مشروع تاج سلطان لشركه مدينة نصر للاسكان والتعمير

**Ahmed_selmy** · 28-12-2013 04:24 PM

المشاركة الأصلية كتبت بواسطة egyptawy2010

كلام جميل

طيب ممكن لو سمحت توصفلى المكان بالظبط لانى ماليش فى المنطقة ده

يعنى لو نزلت من الدائرى ودخلت طريق السويس هلاقيها قبل جاردنيا ولا فين بالظبط

وهل المنطقة ده تتبع اداريا للتجمع الخامس

وشكل حضرتك مهتم بالموضوع ممكن تقولنا لو عندك تفاصيل اكتر

هى بالظبط لو حضرتك نازل من الدائرى فى اتجاهك ل4.5 اول متنزل من الدائرى حضرتك حتلاقيها على الشمال قصاد المطار بالظبط.
بالنسبه للمعلومات للاسف معنديش معلومات اكتر من اللى موجوده فى الموضوع, ولسه مرحتش الشركه علشان اعرف التفاصيل بالظبط والمساحات.
اللى مخلينى متحمس للموضوع بس السعر صادمنى....انى اتعاملت مع شركه مدينة نصر للاسكان والشقه اللى انا ساكن فيها من احد مشارعها
ولكن كنت متوقع ان يكون الاقساط على مدة اطول زى الشقه بتاعتى ما كانت على 15 سنه, وان الاسعار تكون اقل من كدا شويه .....وبردوا علشان النصب اللى واحد بيسمع عليه اليومين دول فهى مضمونه 100 * 100

**dandashx** · 05-01-2014 08:20 PM

الموقع بتاعها ملوش حل لكن الأسعار غبية

أنا رحت الموقع بنفسي وسألت في المبيعات والنتيجة:

المتر في الشقق بيتراوح من 5500 لحد 6000 جنيه
الشقه ال 140 متر - 3 أوض نوم بتوصل ل 800 ألف
حسبت القسط طلع بيوصل ل 10 آلاف في الشهر، ومعندهمش دفعات سنوية ونصف سنوية

في الأول كنت فاكر بتاخدها متشطبة، طلعت الأسعار دي نص تشطيب محارة وحلوق
وكنت فاكر معاها جراج، طلع الجراج لوحده يبدأ من 35 ألف
والطامة الكبرى يقولك هتدفع 8% من تمن الوحدة صيانة بعد سنتين من الحجز (دفعة واحدة)
يعيني الشقة ال 140 متر اللي ب 800 ألف، هتدفع 64 ألف زيادة على تمنها عشان الصيانة (وده بعد الحجز بسنتين وقبل الاستلام بسنة) ده غير تمن الجراج

التقسيط 3 سنين بدون فوائد، و6 سنين و 9 سنين
وبتاخد خصم 1% على كل 10% زيادة في المقدم . ههههههه
يعني لو دفعت 10% مقدم بيبقوا 80 ألف
دفعت 20% مقدم يبقوا 160 - 8 = 152 ألف بدل 160 ألف
دفعت 30% مقدم يبقوا 240- 16 = 224 ألف بدل 240 ألف

وخطوات التعاقد: تحط المقدم في حسابهم في البنك، ويكون عندك دفتر شيكات، تكتبلهم بيه شيكات بالأقساط

آه نسيت في مصيبة تانية: العقد ضمن بنوده إنك ماتعترضش لو الشركة قررت تزود أدوار تانية فوق العمارة، وإن من حق الشركة ترفع سعر الشقة بحد أقصى 10% لو حصل زيادة في أسعار مواد البناء

وكان الله في عون الشباب المكافح

**mido** · 13-01-2014 11:18 PM

الفايدة كام لو فوق ال3 سنين ؟

**ramymechanics** · 14-01-2014 01:37 AM

معلش ليا تعقيب بسيط على الكومنتات ... رحاب ايه اللى بعيدة عن الدائرى و الناس متعسفة عشان المواصلات ؟؟؟ انا زوجتى مش بتعرف تسوق وعندى اطفال والحمد لله مش بنواجه اى مشكلة خصوصا وانا مسافر .. كافة الخدمات والمواصلات وعشان كدة سكان التجمع بييجوا يخنقونا زى ما نكون عاملين المدينة عشانهم ... وعلى فكرة الأسعار هناك محدش بينزل جنيه حتى لو شقته فيها عيوب الدنيا .. بس نفسى افهم ازاى ابراج الكهربا مش معدية فى تاج السلطان دى راشقة بالعرض فالمشروع وواضحة جدا من برة الا بقا لو هى داخلة جوة 3 كيلو

**casperinoo** · 14-01-2014 05:37 AM

انا سألت كانت الشقه 100 متر ب 600 الف ..استلام بعد 3سنين

**egyptawy2010** · 14-01-2014 08:32 AM

المشاركة الأصلية كتبت بواسطة ramymechanics

معلش ليا تعقيب بسيط على الكومنتات ... رحاب ايه اللى بعيدة عن الدائرى و الناس متعسفة عشان المواصلات ؟؟؟ انا زوجتى مش بتعرف تسوق وعندى اطفال والحمد لله مش بنواجه اى مشكلة خصوصا وانا مسافر .. كافة الخدمات والمواصلات وعشان كدة سكان التجمع بييجوا يخنقونا زى ما نكون عاملين المدينة عشانهم ... وعلى فكرة الأسعار هناك محدش بينزل جنيه حتى لو شقته فيها عيوب الدنيا .. بس نفسى افهم ازاى ابراج الكهربا مش معدية فى تاج السلطان دى راشقة بالعرض فالمشروع وواضحة جدا من برة الا بقا لو هى داخلة جوة 3 كيلو

يعنى حضرتك ترشح الرحاب للسكن

وياترى سعر شقة 150 متر كام

اصل بصراحة فيه جروب على الفيس لسكان الرحاب يحسسك انها بقت عشوائيات

**mohamed_selim** · 14-01-2014 11:18 AM

المشاركة الأصلية كتبت بواسطة ramymechanics

معلش ليا تعقيب بسيط على الكومنتات ... رحاب ايه اللى بعيدة عن الدائرى و الناس متعسفة عشان المواصلات ؟؟؟ انا زوجتى مش بتعرف تسوق وعندى اطفال والحمد لله مش بنواجه اى مشكلة خصوصا وانا مسافر .. كافة الخدمات والمواصلات وعشان كدة سكان التجمع بييجوا يخنقونا زى ما نكون عاملين المدينة عشانهم ... وعلى فكرة الأسعار هناك محدش بينزل جنيه حتى لو شقته فيها عيوب الدنيا .. بس نفسى افهم ازاى ابراج الكهربا مش معدية فى تاج السلطان دى راشقة بالعرض فالمشروع وواضحة جدا من برة الا بقا لو هى داخلة جوة 3 كيلو

بالنسبه للكهربا فى تاج سلطان هى فى اول 100 متر بالعرض من طريق السويس ... المشروع نفسه ممتد لحد الموازى لبنزينة توتال على الدائرى يعنى فعلا اكتر من 3 كيلو لجوه

بالنسبالى اسعارها بعيده عن متناول ايدى حاليا و ممكن تكون مبالغه فى ظل ظروف البلد و خاصة انها شركه حكوميه بس التخطيط بتاعها و موقعها اكثر من ممتاز

**cameeron** · 14-01-2014 11:22 AM

المشاركة الأصلية كتبت بواسطة egyptawy2010

يعنى حضرتك ترشح الرحاب للسكن

وياترى سعر شقة 150 متر كام

اصل بصراحة فيه جروب على الفيس لسكان الرحاب يحسسك انها بقت عشوائيات

انا ارشحلك التجمع المنطقة حوالين الجامعة الامريكية يعنى سواء شقق او كومباوندات يعنى متوسط الاسعار 6000 للمتر و فيه اقل بس مستقبلها كويس باذن الله

**ramymechanics** · 14-01-2014 03:37 PM

المشاركة الأصلية كتبت بواسطة egyptawy2010

يعنى حضرتك ترشح الرحاب للسكن

وياترى سعر شقة 150 متر كام

اصل بصراحة فيه جروب على الفيس لسكان الرحاب يحسسك انها بقت عشوائيات

بص يا باشا الرحاب اه مش فخمة اوى كمداخل وسلالم وكدة بس الرحاب مكان امان بسيب ولادى ومراتى اللى مبتعرفش تسوق لوحدهم هناك واسافر شهر واتنين وانا مطمن ان فى امن وفى صيدليات وفى عيادات .. للأسف السبب اللى خلى الرحاب مستواها نزل شوية هم الناس اللى بتيجى من برة عشان يوجعوا دماغنا يتفسحوا لكن انا لو مقيم فى مصر بصفة دايمة الصراحة كنت هاخد فى كومبوند جنب الرحاب عشان مش بحب الزحمة ... لكن دايما الرحاب ليها طعم خاص يكفى ان ابنى اما تعب وانا مسافر جه الراجل اداله حقنة الساعة 5 الفجر بعد ما كلمناه ب 5 دقايق بالظبط غير الخدمات ميكانيكية كاوتش نجارين حدادين كله فى مكان واحد

بالنسبة للأسعار الشقة ال 150 متر فالمراحل القديمة تعمل من 950 الف ل مليون و 100 الف كاش