النهاردة الصبح رايحة اوصل امي و اختي عند الدكتور و ووصلت صحبتي كمان لغاية بيتها
و انا راجعة بقى و ماشية في شارع ابو قير الاقيلك بتاع 1/2 نقل بيحدف عليا و قام ايه حاكك في العربية بطولها
انا طبعا اول ما سمعت كده و هاتك يا كلاكس و قمت نازلالوا
لقيت الخبطة جاية في النص دايرة اللي فوق الكوتش و الباقي بقى مكحوت و طالع عينه
المهم بصت كده على العربية و كلي حسرة
قام جه الراجل قالي انا اسف اصل بتاع التاكسي هوا اللي فتح الباب مرة واحدة و جيت افاديه جت فيكي
لو عايزاني اصلحهالك و الله انا مستعد
قمت قولتلوا خلاص بقى كل سنة و انت طيب

المغزى من القصة ان اصحاب التكسيات (اعدائي اللدودين) هما السبب في اي مشكلة سواء كانت بخبط او من غير
ثانيا ان في ناس طيبة كتير
ثالثا ان لو كانت دي عربية غير ال 504 كان زمانها اتطبقت بس عشان جامدة و صاجها متين فحمتني
و على فكرة و الله دي اقصر حادثة شفتها
الموضوع كله ما اخدتش 5 دقايق بالظبط و الله
و اللي يغيظك بقى ان في سواق تاكسي تاني شايف الخبطة و شايف الراجل بيعتذر و عمالي يقول ما تخلصونا بقى و امشوا
كان نفسي اديله بالبونية في وشه

على العموم قدر الله و ماشاء فعل
الحمد لله