بالنسبة لى الاسعار النت اخرتها ايه

**fisha** · 26-12-2013 10:32 PM

دلوقتى انا عايز اعرف اسعار السيارات المتسعملة لان الاسعار الى على المواقع على النت بصراحة ياما الى عملها مش طبيعى ياما انا الى مش فاهم حاجة الاسعار مش طبيعية بجد و اولهم الموقع الى كلنا عرفينه مش عايز اقول اسم عشان مش يكون دعاية و اكيد ده مش الطبيعى لما الواحد بيجى يشترى لانى سعات بعرف بصدفة من ناس اشترت عربية ولا حاجة و بعرف سعر ملوش اى علاقة بى الاسعار الى بشوفها
مفيش طريقة تانية اعرف بيها الاسعار الفعلية الى على ارض الواقع

**benmatar** · 26-12-2013 11:10 PM

اسعار النت اغلى من الواقع، وبصفة عامة أي أي سلعة بتتباع عن طريق النت أو بشكل آخر بيتطلب فيها سعر أعلى شوية عشان الفصال ودياولو، العقارات، الأجهزة، الألكترونيات، .... إلخ
بس السوق دايما بيحكم سعر عربية معينة بعدة عوامل منها سنة الموديل، انتشار الطراز وسمعته في السوق (حاجة اجتماعية مش شرط تكون صحيحة)، التداول.
يعني مثلا وبدون ذكر اسماء او تفاصيل عشان محدش يزعل عندك عربيات لا تصلح إنها تكون منتشرة بشكل مهول ولا ترقى لأنها تمشي في الشوارع اساسا بس سمعتها كويسة (ليه مش عارف) وعليها طلب (رغم إن ناس كتير مكوية منها)، وتشتري موديل مجهول (ممكن يكون محترم بكل المقاييس) أرخص بكتير. بس تلاقيه مثلا قليل أو قطع غياره مش منتشرة وهكذا

**mado_xxx** · 26-12-2013 11:10 PM

المشكلة برضه انك لو نزلت السوق
ساعات هتلاقى اسعار اعلى من النت
وياريت حتى العربية تستحق انك تشاور عقلك
انا برضه كنت عامل مشاركة بخصوص موضوع الاسعار ده
http://www.nilemotors.net/Nile/394008-a.html

**Eng HateM** · 26-12-2013 11:10 PM

للأسف شراء عربية مستعملة من النت غير آمن تماما , أولا الأسعار مش مضبوطة وتانيا -في معظم الحالات- حالة العربية في الواقع غير الصور والوصف تماما

مش قدامك غير انك تنزل تدور بنفسك وتسأل معارفك , إنما من النت لا أنصحك .

ربنا يكرمك وتلاقي طلبك :)

**maio_do** · 27-12-2013 07:33 AM

بص انا هقولك موضوع النت لانى عنيت منه

عندك النوع الاول وهو التاجر وده مش فارقه معاه يحط اى سعر واللى ينزل يفاصل معاه لو نزلت الفين تبقى جامد

التانى ده بيستهبل شايف الاسعار كده ومتردد فى بيع عربيتة يقولك انزلها زى مابيشوف الاسعار على النت (اسعار التجار)

ولو جابت السعر ده اهو بايع ولو مجابتش يبقى خليها معايا احسن

والنوع التالت ده العملى اللى داخل يخلص وبيقول سعر العربية بجد وده علشان تلاقيه تقعد متابع على الاقل شهر علشان تلاقى واحده ولا اتنين ومتقعدش العربية لو بحالتها اللى كابتها وسعر مناسب وغالبا بياخدها تاجر ويرفع في سعرها من 10 الاف ال 15 الاف

**amrico** · 27-12-2013 09:35 AM

المشاركة الأصلية كتبت بواسطة benmatar

يعني مثلا وبدون ذكر اسماء او تفاصيل عشان محدش يزعل عندك عربيات لا تصلح إنها تكون منتشرة بشكل مهول ولا ترقى لأنها تمشي في الشوارع اساسا بس سمعتها كويسة (ليه مش عارف) وعليها طلب (رغم إن ناس كتير مكوية منها)، وتشتري موديل مجهول (ممكن يكون محترم بكل المقاييس) أرخص بكتير. بس تلاقيه مثلا قليل أو قطع غياره مش منتشرة وهكذا

انا عارف حضرتك بتتكلم على انهي عربية :)))