشان نقدر نفيد بعضنا لعل و عسى يكون حل مشكلة واحد عند واحد تانى و حاجة تانية و هى الاهم عشان نقدر نفيد الناس اللى عاوزة تشترى A516 تبقه برده عندها خلفية عن ايه المشاكل اللى ممكن تقابلهم ادام و اذا كانت هذه المشاكل ممكن يتغاضوا عنها او سهلة الحل فتخليهم يجيبوا العربية او يصرفوا نظر عنها ..........
المهم كل الموضوع ده عشان الناس الحلوة اللى معاها A516 تخش هنا و تقول ايه المشاكل اللى قابلتها فى العربية و حلتها ازاى .... بس كده

**Eng_Ahmed_Hamdy** · 21-09-2008 10:00 PM

طب تمام الحمد لله انا سعيد جدا ان محدش رد عالموضوع .....
لان معنى كده ان العربية ديه مفيهاش عيوب ....... يعنى عربية بالسعر ده و كمان مفيهاش اى مشاكل يبقه هيه ديه فعلا الصفقة الرابحة

**osamahalem** · 23-09-2008 06:09 PM

بلاش تتسرع يا اخى العزيز وعاوز الفت نظر حضرتك لنقاط مهمة جدا وهى اولا ان العربية جديدة لسة يعنى مش منتظر تظهر عيوب جسيمة قبل سنتين تلاتة عالاقل الا لو كنت بتتكلم عن عربية لعبة ثانيا لو اى واحد من ملاك العربية ظهر عندة عيب كبير او حتى صغير مبيكونش عاوز يتكلم علية لعدة اسباب اولها ان اكيد ناس نصحتة يبعد عن الصينى بس هو نشف دماغة فلو اتكلم هيقلولو مش قلنالك ويشتغلوة وانت فاهم ثانيا مش عاوز يعمل سمعة وحشة للعربية علشان تنتشر والقطع بتاعتها تتوفر وترخص ولو فكر يبيع يلاقى حد يشترى وانزل حضرتك لاسواق العربيات وشوف كمية الصينى موديلات 2007 و2008 المعروض للبيع اما رأيى الشخصى فكل تجربة جديدة يلزمها مجموعة من المغامرين او الفدائيين اللى يستكشفو معالم هذا المجهول ودول اللى اشترو العربية لمختلف الاسباب اما تكون الفلوس ملهاش قيمة كبيرة عندهم ومش بالمعنى السلبى ولكن بمعنى ان التجربة والمغامرة عندهم اغلى من الفلوس واما يكونو جربو المستعمل وقرفو منه ومتوفقوش لمستعمل بحاله جيدة فقررو يجيبو زيرو ولو حتى صينى بس ارحم من قرف المستعمل ونصب السماسرة بتوع المستعمل لأن مش اى حد يقدر يسلك فى سوق العربيات ويعرف يشترى عربية مستعمله بحاله جيدة اما احنا يعنى المستهلك المصرى العادى اللى معاه عربية موديل قديم فما علينا الا اننا نراقب الموقف من بعيد لبعيد ونشوف اخوانا اللى غامرو واشترو هيكون مصيرهم ايه ان نجحت التجربة تبقى حاجة كويسة ونشاركهم ونشترى زيهم وان فشلت العربيات يبقى يا دار ما دخلك شر وادينا راكبين اربعة وعشرين قيراط وربنا يعوض عليهم ونقلب صفحة الصينى ونبتدى نجرب العربيات الموزمبيقى اللى عليها الدور فى السوق المصرى

**Eng_Ahmed_Hamdy** · 24-09-2008 04:28 AM

شكرا لردك يا استاذ اسامه .... بصراحة كلامك منطقى فعلا
بس ديه هتبقه مشكلة لو الناس اللى معاهم اسبيرانزا مكنش عندهم الجرأة انهم يتكلموا عن العربية .... لان كده فيه ناس كتير هتلبس بسبب الموضوع ده
مع ان فى منتدى بروتون مثلا مفصصين العربية مميزات و عيوب ... يعنى الواحد بيبقه عارف ايه عيوب العربية قبل ما يشتريها و بيبقه راضى بيها.
عموما ربنا يسهل انا لسه محتار بين الافيو و الاسبيرانزا بس الصراحة عشان مبقاش كداب انا مايل ناحية الاسبيرانزا شوية عشان سعرها و عشان انا كل اللى عايزه من العربية اداء كويس عشان سفرى كل يوم و موضوع الاوبشن ده مش حاجة مهمة اوى عندى !!!!!!!!

**MIDO_20071** · 27-09-2008 03:21 AM

لا المشكله الاكبر ان ملاك الاسبيرانزا مبيتكلموش في المنتدى بتاعهم اصلا

ليه؟؟؟؟

لسببين

اولهم هم ليهم نادي خاص بيهم بيتكلموا عليه وممكن تعرف كل كبيره وصغيره عن الاسبيرانزا منه

ثانيا كثره الرد على المشككين ارهقتهم

فالرد الوحيد هوه الرد العملي

شوف عدد a516 في الشارع وانت تعرف مين هما اللي بينشفو دماغهم ومبيسمعوش كلام
العباقره والفلاسفه!!

والله كل مابفتكر كانوا بيقولولي ايه اقول ربنا يسامحهم

**Eng_Ahmed_Hamdy** · 27-09-2008 06:48 AM

بتقول لمين ربنا يسامحهم .... المشككين ولا اصحاب الاسبيرانزا !!!

و صحيح همه كانوا بيقولولك ايه !!

**MIDO_20071** · 27-09-2008 08:40 PM

أكيد للمشككين

نفس الكلام اللي انت بتسمعه دلوقتي D:

**shanodaa** · 27-09-2008 10:29 PM

يا جماعه مش كل الصيني وحش طلما السياره ليها وكيل محترم يبقي لا توجد مشاكل المشاكل في السيارات مجهوله المصدر والوكيل بيهرب بسرعه بعد ما ضحك علي الناس
وانا شايف ان ابو الفتوح راجل محترم