موبينة و بوجيهات ولا وش سلندر ؟

خبراء المنتدي الكرام
انا عربيتي رينو كليو 2002 (1200 سي سي) مستعملة بس عامل صيانة شاملة في مركز خدمة من فترة
كنت ماشي في الزحمة والمروحة فصلت كهرباء و مخدتش بالي من الحرارة الا و دخان خارج من الكبوت
فتحت الكبوت والحمد لله طلع مش دخان طلعت مياة التبريد فضيت و طبعا نزلت علي الموتور و حصل بخار شديد و ده اول سؤال
هل طبيعي ان العربية لو سخنت تطرد المية عشان ميحصلش غليان و القربة او خرطوم يفرقع ؟
مع العلم اني ماقدرتش اوصل لمكان طرد الميه
المهم المروحة اتصلحت و الحرارة اتظبطت بس المشكلة ان لمبة فحص الموتور نورت :U_thin1[1]:
سحب العربية اصبح سئ جدا والسرعة القصوي نزلت بدرجة ملحوظة
العربية مفيهاش RPM بس انا بحس بصوت الموتور اعلي من الطبيعي
و دة طبعا لأني بدوس بنزين اعلي من الطبيعي علشان اوصل للسرعة المطلوبة
العربية فصلت مني و انا ماشي علي التاني مرتين ورا بعض مع العلم ان رجلي كانت ثابتة
بعد كام مشوار فحصت الزيت سليم مفيهوش مية

اللي محيرني ان العربية علي الاول والثاني مافيهاش رجرجة و اللي بتكون مؤشر لاسطوانة فاصلة
نتيجة بوجية او موبينة ........

ملاحظات
-كان عندي فلتر هواء جديد ركبتة بس مفيش فرق
-فية تنقيط ميه خفيف من الشكمان و انا شايف ان دة طبيعي في الشتاء خصوصا ان مشاويري معظمها قصيرة يعني 10 كم
-انا عندي تسريب زيت صغير من جوان المانيفولد (مسمار هارش) بس دة من فترة وكانت العربية ماشية بية من غير مشاكل

السؤال الثاني و الأهم ايه السبب واية العمل

بوجيهات و موبينة ولا وش سلندر ولا عمرة موتور...... ؟ :praying: :praying: :praying:

مشكلتك ان دور التبريد مش كاملة
المفروض طرمبه الماء بتضخ المياه الساخنه فى الموتور تحولها الى الريداتير ليتم تبريدها بفضل المروحه
ثم ارسال المياه التى تم تبريدها فى الردياتير الى قربه المياه
التى بدورها قربه المياه تضخها الى الماتور وهكذا
اللى حصل عند حضرتك طرمبه المياه توقف فى الضخ وتحويل المياه الساخنه فى الموتور الى الريداتير
علما بأن الريداتير مياهه بارده فبتالى المروحه مش هتشتغل لان درجه الحراراه لم تصل لمستوى يشغل المروحه
وبالتالى المياه فى الماتور تسخن لدرجه الغليات واقرب مان تنفس منه هو القربه
لذلك ينصح بعدم فتح القربه مره واحده لخروج المياه بقوه قد تحرق يدا وجسم صاحب السيارة فبيفضل احضار فوطه مبلله مياه وتغطيه غطاء القربه ثم فتحها ببط بعد مايترك السيارة مبطله حتى يتم تبريد المياه
هذا ماعرفه والله اعلم
يمكن يكون لدى احبائى الاعضاء اراء اخرى

مشكور علي الرد
و لكن المروح فصلت كهرباء و كان عيب فيشة و الكهربائي لغي الفيشة و لحم السلك في المروحة و اشتغلت
انا شكيت في الطرمبة بس بعد ما شغلت العربية كانت المية بتلف يعني الدورة شغالة
ملحوظة
عربيتي الردياتير مقفول ملهوش فتحات و الشغل كلة من القربة تزويد و مقاس ، وتقدر تراقب دورة المية بسهولة