الموضوع: تقرير مصور تركيب بارك سنسور وكاميرا خلفية للفلوانس 2014

السؤال اللى شغل كل ملاك الفلوانس 2014 فئة 169 ألف عن البارك سنسور ... البداية كان تشجيع الزميل أحمد الفقى ليا نروح أرابكوم نركب بارك سنسور خلفى رحت سألت لقيت 3 أنواع من السنسور 350 جنيه و 625 جنيه و 700 جنيه والأنواع دى بيبقى معاها زى شاشة صغيرة زى المسطرة عليها ليدات بتنور وتعمل صوت حسب بعد العائق ولفت نظرى سنسور بكاميرا شكله نوع نظيف ب 1200 جنيه وقررنا انا واحمد نجيبه وخدته ورحنا توكيل العبور ... طبعا فالأول قالولنا مين قالكم اننا بنركب السنسور دة والكلام دة وبعد حوارات قالولنا ماشى بس دى مش القاعدة رحنا للمهندس قالنا نيجى يوم تانى لأننا رحنا متأخر وكان السؤال المهم ... هل لو ركبناه برة الكهربا تطلع من الضمان ؟؟ وكان الجواب هو النفى القاطع إلا لو العيب اللى انت رايح بيه سببه هو القطعة اللى انت ركبتها برة والأهم ان مصاريف التركيب فالتوكيل 500 جنيه ورحنا أرابكوم وابتدينا المشواااااار

مبدئيا دة شكل العلبة من برة


التركيب بيتم انه بيخرم 5 فتحات فالإكصدام 4 للسنسور وواحدة للكاميرا ببنطة جاية مع الطقم بعد كدة بيفك الفرش الجانبى للشنطة وبياخد وصلة من الضفيرة من سلك المارشدير ويوصلها عالكونترولر بتاع الجهاز والسلك بتاعه يمشى لقدام جوة القايم يعنى الموضوع مفهوش اى بهدلة ولا فك اكصدام ولا فرش ولا اى حاجة ... أحمد خلص عربيته ولقى البيب بتاعة الجهاز مش شغالة ومش بيعمل صوت وأنا ببص على عربيتى لقيت كهربة العربية كلها فصلت كأن جالها سكتة قلبية ... بعد حوارات طويلة الفنى طلع وهو بيشوف فردة ياخد منها كهربا فى علبة الفيوزات لمس حاجة العربية عملت shut down للكمبيوتر واحتجنا نغير الفيوز العمومى بعد ما كان هيجيلى سكتة بصراحة بس هم ناس محترمين جدا واتعاملوا مع الموضوع كويس الحمد لله بس الشاشة عندى طلعت بتعمل بيب وبتتكلم وكل حاجة الحمد لله وغيروا لأحمد الشاشة بتاعته وحطولى نيتروجين هدية تعويضا عن الخضة

الشاشة أما بتجيب R بتعمل بيب مرة دة معناها انها شغالة بعد كدة بيشغل الكاميرا ويعمل display للمسافة الموجودة بينك وبين اقرب عائق سواء من اليمين او الشمال واما المسافة تقل عن 30 سم بيعمل ستوب وصوت صفارة مزعج ... إحنا فضلنا نحط الشاشة على البرابريز من فوق قدام عشان متعورش التابلوه وكمان متبقاش ملفتة للنظر حد يفتكرها GPS ولا حاجة ... أسيبكم بقا مع الصور


الصورة اللى فاتت فيها سنسورين لسة مش باينين عشان الكادر مجابهمش بس







صورة كمان للرؤية الليلية



صورة لمكان الشاشة فوق جنب الشماسة



بصراحة الجماعة بتوع ارابكوم طلعوا محترمين جدا واما حصلت مشكلة عربيتى قالولى لو استلزم هنوديها التوكيل على حسابنا مهما كانت الفاتورة وجابوا مهندس من التكيل فالمركز بالكمبيوتر هو اللى اكتشف موشوع الفيوز دة وعدت على خير الحمد لله ... التركيب المجانى وبياخد حوالى ساعة ونص