إخواني الأعزاء أنا شفت عربية عجيبة وعايز نصيحتكم
إمبارح وأنا راجع من الشغل لفتت نظري عربية مستعملة واقفة في معرض جنب بيتي ، كان فيه في المعرض عربيتين لانسر وعربية شارك ، لكن دول ما لناش دعوة بيهم ، العربية الرابعة كانت أخت اللي كانت معايا من عشر شهور وبعتها بس اللون مختلف ، يمكن علشان كدة لفتت نظري ، طبعا علشان العربية كانت معايا قبل كدة كنت عارف أنا هاشوف إيه فيها ، اتفرجت على العربية من برة وكانت فابريقة وفيها حكات كتير وصاحبها عاملها بالقلم بشكل مش حلو مش راششها ، بصيت تحت العربية وعلى الكارتيرات لقيت تراب مزيت وحسست بإيدي تحت العتب وجوه الكارتيرات لقيتها لسة مقفولة بالبلاستيك بتاع بلادها ، فتحت الكبوت اندهشت أكتر ، المتور ما عليهوش أي نقطة زيت وحوض الموتور نضيف ما فيهوش ولا كلمة ، العربية اللي كانت معايا قبل كدة كان صاجها متقشر ومليانة زيت ولون الموتور أسود لكن دي دهان الماتور لسة بلونة ، حتى خرطوم العمة مفيش فيه ولا شق ، حوض الموتور تحفة ، لفيت وفتحت الشنطة لقيتها زيرو مافيهاش ولا حكة ولا حتة مقشرة والدهان لسة جديد كأنها خارجة من المصنع لسة ، حتى الكلبسات بتاعة الإكصدامات إللي ورا لسة ما اتفتحتش ، الفوانيس إللي ورا وإللي قدام لسة بتوع بلادها رغم إن العربية موديل 95 ، ولما دخلت الصالون استغربت أكثر ، العربية عاملة 47000 كيلو في 13 سنة يعني بمعدل أقل من 4000 كيلو في السنة ، أغرب شيء إن الأكياس بتاعة الفرش لسة عليه ما اتشالتش ، دورت الموتور ، دار من أول مرة ، زودت بنزين لقيت صوته ناعم ومافيش فيه أي حاجة غلط ، العربية القديمة لما دورتها في المعرض كان صوتها عالي جدا والتاجرقعد يقولي ده من الشكمان ومش عارف إيه ، لكن دي صوتها ناعم وما فيش فيه أي حاجة غريبة ، أغرب حاجة كمان إن جلد الأكسليرتور والفرامل والدبرياج لسة بتاع بلادة مادابش ولا اتنحت ، أنا عربيتي اللي قبل كدة كان الدواسات على الحديد ومحطوطلها جلدة من أم ربع جنيه .
لفت نظري جدا إن العربية زي ما تكون بقالها سنة ولا اثنين بس بتستعمل مش 13 سنة وقلت أكيد دي عربية معاقين ولا حاجة وواخدة إفراج واللي خلاني أفكر في كدة إن نمرها لسة جديدة ورقمها مقرب للعربيات الزيرو إللي لسة مرخصة، لما اتكلمت مع التاجر قالي إن صاحبها كان راكنها في الجراج وبيستعمل عربية الشغل وإن كان عليها نمرة مميزة ثلاث أرقام بس وهو خد النمرة دي حطها على عربية زيرو وحط للعربية دي نمر جديدة ، وصاحبها عامل توكيل مقفول للتاجر علشان إللي ياخدها يسجلها بإسمه على طول . أنا ما كانش في دماغي خالص إن أنا أجيب نفس الموديل إللي أنا كنت راكبه تاني ، ولما تعرفوا نوع العربية حتعرفوا أنا بقول كدة ليه لأنها لادا 2105 . لكن لما شفت العربية دي حسيت إن العربية إللي كانت معايا كانت زبالة ، رغم إن أنا جبتها غالية وبعتها غالية ، بس بعتها بعد ما عملت بيها كام حادثه وبهدلتها الحقيقة وكنت متخيل إنها نضيفة ، لكن لما ركبت العربية دي إللي كل حاجة فيها لسه على أصله ما تغيرش حسيت إن العربية إللي كانت معايا كانت خربانة . لما شوفتها غيرت رأيي على طول وبعد ما كنت بقول أبدا لا يمكن أجيب لادا تاني ولا أموت نفسي كل ما أجي أركن ولا أدخل شارع ضيق وأنا بعافر مع الدركسيون. كل ده اتنسى لما شفت العربية دي ، دلوقت يا أحبائي الراجل طالب سعر يزيد على متوسط سعر السوق لنفس الموديل بحوالي 4000 جنية يعني العربية دي دلوقت بتمشي من 24000 لغاية 28000 أقل من كدة تبقي عربية وحشة وأكثر من كدة تبقي عربية غالية ، والعربية ما يعيبهاش غير إنها لادا وغير إن مرامات البوية إللي فيها معمولة بالقلم بشكل مش ظريف ، لكن غير كدة ما فيهاش أي كماليات يعني هاشتري شاسيه وهيكل وأربع عجلات وموتور وكنبة وكرسيين ومتور ، كل حاجة فيها لسة على أصلها ما اتغيرش فيها حاجة خالص ، أنا عارف إن سوق القديم كلة نايم دلوقت وكلة بيدور على التكييف والباور والإزاز الكهربا ، أنا كنت هاجيب 128 وبعدين لما شوفت العربية دي غيرت رأيي وهاضحي بعضلات دراعي ورجلي واركب لادا تاني , لكن عايز رأيكم . التاجر بيحلف ( وانتو عارفين حلفانات التجار ) إنو جايبها باكثر من 28000 وبيقولي هاخد منك ألف على ثمنها يعنى عنده استعداد يبيع ب 29000 . وكدة تبقى العربية غالية 2000 جنيه عن سعر السوق إية رأيكم ؟ أشترى وألا أنفد بجلدي ألأحسن وأجيب 128 أي كلام بتمنتاشر ولا عشرين ألف . أفيدوني من فضلكم خلال 24 ساعة .
أخوكم
أحمد
العربية التحفة لسة ماتباعتش وسوقتها النهاردة
إمبارح طبعا زي ما قولتلكم كنت مسافر ولما رجعت الساعة واحدة من البلد لقيت العربية لسه واقفة قدام المعرض ما اتحركتش ، فاطمأنيت شوية إن سوقها مش ماشي وده عادي دلوقت لأن كله بيدور على التكييف والباور والشكل العام ، العربية في الأول والآخر بتعكس المكانة الاجتماعية لصاحبها .
النهاردة بعد صلاة العصر وأنا بالجلابية روحت المعرض أتأكد إنها لسه ما اتباعتش فلقيت التاجر هناك ، فلما شافني ووافتكرني طبعا رحب وقالي العربية تحت أمرك وقال لابنه يمسح العربية ويوضبها ، وقعد يوريني حاجات فيها ويحلي لي فيها ، المهم وراني رخصة العربية والتوكيل بتاعها وطلع إن التوكيل مش بإسمه ومعمول يوم 11 رمضان ، ففهمت إن العربية أكيد اشتراها تاجر صاحبه ومعرفش يبيعها فهو خدها منه علشان يبيعهاله والمكسب طبعا بالنص. ولقيت إن العربية باقيلها سنة في الرخصة وثلاث سنوات على الفحص ، قررت ساعتها أروح أجيب السمكري علشان يتفرج عليها لأني خايف الصاج بتاعها يكون دايب ولا حاجة ، خصوصا من تحت ، وقلت للتاجر فعزم عليا عزومة مراكبية إنه يوديلي العرابية لغاية عنده ، وطبعا شكرته وكده وروحت لبست هدوم الخروج ووأنا بالبس قلت فعلا ليه ماخدش العربية لغاية السمكري وده يبقى اختبار لمدى رغبة التاجر في بيعها ، لأن التجار بيبقى عندهم حرص كده على إن العربية ما تتحركش من مكانها والمشتري ما يحركهاش ، يعني بيعززها ، فلما روحتله وقلتلو إيه رأيك لو ممكن تيجي معايا علشان نرفع العربية في البنزينة بالمرة ، سكت لحظة وبعدين وافق ، والمدهش جدا إنو خلاني أسوقها بنفسي ، وأنا ماصدقت ووافقت على طول وهو قعد يسمي ويدعي كأن نفسه إن العربية تحلى في عيني ،
طلعت بالعربية ، ولاحظت أول حاجة إن المشاوير بتاعة الدواسات بتاعتها أقصر من عربيتي القديمة والمقاومة بتاعتها كويسة وما بتزيقش زي عربيتي القديمة وكمان الفرش تحتها مش دايب ، بالعكس الراجل عاملها فرش جلد طبيعي والفرش قديم لكن لسه بحالته ، المتور صوته متناسق ومستمر وناعم هو عالي شوية وده عادي في اللادا ، وكنت وأنا باتفرج قبل كده سديت الشكمان بإيدي فالعربية بطلت بعد ثانية واحده بالظبط وكان فيه مقاومه شديده لإيدي بس كان فيه حلقة سوده على إيدي وجايز الكاربارتير عايز يتحل ويتغسل وممكن تكون البكات عايزة تتغير.
العربية سحبها حلو والسرعة بتوصل ل20 بعد ثانيتين ثلاثة ولأربعين بعد خمس ست ثواني وكنت باتأخر شويه في النقل علشان أسمع صوت العربية وكمان علشان عربيتي القديمة ما كانتش بتجمع بالسرعة دي .
الدركسيون تقيل جدا وفيه خربطة في العفشة الأمامية وده دليل على إن العفشة عايزة تتحل وتتغسل والبيض يشحم وجايز يكون عايز يتغير .
الفرامل بتمسك كويس والعجلتين إللي ورا بيزحفوا .
المرايات الجانبية هي مرايات العربية الأصلية وسايبين شوية وعايزين يتغيروا
نصف قطر الدوران بتاع العربية أوسع من عربيتي القديمة وجايز ده لأن مقصات عربيتي القديمة ماكانوش الأصليين بتوعا .
الصالون نضيف جدا وباستغرب بشده إزاي الأكياس بتاعة الكراسي لسة سليمة لغاية دلوقت رغم إن شكلهم قديم وومقطعين شوية صغيريين ، الفرش بتاعه قطيفة في جلد وياريت لو حد كان شاف الموديل ده أول ما نزل يقولي هو ده الأصلي ولا لأ .
الضغط بتاع كراسي الصالون كويس جدا وده أعطاني إحساس بالراحة بالقياس لعربيتي القديمة .
الفتيس كويس جدا وتقيل شوية عن فتيس عربيتي القديمة والرأس بتاعته جديدة وبتلمع والحديد بتاعة لسة مدهون بلونه ومش باهت .
التابلوه مطفي شوية بس لسه برونقه والدراعات بتاعة الإشارات والمساحات وغيره لسه جديده وعليها الكتابة بتاعتها لكن فيه شقين طوليين أعل الدركسيون من الشمس والدراع بتاع فتح الكبوت حديد ولونه أحمر وده لفت نظري لأن الدراع بتاع عربيتي القديمة كان بلاستك معفن .
فرش الأبواب هو الفرش الأصلي وزجاج الأبواب فيه خطوط من الرفع والخفض وواضح إنه ماتحلش قبل كده قبل كده والبكر بتاع الإزاز تقيل شوية لكن مش قوي.
الأبواب نفسها بتقفل كويس برزعة خفيفة يعني مش برزعة جامدة زي عربيتي القديمة.
عموما لما روحت للسمكري ما لقيتوش فالتاجر تضايق جدا ، وقلتلو إن أنا هاجيبه الصبح واتفرج على العربية . وسقتها وأنا راجع برده والتاجر قال للعامل بتاع المعرض يخليني أتفرج على العربية في أي وقت وهو مش موجود.
بكرة إن شاء الله يا جماعة هحاول أخلص في العربية دي على 26 ولو زادت عن 27 مش هاشتريها ، ادعولي وانصحوني لغاية بكرة إن شاء الله بعد صلاة العشاء
والله أنا خايف أرجع للتاجر يقوم يتأمر عليا
العربية بدأت أقتنع بيها أكتر وأكتر خصوصا إنها بتلبي كل احتياجاتي ، واسعة ومصاريفها قليلة ومشاكلها بسيطة ديتها زيارة للعفشجي كل شهرين ثلاثة ، وتستحمل شوارع مصر ، لكن بقول لنفسي بعد سنتين ثلاثة مش هيبقى ليها سوق خالص تقريبا ، مش عارف أعمل إيه ؟ وكمان لو رجعت للتاجر بعد ما سبته ومشيت أول مرة هيبيع ويشتري فيه وجايز يغليها علي أكثر باعتبار إن أنا رجعتله برجلي تاني .
عامة ما حدش هياخدها غير صاحب نصيبها
فعلا يا إخواني اشتريت النهارده
طول الأيام اللي فاتت وأنا محتار ، وكل مابدأ أفكر في 128 أو ماروتي أو 131 وهي العربيات اللي ممكن تكون نضيفه وفي نفس السعر ألاقي إن اللادا رغم عيوبها وخصوصا العربية إللي أنا شوفتها دي لأنها تقريبا فابريقة أميل فورا إلى اللادا . على الأقل عربية أنا عارفها كويس وما عملتش معايا أي دقه نقص قبل كده .
النهاردة بعد العصر صحيت من قيلولة الظهر حاسم أمري ورحت وخلصت على 29 ألف و250 عمولة و مصاريف التسجيل بكرة إن شاء الله حوالي 350 جنيه . والحمد لله أنا راضي جدا عن قراري . وأشعر بأني حصلت بفضل الله على الحل المثالي لكل مشاكلي مع المواصلات . وسبحان الذي سخر لنا هذا وما كنا له مقرنين . والحمد لله رب العالمين.