اللى بيحصلى داه نحس ولا حسد

**amz2011** · 22-12-2013 12:37 PM

اول يوم فى شهر 12 ابويا خد منى العربيه و راح بيها مشوار و ركن العربيه فى الشارع و نزل لقى تروسيكل خبط الباب الخلفى و الباب اتفخس و الناس هما اللى قالولوا ان تروسيكل هو اللى خبط العربيه المهم قولت قدر الله و ما شاء فعل .

مفيش اربعه ايام ركنت العربيه تحت البيت فى الشارع و على الساعه 12 الظهر مراتى اتصلت بيا بتقولى البواب بيقول ان العربيه اتخبطت جامد .انا ساعتها كنت فى الشغل المهم نزلت لاقيت الاكصدام متفترتك ميت حته و فوانيس الشبوره متكسره و الفانوس الرئيسى قاعده من القواعد بتاعته اتكسرت المهم كانت بتعيط و مخضوضه المهم قولتها اطلعى و سيبها لحد لما ارجع و كان الحدوته ان العربيه نص نقل حدفت على توكتوك و التوكتوك كان بيعدى من على اليمن راح داخل فى العربيه وكسرها و التوتوك باظ و صاحب التوكتوك و صاحب النقل رفعو على بعض مطاوى و قولنا ربنا يخلف لنا

مفيش بعدها ب خمس ايام كنت ماشى انا و مرتى و اولادى و فجاءه عربيه ماشيه فى الطريق المقابل داست على زلطه الزلط كانت هتخرم دماغى بس ربنا ستر و جت فى الزجاج اللى جمبى طبعا اتكسر ميت حته و رحت ركبت غيره و بعدها باربع ايام وقع تانى اتارى الرجل ما لازقش الزجاج كويس.

و بعد الزجاج بخمس ايام اللى هو امبارح كنت راجع من دمياط و مشيت من طريق طلخا - المنصوره - بنها - و اسكندريه الزراعى و كان الطريق واقف خالص و ببص على العداد لقيت الحراره عند الخط الاحمر ركنت العربيه و ببص لقيت الردياتير بينقط من عند الحته الباغ السفليه
طبعا اتذليت ذل عشان الطريق كان واقف و الميه بتخلص منى و العربيه بتسخن مشيت من بيتى الساعه سبعه الصبح رجعت الساعه 10 بليل من اللى حصلى المهم الباغه بتاعة الردياتير بتتباع فين و بكام ولا اشترى رداتير جديد و لا استيراد و اشترى قميص نحاس بدل الفيبر و لا اعمل يه بالاضافه اللى انا فيه نحس ولا حسد مع العلم انا مطلع فلوس الزكاة كلها

اريدو حلا...............

**beshoyyy** · 22-12-2013 12:49 PM

تحياتي
بجد ربنا معاك
اهم حاجة انك بخير و العائلة بخير
ربنا يعوضك

**amr011111** · 22-12-2013 12:50 PM

بالنسبه للمشاكل بتاعة خبط العربيه الافضل ليك تودى العربيه فى جراج وتريح دماغك

**john55** · 22-12-2013 01:03 PM

المشاركة الأصلية كتبت بواسطة amr011111

بالنسبه للمشاكل بتاعة خبط العربيه الافضل ليك تودى العربيه فى جراج وتريح دماغك

**abohend** · 22-12-2013 01:13 PM

الموضوع يا أخي بسيط جدا
هما حلين متلازمين لازم تنفذهم مع بعض
أولا:
العين و الحسد حق و مذكورين في القرآن و السنة
يبقى لازم ترقي نفسك و أهل بيتك
ثانيا:
الأخذ بالأسباب
و ده وضحه الزملاء (تركن فجراج-تركن فأماكن كويسة بعيد عن الطريق-و هكذا)

لأن لو الموضوع جراج و بس يبقى ممكن تتخبط و أنت ماشي زي موضوع الزلطة
ممكن تتخبط و أنت راكن بتعمل أي مشوار
ممكن تتخبط و هي فالجراج
ممكن و ممكن و ممكن

و الحمد لله جت فحديد و ربنا حفظك و أهلك
تصدق و أكثر من ذكر الله و متنساش المداومة على أذكار الصباح و المساء و ربك الحافظ

**speranz** · 22-12-2013 01:14 PM

شغل قرأن فى العربية يا باشا
وشوفلها ركنة بعيد عن الطريق
وربنا هيحمهالك ان شاء الله
محدش بقا بيشوف حاجة فى ايد حد ويسمى الله
الحسد عادى جدا

**Mohamed.Hany** · 22-12-2013 01:56 PM

الهجرة هي الحل !
ده اللي انا توصلت لييه بعد تفكير عميق في بلدنا الجميلة اللي يخبطك فيها تكتك و يشتمك واحد ماشي عكسي عشان بس بتطالب بحقك انك تمشي في حارتك و يوسعلك الطريق و ميكروباص يكسر عليك لمجرد انك ملاكي و انتظارك ورا الميكروباصات عشان بيدور علي زبون و جارك ابن الحلال يكتبلك اسمه علي عربيتك الجديدة بمفك مباركا للعربية و حقد داخلي مكبووت.
و بنت الحلال اللي جايبة عربية قديمة تتعلم عليها فمعلش و هي بتطلع حكتلك الاكصدام، و سواق الموتسيكل معلش ملحقتش نفسي و مفرملتش و كحتلك الاكصدام و يقولك مفيش حاجة يبييه ده بلاستيك هو احنا عورناك؟؟ و اللي يسرح و هو في اشارة و تلاقي العربية ريحت منه علي اكصدامك و زمامير و كلاكسات و هوولا هنا و اللي يخبطلك المرايا و يمشي و لايعتزر اقول ايه ولا ايه.
ده انا من 3 سنين كنت في امريكا لقيت كارت علي عربيتي مكتوب فيه : و انا بفتح باب عربيتي خبطت بابك ارجوك كلمني للاصلاح و انا اسف. قولت اكيد كحتلي الباب ببص لقيت بعد فحص دقيق خربوش صغير جدا و عملته بفوطة اتشاال .
مفيش حد ممعصوم من الخطأ و لكن لما يتكرر الخطأ فده دليل ان فيه عشوائية و حاجة غلط و ده طبعا لايمنع ان الحسد موجود و لكن في حاجات كتيرة احنا بنتحملها نتيجة اخلاقنا و تربيتنا

**amr011111** · 22-12-2013 02:07 PM

المشاركة الأصلية كتبت بواسطة psycholain

الهجرة هي الحل !
ده اللي انا توصلت لييه بعد تفكير عميق في بلدنا الجميلة اللي يخبطك فيها تكتك و يشتمك واحد ماشي عكسي عشان بس بتطالب بحقك انك تمشي في حارتك و يوسعلك الطريق و ميكروباص يكسر عليك لمجرد انك ملاكي و انتظارك ورا الميكروباصات عشان بيدور علي زبون و جارك ابن الحلال يكتبلك اسمه علي عربيتك الجديدة بمفك مباركا للعربية و حقد داخلي مكبووت.
و بنت الحلال اللي جايبة عربية قديمة تتعلم عليها فمعلش و هي بتطلع حكتلك الاكصدام، و سواق الموتسيكل معلش ملحقتش نفسي و مفرملتش و كحتلك الاكصدام و يقولك مفيش حاجة يبييه ده بلاستيك هو احنا عورناك؟؟ و اللي يسرح و هو في اشارة و تلاقي العربية ريحت منه علي اكصدامك و زمامير و كلاكسات و هوولا هنا و اللي يخبطلك المرايا و يمشي و لايعتزر اقول ايه ولا ايه.
ده انا من 3 سنين كنت في امريكا لقيت كارت علي عربيتي مكتوب فيه : و انا بفتح باب عربيتي خبطت بابك ارجوك كلمني للاصلاح و انا اسف. قولت اكيد كحتلي الباب ببص لقيت بعد فحص دقيق خربوش صغير جدا و عملته بفوطة اتشاال .
مفيش حد ممعصوم من الخطأ و لكن لما يتكرر الخطأ فده دليل ان فيه عشوائية و حاجة غلط و ده طبعا لايمنع ان الحسد موجود و لكن في حاجات كتيرة احنا بنتحملها نتيجة اخلاقنا و تربيتنا

كلام سليم تماماً بس حتة الهجره متنفعش مع ناس كتير مش علشان ان فيه فرصه ولا لاء

بصراحه تركيبة الشعب المصرى بقت غريبه جداً
ياريت يتم الغاء التوكتوك والميكروباصات بسواقينهم