روقت جولف 3 مرات النهاردة الصبح ;) و من غير السبورت مود كمان :)
مساء الفل يا رجالة البيجو و كل سنة و انتم طيبين
النهاردة الصبح و انا رايح الشغل و انا طالع على جسر السويس لقيت قدامى عربية جولف راكب فيها 2 شباب و مدلعينها و الدنيا تمام، قلت ما شاء الله و ربنا يباركلهم فيها و مشيت (اصلى انا كنت عايز اجيبها :B4_007: بس الbudget مسمحتش)
المهم دخلت جوزيف تيتو اتجاة الدائرى و لقيتهم واخدين نفس الطريق بس هم كانوا سابقنى ببتاع 100 متر و بعدين على طلعة الدائرى قفل علية عربية نقل فى الملف بتاع المطلع فعطلتنى شوية و الواحد كان لسة مش فايق و مش طالبة غرز و لعب مع النقل الساعة 7 الصبح فشدوا هما طبعا و سبقونى بشوية حلوين و انا كدة كدة مكنش فى دماغى اصلا (دى جولف، خفيفة و موتورها اقوى و ثباتها احسن و Volkes!!!). خدت سكتى عادى و شديت مع الطريق و فجأة لقيتهم تانى قدامى بعد اليوتيرن التانى فى اتجاة طريق السويس، طبعا انا ساعتها كنت شادد على 120-130 و كان صوت الموتور عالى و مغرى، عديت من جنبهم و ضربت الغرزة قدامهم و كملت و قلت لو هم بتوع شد و كدة مش هيعدوهالى (رغم انى مكنتش قاصد استفزهم بس فعلا الغرزة الوحيدة المفتوحة قدامى كانت قدامهم) بصيت فى المرايا لقيتهم مكدبوش خبر و لقيتة شادد ورايا على طول اكصدام فى اكصدام و عمال يقلبلى نور، قلت فى نفسى دى جولف و انا كدة هحرج نفسى بس تعالا نشوف الطريق هيودينا لفين و اهو برضة نفوق على الصبح.
و عليها وسعتلة شوية سكة عشان نسخن المواضيع و سيبتة يخش جمبى و قمت دايس و قلت كل واحد يشوف هيعمل اية، سيبتة ياخد الشمال عشان انا بحب اجرى فى اليمين و هوب غرزة قى غرزة فى غرزة لقيتة اتزنق و معرفش يفلفص و معدتش شايفة فى المرايا :mahf(5): قلت اية دة و ملحقناش نسخن و كدة و قمت واخد سرعة الطريق 110-120 و كملت سكتى.
مفيش نص دقيقة و لقيتة اية جاى هوا من ورا و قام داخل قدامى :dontudear: (انت كدة غلط فى نجم غلاف اخبار الحوادث)، مبدهاش بقى، قمت جايب أخر الدواسة عشان اجيبة، العربية فجأة اتحولت:eee: و قامت مسقطة نقلة و حرق على الغيار لحد 5 و 5.75 فى الred zone (انا قبل كدة كنت بتقل رجلى بس بخليها تنقل على 4.5 بالكتير قوى) العربية طارت وراها و برضة خدت يمين و لبستة فى الشمال و غرزة فى غرزة فى بتاع كيلو كنت عديتة و قمت هديت شوية و اديتلة ستوب شوية و قمت مكمل جرى و على ما وصلت المطار كان اتروق على الاخر و مبقاش ظاهر فى المرايا. قلت زمانة كدة استكفى و قعدت ابص انا للعربية و انا مستغرب من الacceleration السريع اللى عملتة. و هديت عشان مبحبش اعدى فواصل كوبرى السويس بسرعة لانها غبية جدا.
على ما وصلت بنزينة توتال اللى عند ميراج لقيتة جة تانى و المرة دى انا لبست اليمين (اليمين فى الحتة دى لحد نفق الزهراء كلة مطبات هوا و السواقة علية سيئة للغاية) بس خلاص بقى فى Adrenalin Rush و مفيش مجال للتراجع و دى بقى كانت سباق سرعة مش غرز عشان الحتة دى كانت فاضية و برضة قبل ما نوصل بنزينة شيل كنت علمت علية رغم ان العربية كانت عمالة تتنتط على المطبات و كملت شد لحد النفق وساعتها كان اختفى برضة. و مظهرش تانى لحد المعادى :bye: بس سابنى سخنان على الطريق :00020140:. طبعا فى مطلع النفق مايكروباص زنق على ناحية السور و عمال يقفل و عمال اديلة كلاكس و مفيش فايدة وانا جاى بسرعة، اضطريت ادخل فى الرمل اللى جنب السور بنص العربية اليمين عشان اعدية :untitled 1: قمت متبت فى الدركسيون جامد و قلت ربنا يستر و انا بطلع من الرمل، و فعلا طالع قدامة لقيت العربية كانت عايزة تلعب شوية بس قامت ماسكة نفسها بسرعها مكنتش انا متوقعها (بالمنظر دة لو كانت نازلة بالesp كان زمانها ولا الهوا :B4_388:) قلت الحمد لله ربنا سترها و كملت طريقى.
بعد كدة و انا ماشى افتكرت ان فى الsport mode و انى مدوستش علية خالص، بصراحة كان نفسى افتكروا و ادوسة عشان كل مرة بنساة (لسة شادد برضة يوم الخميس اللى فات مع C3 سايقها واحد مجنون اكتر منى و نسيتة برضة). بس معتقدش انة كان ممكن يطلع من العربية اكتر من كدة لانها نقلت على 6 تقريبا، بس اية بقى العربية اتعفرتطت بقيت الطريق بقيت كل ما ادوس فرامل احس انها زعلت و اول ما المس البنزين تجرى على طول.
العربية دى لو كانت تقيلة شوية و نازلة بالesp ووحدات رفع بزراير القزاز فى الباب، كان هيبقى فيها كل حاجة بجد و كانت هتبقى ركوبة ملهاش حل فعلا :tumb: