الموضوع: تفاصيل العفشه الأماميه للفكترا b ... بالصووور

المشاركة الأصلية كتبت بواسطة Hesham.H

الزملاء الأعزاء

من فتره وأنا بفكر أعمل الموضوع ده ... خاصه بعد ملاحظه كثره الأسئله من زملاء فى المنتدى .. وبفضل الله جمعت صور ومعلومات وطبعا الموضوع مفتوح لكل إضافات الزملاء بالصور أو معلومات غير مذكوره

هحاول ما أطولش عليكم ... ونبدأ بصوره للعفشه الأماميه ... وكل رقم هانتكلم عن الجزء بتاعها



رقم ١ هى الركبه وتتكون من :-

( المساعد - السوسته - الكاوتشه - الكوز - البطاحه - الطبق )
ودى صوره الركبه كامله ومفكوكه



سعر الركبه كامله من ٣٥٠ إلى ٤٥٠ جنيه ... سعر جوز المساعدين جديد من ٧٥٠ إلى ٨٥٠ جنيه
البطاحه من ٧٥ الى ١٢٠ حسب الماركه ... الطبق سعره حوالى ٢٥ جنيه

أكتر عطل مشهور فى المنطقه دى هو تلف البطاحه وطبعا معظمنا غيرها وعارف الكلام ده ... وأعراض تلف البطاحه هو سماع خبطه مع المطبات والطرق الغير مستويه
تانى عطل بيحصل هو تلف الكاوتشه ... وده بيخلينا نسمع خبطه مع مطبات الهوا وإرتفاع المساعد لأقصى مكان

رقم ٢ الطنبوره



طبعا كلنا عارفين مكانها ووظيفتها ... أعراض التلف بتكون حاجتين
أولا المسح .. وهو إن الطنبوره مع الإستهلاك بالبلدى تتمسح وتتبرى وتفقد السماكه بتاعتها
ثانيا الريجه ... وهى إن الطنبوره تصبح غير مستويه وفيها عالى وواطى أو بوش ... وفى كلتا الحالتين العلاج هو التغيير لأن الطنبوره مافيهاش هزار
سعرها جديد ممكن الزملاء عارفينه أنا أعرف ان سعر الجوز إستيراد ٣٥٠ تقريبا

رقم ٣ تيش الميزان


أى عطل فى الميزان بيعمل بوش فى العجل وعدم إتزان فى العربيه .. سعر تيش الميزان ١٢٠ جنيه ماركه روفال .. ألمانى

رقم ٤ كاوتش الميزان



أعراض تلفه هو ملاحظه صوت تزييق مع الطرق الغير مستويه ( صوت إحتكاك كاوتش أقرب للتصفير )
سعر كاوتش الميزان ٥٥ جنيه ماركه فيبى ألمانى

رقم ٥ ذراعات الإسكاترا

هى دى اللى بتنقل حركه الدركسيون من الإسكاترا للعجل ... أعراض التلف وجود دردره فى الدركسيون وإهتزاز ... سعرها تركى جديد الواحد حوالى ٩٠ جنيه

رقم ٦ المقص



المقص زى ما هو واضح له ٣ أطراف ... طرفين فيهم جلب واحده صغيره وواحده أكبر شويه وبيركب الجزء ده فى كروسليه العربيه والطرف التالت فيه بيضه بيكون راكب فى خلف الطنبوره
تلف الجلب بيكون عباره عن بوش فى العجل ... وسعر طاقم الجلب حوالى ١٢٠ جنيه تقريبا للجلبتين سواء الكبير أو الأصغر
والأفضل مقص كامل إستيراد بجلب سليمه لأن الجديد مهما كان نضيف مش هايبقى زى الأصلى


التفاصيل دى على قد خبرتى المتواضعه طبعا بجانب الخبراء الكبار فى المنتدى ... وحاولت أختصر على قدر المستطاع وطبعا الموضوع مفتوح لجميع الزملاء لإضافه معلومات وصور لتعم الفائده

تحياتى

سيبك انت برنس

Gamed gedan elmawdo3 teslam edik w adina bnet3alim minak :D

المشاركة الأصلية كتبت بواسطة Apoissa

Gamed gedan elmawdo3 teslam edik w adina bnet3alim minak :D

يا باشا العفو ... كلنا داخلين هنا عشان نتعلم

المشاركة الأصلية كتبت بواسطة MaaM

ايه ياعم الشغل الجامد ده ، ربنا يباركلك ياريس ويديم عليك العفشة الجديدة
ولا انت فيكتتهم عشان تصور بس :)

محمود بيه ... انا لما كشفت عند العفشجى قاللى كاوتش الميزان والبطاحات ... فقلت اجيب الحاجات دى معايا عشان ممكن لما نفك نلاقى حاجه تانيه .. بس الحمد لله مالقيتش غير اللى قال عليه العفشجى وهو قاللى حاله اللى راكب عندك احسن من اللى انت جبته الجديد ده ... واختبرت كل حاجه بنفسى والحمد لله لقيتها تمام
الموضوع ده بجهزه من فتره والشغل ده معمول من اسبوعين او تلاته أيام ما غيرت الريادتير
تحياتى

المشاركة الأصلية كتبت بواسطة maam

طيب بالمناسبة مش الصدادة اللي انت حاطتها ديه على كلام ناس جربتها هنا انها بتضر المساعدين وكمان بتقلل ثبات العربية ؟
وفين الخرطوم اللي ركبته في السوست ؟

مين قال ان الصداده بتقلل من ثبات العربيه ؟!!! الصداده يا سيدى الفاضل وظيفتها تصد المساعد لما ينزل للآخر وتنمع الخبطه
وبتركب فى العمود اللى بيدخل ويطلع داخل المساعد ( راجع صوره الركبه ) ... ولا انت فهمت انها علايه ؟؟
الخرطوم راكب وكل حاجه بس الركبه دى استيراد كنت واخدها من صاحب العربيه .. كان اشتراهم وركب منهم البطاحات بس وفكيتها عشان أصورها

الله ينور عليك