السلام عليكم جميعا اتمني ان تكونوا بخير حال
للي مش فاكرني انا الشخص اللي لسه مبتدئ في السواقة وعاشق للادا 2017 وحيموت عليها وكنت حشتريها زيرو بـ61 الف كاش ههه.
الحكاية ببساطه ان الهندسة دفعتني للبحث علي عوامل تقييم السيارات باعتبارها منتج هندسي في الاساس ،لكن سطحيتي ومحدوديه دخلي خلوني اقنع نفسي لا اراديا بان اللادا اعظم سيارات التاريخ من حيث الاعتمادية والعمليه واني مش حتواجهني اي مشاكل مع نشفانها ولا ردائه مكوناتها وتخلف انظمتها.
وبصراحة صدمتي في العربية هيا اللي دفعتني لأداء واجبي المقدس في توضيح امكانياتها في حدود منظوري كمبتدئ ،لكي لا يسقط احد زملاء المبتدئين في فخ قاسي اذا اضاع ثروته في شراء هذه السيارة المتسربة عبر الزمن من العصور السحيقة.
تعالوا اولا بالهداوة كدا نقيم العربية بكلام يفهمه اي حد عمره ما درس السواقة ولا فكر يركز مع السواق في قيادته اصلا:-
طبعا السيارة ببساطة هيا وسيلة نقل اهدافها هي (النقل بسرعة وبراحة والاهم بأمان)
كلام جميل تعالوا كدا نتكلم في تقييم اللادا في العوامل الثلاثة السابقة:-
اولا في السرعة:
بصراحة العربية رغم انها مش جراية الا انها تنافس مثيلاتها السيدان في السرعة الجيدة داخل المدينة لكن سرعتها القصوي ربما لا ينبغي ابدا زيادتها عن 120كم/س لان نظام الدركسيون والتعليق متخلف حبتين وحنتكلم عن ده في العامل الاخير (الامان) ،لكن بالنسبة الي اداء السيارة علي الطرق السريعة والسفر فهي ليست متزنة بالمرة.
ثانيا الراحة:
بالهداوة بقي هنا ،هيا اصلا ايه اهميه الراحه في الموضوع عشان نقدر نقيم السيارة من خلالها.
الصراحة انا مكنتش فاهم ايه الموضوع ده وليه الناس بتقول علي اللادا عربيه ناشفه وكنت بقول لهم في عقل بالي بلاش هيافه وخيابة ورغبة في السيارات الفارهه الناعمه واخشوشنوا يا ناس يا فافي.
لكن بتجربتي لقيادة اللادا ساعات متواصله وجدت الموضوع يستحق الاهتمام ،بمعني انا اصلا جايب عربية ليه مش بس للنقل ولكن لتوفير طاقتي ورفع كفائتي الانتاجية في حياتي وشغلي ،بمعني اني محتاج لما اروح الشغل او اعمل مشوار ساعة بالعربية اوصل الشغل وانا مش تعبان من ساعة سواقة واوفر مجهودي ده لشغلي وانتاجيتي ،والاهم اني في اوقات التعب والعودة من العمل حكون مش حمل سواقة وعمل بدني بدون مقابل مجدي.
ومن هنا بدأت التذمر من اللادا بصراحه عربية يظهر فيها ببساطة كفاح الشعوب الروسية تحت وطأة الحكم الشيوعي القمعي الخشن ،والاسباب كالآتي:-
1. الدركسيون ناشف وكبير ،واحد طويل زيي بيحطه علي حجرة زي البيبي
2. العزل الحراري ايه من ايات التخلف "بتعرق في العربية في عز البرد ما بالك في الصيف"
3. المساعدين ونظام التعليق غير مريحين بالمرة ،فضلا عن تقاعس الشركة الام عن حل مشكلة ملص البيض- اللي مش بتعاني منها اي شركة في العالم
4. الإضاءة بتفكرني بمصابيح السبرتو اللي بتتعلق علي الحيطة زمان ،اضاءة غير كافيه واماكنها غبية واي حد عاوز يعمل اي حاجه في الضلمة كالقراءة او اي حاجه المصابيح دي مش حتسعفه مطلقا
5. الكراسي غير مريحه وضيقه من عند الدركسيون وكذلك الكنبة الخلفية
6. العزل الصوتي للسيارة منعدم صداع من تحت ومن فوق
7. واخيرا وليس اخر التكييف لما بيشتغل بيدمر السحب بتاع السيارة وياريته بيسقعها
وطبعا كل ما سبق بيؤدي الي استهلاك طاقة السائق وعدم راحة عموده الفقري ورجليه ورقبته بسبب الكرسي و الدبرياج ،واكتافه وزراعية بسبب الدركسيون ،وغددة الدرقية وملابسة بسبب العرق الناتج عن انعدام العزل الحراري ،واذنية ورأسه بسبب انعدام العزل الصوتي.
انه حقا تابوت كما يصفة احد زملائنا في المنتدي تابوت للاحياء .... واعجبي.
ثالثا بقي الأمان:
طبعا كتير من الناس حتقولي حااااااااااااسب عندك اللادا احسن عضم واقوي صاج يعني اوعي وشك.
بصراحة هيا دي فكرتي عن الامان في صورتها الاولي لما كنت معرفش من اجزاء العربية الا الصاج والكراسي اللي جنب السواق ،لكن بالدراسة وجدت الموضوع مختلف تماما.
بصراحة عناصر الامان كثيرة جدا تهدف جميعا الي اخراج من بداخل السيارة احياء حتي لو تدمرت كل اجزاء السيارة من اجل حمايتهم ،ونخطئ كثيرا اذا حصرنا الامان في متانه وقوه صاج العربية ،بل والاغرب لو علمنا ان قوه الصاج قد تكون عامل اساسي في تدمير حياة الركاب وهنا مكمن الخطورة.
انا حستعرض اشهر عوامل الامان اللي اعرفها واتمني من الاعضاء الزيادة عليها وتقييم اللادا من خلالها.
1. قوة سحب الموتور مهمة لكي تزيد سرعة السيارة اذا لزم الامر في الازمات
2. اتزان السيارة بشكل عام سواء اعتمادا علي المساعدين او التوزيع الهوائي حول السيارة (الخواص الايروديناميكية) ،وكذلك اتزان زويا العجل
3. الايرباج عددها وتوزيعها
4. الفرامل وانواعها المختلفه المتطورة والقديمة وحجم الجنوط و نوعه
5. البناء الداخلي للموتور وقدرته علي العمل في درجات حرارة قاسية او بدون زيت لمسافات قصيرة
6. منظومات امتصاص وتوزيع الصدمات في الصاج والشاسية وما بينهما
7. منظومة اسقاط الدركسيون لتجنب انقضاضه علي السائق لحظه التصادم
8. الشكل العام لوضعيه الرؤية لدي السائق
تقييم اللادا في العناصر السابقة:-
1. سحب الموتور ضعيف نسبيا 78 حصان و من 0 -100كم/س في 17ثانية
2. هنا بقي انا حعيط .... السيارة سيئه جدا من حيث الاتزان سايق علي 40كم/س وبلف الدركسيون العربية عملت فيها طائر البطريق تتمايل يمين وشمال منتهي السخف والفشل
اما بالنسبة الي الخواص الهوائية فهي من اضعف ما يكون بجوار التريلات وعند الجري علي سرعات عاليه ،فضلا عن بوش الدركسيون الناتج عن التصميم العتيق المتخلف لعلبة الدركسيون ،والله البوش لاحظته بوضوح من اول 60كم/س ،زوايا العجل حدث ولا حرج ،بالاضافة ان بيض العفشة بيملص والدركسيون بيدقر .... وانا لله وانا اليه راجعون
3. طبعا في دي بالذات اللادا تتفوق علي فولفو ومرسيدس الايربااااااااااااااااج اكتر من المسامير اللي في العفشة (بهزر طبعا لا يوجد اي ايرباج لانه محرم دوليا في منظور التصميم الشيوعي)
4. طبعا الفرامل بتاعت اللادا اعتمادية لا بأس لكن لا توجد فيها اي انظمة ABS او ما يشابها
5. علي ما اظن ان البناء الداخلي جيد واعتمادي نسبيا ،لكنه لا يصمد امام مشاكل الحرارة فضلا عن مشاكل دائرة التبريد وحساس الحرارة لدي اللادا ،وطبعا الزيت لو اتسرب لا تحاول السير بالسيارة عشان متلبسش عمرة ماتور ،بس الشهادة لله الالماني بيصمد امام عدم وجود زيت المحرك بس في حالات قليلة
6. مش حتكلم كتير في موضوع الصاج ده بس حقول حاجه واحده بس: انا لما المدربين لاقوني بسوق بسرعة وجري وعنف في السواقة ادوني فيديو علي اليوتبوب عن حوادث السيارات في روسيا عشان اتعلم منه تفادي الاخطاء واللينك اهوو-->
https://www.youtube.com/watch?v=agJP1Wigs2M
بس بصراحة سد نفسي عن اللادا انا فوجئت ان اللادا خطر جدا في تصميمها علي الحياة ،اي اصطدام في الشاسية بيجذب السقف الي اسفل عن طريق العواميد وبيطبق علي الركاب.
عرفت بعد كدا ان في السيارات الجديدة فصل بين الشاسية والعمود مع السقف عشان المشكلة دي
حتلاقوا في الفيديو اصعب تدميرات للسيارات كانت للادا وكمان السيارات الاخري ومنها اللانوس مثلا طلعت افضل حالا من اللادا
واصبحت السيارات الجديدة تصمم ضعيفه الصاج الخارجي لتجنب نقل الارتجاج للداخل لكن من حيث الشاسية فهو اكثر قوة وامانا لكي يوقف الصدمة قبل وصولها لجسم الركاب
7. لا يوجد في اللادا اسقاط للدركسيون عند الصدام فضلا عن سوء وضعية كرسي السائق مع الدركسيون الكبير ،مما يزيد من خطورة اصطدام الدركسيون بالسائق ويجعله مميتا
8. بصراحة انا لا اعاني من هذه المشكلة لكن اشتكي منها الكثيرين ،بل بالعكس ارتفاع مقدمة الكبوت تمنحني القدرة علي تمييز ابعاد السيارة بشكل جيد
انا بصراحة اشعر بالحرج الكبير اني بكتب لاول مرة كلام تفصيلي عن سيارة في وسط اعضاء خبراء مثل حضراتكم لذلك لا اريد ان يتحرج اي من الزملاء في تصحيح او تزييد اي من ما سبق
حيث انني مبتدئ ولم اتجاوز 100 ساعه قيادة ولم اخرج الرخصة بعد ولم اشتري سيارة
وشكرا لكم جميعا واسف جدا علي الاطالة
المفضلات