أولا العربية فيات تمبرا موديل 1994 هاف إنجيكشن ( طلمبة البنزين كهرباء ) .. استيراد للمعاقين .. الحكاية بالتفصيل كالآتى : كان عندى تنقيط بنزين و رحت للميكانيكى لقى فى تسريب من الوصلات و خراطيم البنزين .. المهم غيرهم و غيرلى بالمرة فلتر البنزين .. بعدها بفترة رحت افول العربية و مشيت عادى و كله تمام لحد ما تفويلة البنزين استهلكت منها النص تقريبا .. و هنا بقى بدأت المشكلة .. تنتيش و تقطيع و تبطيل .. و معرفتش امشى بالعربية خالص .. دخلت بنزينة عشان افول و فولت العربية لقيت العربية بقت تمام و كأن كان عليها عفريت و انصرف !!!! .. قلت يا واد تابعها لحد ما تعرف المشكلة بالظبط فين .. استنيت لما تانك البنزين جه على النص ( تقريبا لأن العوامة عطلانة من زمان و ما صلحتهاش لأن سعرها غالى جدا 350 جنيه ) لقيت نفس المشكلة تانى ( تنتيش .. تقطيع .. تبطيل ) .. رحت فولت المشكلة راحت كالعادة !!!!! قلت مابدهاش استنى لما تعمل كدة تانى و عليك و عالميكانيكى .. رحتلو أول ما المشكلة ظهرت و قبل ما أفول .. كشف على تانك البنزين و فك طرمبة البنزين و قعد يشتغل فيها شوية و ركبها تانى و قاللى جرب كدة .. جربت لقيتها تمام و المشكلة راحت .. حاسبته و مشيت .. و بعدين فولت العربية بعدها بيوم .. و فضلت ماشية تمام لحد ما تانك البنزين بقى على النص تقريبا .. و للأسف رجعت تانى و كأنك يا ابوزيد ما غزيت .. قلت احاول اتعرف على تفاصيل المشكة أكتر .. فضلت دايس بنزين و انا على المور لحد ما الآر بى إم وصل ل 4 .. فضلت مثبت رجلى حوالى نصف دقيقة لقيت الآر بى إم نزل لوحده و العربية بطلت .. كررت التجربة تانى و نفس النتيجة بتحصل ( الآر بى إم ينزل و العربية تبطل ) .. الكلام ده أنا عملتو النهارده .. عايز رأيكو فين المشكلة بالضبط و حلها إيه .. و آسف جدا للإطالة .. أخوكم محمد سيد .