الموضوع: مشروع صياغة وتشكيل الفضة...

بعيدا عن الاجواء السياسية الكئيبة في البلد ..
جات في دماغي فكرة وانا بدور علي مشروع استثمر فيه راس مال قد اكون غير محتاج اليه في الوقت الحالي.. وبالمرة نبعد عن البنوك وفوايدها...اللي هي اصلا لا تعادل انخفاض الجنية امام العملات الاجنبية.....

فكرت في مشروع تشكيل الفضة ..

انا شفت صور واشكال دبل وخواتم وسلاسل علي النت غاية في الابداع .. حاجة بصراحة تجنن....
المهم انا لي واحد قريبي عندة ورشة تصليح ولحام دهب وفضة لكنه ما بيصنعش..ممكن عشان معندوش راس مال لشراء المعدات وخلافة..وهو شاطر جدا وحابب المهنة... فانا قولت ممكن استغل حبه للمهنة واشارمه في مشروع لصياغة الفضة...
بفكر اشاركه براس المال وهو يدخل بمجهوده ..الصياغة والتسويق والتوزيع وخلافة .. هو انسان امين جدا وانا اثق فيه...
الاستفسار من السادة الاعضاء؟؟؟؟
هل لو عمانا فضة باشكال جيدة ومصنعية ممتازة وحاجة هاند ميد.. هنلاقي لها سوق في مصر
.... ولا الفضة موضتها قدمت وملهاش سوق؟؟؟؟؟
وهل يمكننا منافسة الصيني ولا لا ؟
من الاخر افيدوني هل المشروع ده هاينجح؟؟؟
هي طبعا الفضة نفسها مش هاتخصر بس انا خايف من اسعار المعدات اللي المفروض هانشتريها..هي اللي ممكن نخسر تمنها..ولو حد عنده فكرة عن تكلفة المعدات المطلوبة ابقي متشكر جدا لو اداني فكرة...
وشكرا..ويارب البلد تستقر ونرجع تاني للامان..

صديقي المواطن
أنا مطلع على حال السوق المصري وحال الشعب المصري وإطلعت اﻵن على حالتك ولي صديق صائغ ذهب ولي صديق صائغ فضة وقولا واحدا إنسى الموضوع ده نهائي خالص جدا بتاتا فنيتو ولا تقربنه وإياك منه ودعك منه وأحذرك منه ولا تخسر مالك
أولا المشروع ده صعب التسويق ومحتاج محل في منطقة بياعة والمنتج المصري كئيب ولا سوق له فمطربة الحي لا تطرب والسوق للسويسري واﻹيطالي والصيني وقولا واحدا صاحبك أو قريبك قد يكون أمينا ولكنه لم يكون أمينا معك في النصيحة فقولا واحدا تاجر الذهب والفضة لا يحتاج لرأس مال بل يحتاج لسمعة وقدرة عالتوزيع والبيع متى ما توفرت بك ستجد تجار الجملة يعطوك كيلوات من الذهب تبيع ثم تسدد وتسحب وهكذا
فلو كان صاحبك يرى فعلا أنه مشروع ناجح ما طلبك شريكا وكان إغتنى بنفسه ومهما جلبت من مكائن فلن تصل لمستوى فنش وتقفيل المستورد فإنسى هذا المشروع صاحبك همه أن يرى كمية من اﻷموال تسيل في يديه وهناك تأتي حساباته خاطئة وأنت من ستلبس في كافة حيطان المحروسة

ملحوظة على جنب وتحت بير السلم ومحدش شايفنا ولا سامعنا يا مواطن ولا تقولش لحد
شدني جملة في وسط كلامك قلتها حضرتك إنك بترضى بحاجة بسيطة وهي 25 أو 30% وأحب أقلك إنت عايش في وهم كبير ﻷن فوائد ألبنوك تتراوح من 9 إلى 11% فلو عملت شركة أي كلام ولي مشروع شغال ومرتاح ومشهور وأنا إنسان محترم فلو قلت بشغل فلوس وبدي 15% حيدخل عندي ملايين من جماعة زملائي بتاع اﻹسلام هو الحل اللي ضد فوائد البنوك ولو قلت حدي 20% ألوف البشر حتخش معاك فطلباتك 25 أو 30% من غير مجهود فدي طلبات غير واقعية في السوق المصرية
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال