سكودا فليشيا مشكلة فى دائرة كهرباء مروحة التبريد و الدينمو
حسبى الله ونعم الوكيل .. كما هو موضح فى العنوان ربنا ستر على العبد لله . المروحه بتاعه العربيه لما اشتريت العربيه جديد ماكانتش مديه اداء كويس وكانت بتشتغل فى المره الواحده اكتر من عشر دقايق بدون مبالغه ويمكن اكتر .. وبعد عمل جميع الصيانات والتعديلات التى تعلمتها من اساتذه المنتدى ورأى الكثير من اعضائه المحترمين تم عمل الاتى (تغيير الريداتير بواحد صينى - عمل صيانه كامله لدوره المياه من خراطيم لقربه مياه ووضع مياه خضرا ) وانا عند بتاع الريداتير قالى ان المروحه اللى راكبه مش بتاعه العربيه دى بتاعه 128 ومش مهويه العربيه كويس .. المهم بعد البحث جبت مروحه مرسيدس 7 ريشه وبصراحه زى الفل يادوب تشتغل 10 ثوانى وتفصل ..بس كانت مشكلتها انها بتسحب كهربا كتير حسب كلام الكهربائى لكن بصراحه عمرها مانيمت البطاريه ..كمان هيه كانت متوصله على كتاوت وماكانش مضايقنى غير الدينامو اللى ابتدى عمره الافتراضى ينتهى وابتدى يدى قرايه من 12.5 الى 13 بالعافيه وابتدى البحث عن دينامو جديد ومن خلال واحد معرفه قالى ان فيه كهربائى استاذ بيتعامل مع بتوع استيراد وبالفعل كلمه وجبلى دينامو 90 امبير بدل اللى كان راكب ..رحت للاستاذ (الله يسامحه بقى ) راح فاكك الدينامو القديم وقالى دا مش بتاع العربيه دا بتاع فيات ومتعدله قواعد وانه جابلى دينامو يابانى ..المهم ركب الدينامو وقالى المروحه دى بتسحب كهربا جامد وان ملهاش كتاوت .. نعم؟؟؟ ازاى امال ايه دى قالى دى كتاوت نور للمبه الدينامو فى الطابلوه ..وانه عنده مروحتها الاصليه ( بصراحه المروحه بقالها شهرين واكتر شغاله زى الفل) قلته ركب مروحتى وركب لها كتاوت ..كان الوقت تأخر وملقتش عنده كتاوت .. ركب ياباشا .. تمام ؟؟؟ تمام الدينامو شغال والمروحه شغاله وكله زى الفل ... روح بقى ياعم نام شويه وانا مروح ويادوب بركن تحت البيت والدخان ابتدى يطلع من الكبوت .. بطلت العربيه بسرعه وبفتح الكبوت راحت النار ولعت ... جريت بسرعه جبت شويه رمل من الشارع وطفيت النار وفصلت كابل البطاريه اللى كان ولستر ربنا عليا الباشا مش مقرط عليه كويس
.. كلمت سعادته قالى مانا قلتلك المروحه ..حسبى الله ونعم الوكيل ..ياعم المروحه مالها ماهى بقالها زمن شغاله ..طب هات العربيه وتعالى (بيتكلم بمنتهى البرود اللى فى الدنيا) خلانى سبيتله هوه واهله ..وكلمت صاحبى اللى ودانى ليه سبيتله هوه التانى (رغم انه كان قصده خير) المهم روحت لكهربائى تانى وشدينا العربيه عنده .. طلع ان الباشا مش لافف لزق كويس على السلك العمومى اللى جاى من البطاريه .. وان السلك كان مزنوق فى الدينامو من تحت وكمان الكتاوت اللى فكها طلعت بتاعت المروحه وسيادته بيألف اى كلام .. ومع سخونه العربيه وشده سحب المروحه والنور والكاسيت (اصلى كنت فرحان جدا بالعربيه ) السلك لمس فى مسمار فى الدينامو وساح (طبعا السلك واخد عمومى كهرباء ولمس فى مسمار الدينامو اللى هوه طبعا ارضى فحصلت المشكله اللى لولا ستر ربنا لكان الواحد فى خبر كان ) مره تانيه وتالته حسبى الله ونعم الوكيل
