الموضوع: خروج ال 504 من خدمة التاكسي في مصر

يا جماعة اللى شايف ان مصر مش مقامها 504 و المفروض تبقى حاجة انضف, معلش بقى مصر مقامها توك توك و هو ده اخرها بصراحة لو عايز تنضفها يبقى فيه حاجات تانية كتير اهم من التاكسى و البلاد اللى فيها مرسيدس 2008 تاكسى شوف متوسط دخل الفرد فيها كام

يا جماعة انا عارف ان اغلب الناس هنا من القاهرة و اصحاب عربيات نضيفة و ده معناه انكوا ساكنين فى الزمالك و الدقى وكده يعنى بس القانون ده نزل عشان يتطبق فى مصر كلها و المفروض نعمل حساب الاغلبية المطحونة و نشوف شوارعها و سككها حد فيكم راح شاف سكك بلاد زى مشلا و لا العوايشة و بلاش نقول اسامى كفور حد شاف شوارع قلعة الصناعة المصرية (المحلة الكبرى) بقالها كام سنة ما ينفعش يمشى فيها دبابة و لما بتوع التاكسى هناك كلهم يقلبوا زيرو-حاليا مازدا 929 و تويوتا كرسيدا موديلات قديمة شبه الدبابة- مش هيرضوا يمشوا فى نص شوارعها و فيه بلاد العربيات الاجرة بتاعتها اسمها واز او سكودا او فورد او دودج موديلات خمسينات و ستينات و المفروض انها تتكهن و نجيب مكروباصات زيرو نمشيها فى السكك دى

طيب ما حدش فكر فى الناس اصحاب العربيات الاجرة فى السكك دى ده الاجرة على السكك دى بتبقى 15 او 20 قرش هيدفع قسط عربية بربع مليون ازاى و بعدين لما يجيبها و يمشيها 5 سنين على طريق زى الزفت و تتدغدغ منه و ينتهى عمرها الافتراضى و ييجى يبيعها تجيبله كام من الربع مليون اللى دفعهم مش خسارة فى رؤوس الاموال المتداولة فى البلد

زى بالظبط المثلث و الشنطة و خلاص دول لو اتحطوا فى العربية الطريق هينور و ينضف لوحده و فى الاخر هى حسابات شخصية

و بعدين لو كان سواق التاكسى البيجو بيتنطط على الراكب و يدفعه 20% زيادة عشان بيجو امال هيدفعه كام زيادة لو راكب فيرنا و لا ماتركس

و بعدين موضوع العربيات اللى بتدخن دى ملهاش علاقة بموديل العربية
انا شفت عربية لانوس تاكسى اجرة غربية كانت زى اللى طالعة من بق كلب و على فكرة اتفرج على سواقين التاكسى كل 5 سنين هيكهنوا عربية لان كل الجديد ما يستحملش زى القديم (و ربما يكون هو ده المطلوب بالنسبة لناس معينة غبور مثلا)

و فيه حاجة تانية مهمة دلوقت كل التاكسى هيتقلب ملاكى و النمر هتتحط على عربيات زيرو طيب هى الشوارع مستحملة الزيادة الطبيعية فى عدد العربيات لما تيجى تضخ فيها مرة واحدة شوف كام مليون عربية زيادة

و قبل ما نقول العربية دى بتعطل و لا بتدخن نضف الشوارع و نورها
هو ايه السبب اكتر فى الحوادث عربيات بايظة و لا طرق ضلمة و فيها مطبات بدون علامات

و الدليل ان العيب مش فى العربيات ان قطع غيار 504 و فيات بييجى استعمال الخارج بقاله 20 و 25 سنة شغال و بيبقى سليم و بنركبه احنا هنا فى العربيات بتاعتنا و يشتغل 5 سنين بدون مشاكل يعنى لو كانت العربيات دى باظت فهى باظت من شوارعنا

و الله انا بشوف عربيات اجرة 504 تشوفها تقول زيرو و عايزين يكهنوها طيب بكرة نشوف اللانوس و الهونداى هيعمل ايه فى شوارعنا الجميلة

يا باشا دى حسابات خاصة لتنشيط بيع السيارات و حاجات تانية يمكن مش واضحة لينا دلوقت

و بعدين ايه اللى حصل مع موضوع الاحلال غير اسعار العربيات اللى نزلت فى الارض بعد ما كنت ابيع عربيتى تجيب على الاقل 15 الف دلوقت تعمل 7 او 8 هو ده مش اهدار لمدخرات الناس و استثماراتهم فى عربياتهم

زى بالظبط ال 18 مليار جنيه اللى راحوا حرقوهم بدعوى انفلونزا الطيور بسبب رعب كاذب و اهم دلوقت بيقولوا ده بقى مرض متوطن و رغم كده لا بيحرقوا الفراخ و لا بيمنعوا بيعها و حتى الناس ما عادتش خايفة زى الاول هى انفلونزا الطيور بتاعة دلوقت غير بتاعة الاول ايام حرق الفراخ

كل دى حسابات شخصية و غيرها و غيرها كتير و احنا لا حول لنا و لا قوة
يعنى ايه اللى خلى هشام طلعت مصطفى مرة واحدة وحش و كخة ما كان حلو و بياخد اراضى ببلاش و مرافق بمليارات ببلاش (حسابات شخصية مع واحد اكبر منه) و غيره كتير بس ده اللى جاى على بالى دلوقت

معلش انا عارف انى طلعت من موضوع النقاش الاصلى بس الواحد و هو بيكتب الافكار بتجيب بعضها و الواحد دمه بيتحرق و ما بيعرفش يمسك نفسه

معلش و الله هو الافكار بتجيب بعضها و بعدين متهيالى ان كل كلامى واقعى

موضوع جميل يا باشا بس انا شايف ان كان مضمونه يتغير ل تكهين الاجرة بصفة عامة , انا عارف ان البيجو احسن ما فيهم بس عشان يبقى موضوع عام