الموضوع: حل سريع من فضلكم لسحب العربية

السلام عليكم ورحمة الله وبركاته
من حوالى عشر شهور اشتريت عربية لانسر بومة 2008 اتوماتيك 1300 سي سي
العربية فضلت معايا فترة طبعا مش عارف فيها اي حاجه غير انى اسوقها وبس الفترة دي كانت حوالى تلات شهور
المشكله ظهرت لما لقيت سحب العربية مش كويس وكل اما حد صاحبي او قريبي يركبها يقولي العربية مخنوقه ومش كويسه وفيها حاجه
رحت لميكانيكي علشان العربية كانت متلته ووكان في حاجه كمان استدعت انه يفك وش التاكيهات اللى تحته الموتور .. وهنا كانت المفاجاة انه لقى كتل زيت كبيرة وكمية كبيرة جدا جدا جدا والمكنه من جوا شكلها وحش جدا جدا جدا ودا كله كان قدامي بس نسيت اصوره من الصدمه اللى كنت فيها
قالى لازم ننظف المكنه والعربيه هتبات عندي وتعالى خدها بكره .. طبعا هو خيطنى ف الفلوس وخد كتير اوي بس العربيه بعدها كانت كويسه الى حد ما بس السحب مكنش كويس خالص برضو
رحت قلتله قالى غير زيت فتيس
بعد ما زهقت في واحد قريبي فاهم شويتين وربنا يديله الصحه ويكرمه والله قالى على ميكانيكي محترم رحنا له قلناله مشكله السحب دي من ايه قال انه هيكون من الفلتر بتاع البنزين او الانجشكن او وش التقسيمه وهنشوف دا كله
وبعدها نسبيا العربيه بقت كويسه بس قالنا في حاجه اسمها المفاجئ انك لما تدوس بنزين للاخر العربيه تجري معاك اوي دي مش كويسه ف العربيه دي فوديها كمبيوتر ف طلخا (المنصورة) وديناها والراجل عمل اللازم وركب الكمبيوتر وكمان نظف الحساسات والعربيه مشت فترة كويسه وسحبها حلو اوي
من فترة بقا العربيه رجعت تقريبا زي الاول ومبقتش تسحب كويس الا احيانا يعني نفس المشكله
مع العلم ان العربية محتاجه قواعد موتور وصوتها عالى شويه غير اي عربية وبحط بنزين 92
ياريت بقا حد يقولي ايه العبارة بالظبط واعمل ايه علشان زهقت منها اوي اوي اوي وممكن تكلف كام واسف على الاطاله بس علشان الامور تكون واضحه قدام حضراتكم .. شكرا

لا دى عايزه ميكانيكى كويس يشيك على حاجات كتير .. من بوجيهات وسلوك بوجيهات وطرمبه بنزين والحساسات ... الخ

انا اسمع ان فى واحد كويس فى طلخا اسمه سامح ... مدخل السوق القديم اللى على الترعه ده ... على ايدك اليمين وقبل المزلقان على طول وانت داخل صلاح سالم وانت جاى من طريق بلقاس

انا عربيتى مكواه يعنى كربراتير .. بشتغل عند واحد اسمه انور ممتاز وامين جدا جدا بس معندهوش كمبيوتر .. عربيتى كانت خنقانى جدا ... كل اللى كانت محتاجاه شعره كهربه زياده وبقت عربيه تانيه ... مش عايز ااقولك ان قبل شعره الكهربه دى ال 128 كانت بتعدى منى بسهوله جدا .