يا ترى لسة فى رجال فى زمن ماتت فيه الرجولة؟ممكن حد يفهم مشكلتى؟

بسم الله
انا سجلت هنا مخصوص فى المنتدى...عشان انا مليش سند .......متستغربوش
ايوة مليش سند.........وعايزة حد عاقل حكيم يفهم مشكلتى ويدلنى على حل على بصيرة
صحيح وضع محرج انى اكتب مشكلتى وسط شباب
بس الضرورات تبيح المحظورات
اعتبرونى بنتكم او اختكم
وانا على يقين ان كلكم هنا محترمين ومحدش هيرد بردود جارحة او خارجة عن الاداب
================================================== ==

الحكاية فعلا .........انى مليش سند غير ربنا سبحانه وتعالى
انا بابايا ضعيف الشخصية ومعتمد اعتماد كلى على مامتى.....واتجوزها عشان تساعده
فى مصاريف البيت ......واستغلها اقصصى استغلال ...برغم كدا بابا طيب جدا
ومامتى كمان طيبة اوى .....بس للأسف اى ست بتدخل فلوسها فى بيت جوزها
بيبقى ليها السيطرة وكامل التصرف فى البيت والراجل بيبقى عامل زى عمود النور
معلش سامحونى ...لو فى اى اب هنا زى بابايا ....يسامحنى على الوصف دا
بس دى الحقيقة ...ومفيش داعى نعمل نفسنا زى النعامة وندفن راسنا فى التراب

بابا كان كل خلافاته مع ماما على الماديات والفلوس وانه عايزها تحط كل راتبها فى البيت
دا غير عليها كل مسؤليات الزوجة الكاملة.......من طبيخ لتنظيف لتربية اطفال لرعاية زوج
وبابايا كان سلبى لدرجة كبيرة .......ربنا يسامحه
مكنتش تقدر تعتمد عليه فى حاجة فى البيت من اصلاح شؤون البيت
او الأجهزة الكهربية او غيرو ...........كان دايما بيتحجج انه عنده شغل كتير
وياريتنا شوفنا من شغله فلوس تكفينا التزامتنا
كانت ماما مسؤلة تكسينا وتجيبلنا الحاجات الثانوية الى محتاجينها
وبابا كان كل الى بيصرفه على الاكل والشرب والتعليم وبسس
لكن لو حد فينا تعب او مرض .............بابا مستحيل يدفع فلوس لعلاجه وكانت ماما بتتولى هذه المهمة
دا غير انها كانت لازم تقوم بدور الراجل والست فى التربية
بس انا كنت بطبعى بعمل لبابا حساب وكنت بحترم وجوده فى حياتنا وانه راجل البيت
ومنقدرش نستغنى عنه لأنه ضلنا

وطبعا كان صعب على ماما تقوم بكل الادوار دى
فمرضت بمرض خطير وتعبت ورقدت فترة فى السرير ........وكنت انا المسؤلة عن البيت
بدل ماما وفى الوقت دا انا كنت صغيرة .........فى اعدادى
وللأسف ماما كانت مدلعانى انا واختى شوية .....واخواتى الصبيان كانوا متحملين المسؤلية
شوية ............
بس انا بعد تعب ماما ........نسيت اى دلع وحسيت ان على عبئ كبير فى الدنيا
ومشيت بى الدنيا والحياه
وكبرت .....وكبر جوايا مشاعرى واحساسى كأنثى وكأى انثى
وعديت فترة المراهقة بسلام تام............لأنى كنت بخاف ازعل ماما واقهرها فى تربيتها لينا
ورفضت اى محاولات للاغراء بالحب والمشاعر والصداقة بين الجنسين
وعمرى ما كلمت ولد غريب غير يكون قريبى وبس
لحاد ما دخلت الجامعة وشفت البنات بتحب وتتخطب وتتجوز كمان
وتمنيت انى اعمل زيهم ويبقى لى اسرة وبيت وزوج يحبنى واحبه ويعطف على واعطف عليه
وكان ممكن اقع زى اى بنت فى الجامعة وسن المراهقة ........واتعلق بشاب وادخل فى
الصحوبية المحرمة وغيره
وللأسف انا كان لبسى عادى مش شرعى وشعرى كان باين وكدا فكانت الاغرائات كتير اوى
وملقتش حد يوجهنى ويقولى يا بنتى البسى واسع يا بنتى احمى نفسك من عيون الذئاب

وكل كام يوم كانت تجيلى واحدة زميلة تقولى .........فلان معجب بيكى ونفسه تردى عليه وتديله اعتبار
وانا كنت.......عبيطة اوى كنت فاهمة انه معجب يعنى ........هيروح يتقدم لبابا
ولما كنت بعرف الحقيقة طبعا كنت برفض اى صداقة من نوع الاعجاب والصحوبية
لحاد ما ربنا هدانى وقررت البس الحجاب وغطيت شعرى
الحمد لله.............وقررت انا واصحابى البنات اننا منصاحبش ولاد ولا صداقة بريئة ولا غير بريئة
لكن اصحابى للأسف رفضوا ...........واتفصلت عنهم انفصال جزئى ....بقيت بصاحبهم بس
عشان المذاكرة والدراسة .......والعلاقات الاجتماعية العادية والخروجات
لكن فى الكلية ............مليش دعوة بيهم
ودا كان سبب فى احساسى بالوحدة وان اصحابى خزلونى
الى كنت فاكرة انهم مؤدبين ومحترمين لأقصى درجة
لقيت غربة فى كل مكان حولى
فى البيت رافضين حجابى وسترى
وفى الكلية بيضغطوا على عشان اعصى ربنا واعمل علاقات محرمة
وفى الشارع ...معاكسات ومضايقات وتحرش وارف
الى غطى وكمل ان اهلى حرمونى من الحلال الطيب
ايوة حرمونى وانا مقهورة
حرموا على الخطوبة والجواز الا بعد ما يتجوزا اخواتى كلهم واتخرج انا من الجامعة واشتغل و
اصرف على نفسى
رفضوا تماما اى عريس يدخل البيت من بابه
رغم اننا عيلة محترمة جداا واسرة مؤدبة وعلى خلق عالى
ازاى اهل يقرروا قرارات مصيرية زى دى
بقيت همووت من القرارات التعسفية دى
لانى نفسى ارتبط بالحلال الطيب ورغم انى رومانسية جدا ومشاعرى رقيقة
بس كان كل هدفى انى اعمل اسرة وبيت بما يرضى الله واحب جوزى فى الحلال
محدش فى البيت فهم الحقيقة المرة دى
حاولت اوسط حد من قرايبى عشان يفهموا انى ممكن اقع فى المعاصى
لو اخروا جوازى
ماما رفضت رفض تام
وخصوصا ان اختى كانت اتخطبت خلاص وكانوا بيدبروا ليها مصاريف الجواز باى طريقة
واخويا كمان خطب وكنا بنشد الحزام على نفسنا
عشان اخواتى يتعفوا
طب وانا ؟؟؟؟؟؟؟هو انا مش من حقى العفاف؟؟؟انا مكنش لى اى طلبات فى شريك حياتى
سوى انه يكون واحد بيخاف ربنا ويحبنى ويراعى ربنا فى .......كنت مستعدة اقبل انسان بسيط
جدا ومتواضع فى مادياته ...........ونبدأ من الصفر سوى
ليه المجتمع الزم المرأة انها تشارك فى اساس البيت؟
ليه اى اتنين ماديتهم بسيطة ميبدأوش بحاجات بسيطة وبعد كدا
ربنا هيوسع عليهم؟
المهم ان الى حصل حصل واتكتب على اكتم مشاعرى وادوس على قلبى
واتنحى جانبا بعيد عن اعين الرجال
لأنى زى ما فهمتكم انى رومانسية واخاف على نفسى من الذلل
وبالفعل رضييت بالامر الواقع وقدرى فى الحياه
وخلصت الجامعة وبدأت المأساه الحقيقة ..........
بابايا اجبرنى بالوظيفة والعمل الحكومى
حاولت افهمه ان المصالح الحكومية مؤرفة وزبالة والشباب مختلط بالبنات
وحاجة ارف و سفالة وقلة ادب وبجاحة البنات مع الشباب لا توصف
لكن الحمد لله عرفت اقنع بابا واشتغلت فى مكان خاص
لكن عادة لا تأتى الرياح بما تشتهى السفن
اشتغلت فى مكان محترم جداااااااا بس بردو مختلط
وحصلتلى نفس المشكلة ...........كذا شاب .....معجب وكلام من دا
لكن ولا واحد فيهم ............حسيت ناحيته باى مشاعر او انه يصلح يكون زوج المستقبل
الى بتمناه
بصراحة انا مشفتش راجل مكتمل الرجولة فى حياتى الا ناااااااااااااااادر جداااااا
الخلاصة ...............سبت الشغل لأنى زهقت من الاختلاط والارف
واقتنعت تماما ان الاختلاط دا اخرته سودة
وان البنت بيتكسر قلبها ..............وبتتبهدل اخر بهدلة
..........................................
دى رسالة لكل اب ارجوكم ارجوكم ارحموا بناتكم واستروهم وخبوهم
ليه تبهدلوا البنت الى ربنا عززها فى القرآن؟
قررت من بعدها انى اعتزل العمل تماما خارج البيت
واتفرغ لرعاية والدتى المريضة
وطبعا حسيت براحة شديدة بعيدة عن الاختلاط واعين الشباب
وبدات الحمد لله اقرب من ربنا سبحانه وتعالى
ورحت دار للقرآن وبدأت احفظ قران واهتم بدينى
فى الوقت دا كان بدأ العرسان يهربوا تقريبا من بيتنا
هتقلولى ليه؟
هقولكم ................................السبب فى علاقة بابا بماما
ماما هى الى صوتها عالى فى البيت وهى الى اوامرها تتنفذ
ماما مش بتحترم بابا للأسف
بابا بيضرب لخمة مع اى عريس وممكن اى حد يستعبطه
بابا مبعيرفش يتكلم فى موضوع هام او اسرى او اجتماعى ويقلبه سخرية وضحك
وكلام فى الكورة والسياسة الخايبة
من الاخر اى عريس كان بيجى البيت
مكنش بيلاقى راجل يتكلم معاه
.............وانا بطبيعتى خجولة جدااااااااا......او كنت خجولة
وطبعا انا بنت معرفش مصلحتى فين .........مفروض لى اب هو الى يعرف ويوجهنى
بس بابا.........كان مكبر دماغه
كل الى يهمه عريس يشيل الليلة او ياخدنى من البيت وماما هى تحهزنى
وتشارك فى الفرش
مش مهم العريس دا يبقى متدين ولا انسان عادى ولا اى حاجة
المهم عند بابا انه ميكنش بيشرب مخدرات او بتاع بنات
----------------
هتقولولى اخواتى فين
اختى اتجوزت وهاجرت برة مصر
واخواتى اتجوزوا وانعزلوا عنا تماما
وماما لغت شخصية كل راجل فى البيت .........ربنا يعفو عنها
-------------------
من الاخر مكنش لى راجل يترد عليه ............مكنش لى سند
لحاد ما ربنا قدرى فى جوازة مصيبة وعشت اسوأ ايام حياتى
شاب ...كنا فاكرين انه متدين ويعرف ربنا
طلع اسوأ انسان على وجه الارض وذلنى واهانى وكان دايما يعايرنى بأمى
طب انا ذنبى ايه ان امى كدا؟؟
ذنبى ايه ان ابويا..........معرفش يحكم بيته؟
ذنبى ايه ان ابويا ضعيف الشخصية؟
الشاب دا كان بيحبنى جدا وكان مهتم بى وادانى الى ملقتوش مع بابا وماما واهلى
بس ميعرفش ربنا ..............مش بيخاف ربنا ..........كان مستعد يعمل اى حاجة فى الدنيا
تغضب ربنا عشان يرضينى ويجيبلى الى بتحلم بيه اى بنت
بس انا كان كل الى يهمنى السعادة ...........مش الفلوس ولا الحياه الرغدة
لما كان بيهينى او بيضرنى .........كنت بسكت .........عشان مكبرش الموضوع
وعشان عارفة ان مليش ضهر او سند
عمرى ما جريت وهربت وسبت البيت ............كنت مستعدة اواجه المشاكل بشجاعة ولوحدى
بس كان معايا ربنا
بس مكنش بيسمع وكان دايما يهرب من حل المشاكل
ومكنش له كبير يترد عليه
لحاد ما نفد صبرى معاه واتضررت منه اشد ضرر نفسى وجسمانى
وقررت انى اخلص منه واطلق قبل ما اخلف وابنى او بنتى يتحطموا ويعيشوا حياه مأساوية

بس اهلى رفضوا يقفوا جنبى ورفضوا الطلاق
بحجة ان سمعتى وشكلى هيبقى وحش فى المجتمع لما يعرفوا انى مطلقة
بس انا صممت ووقفت لوحدى فى الطلاق وتم الطلاق بالفعل
كللللللللللللللل دا....................مليش سند ولا راجل اسند عليه
كان مكتوب على اواجه الحياه لوحدى .........وانا بنت ضعيفة .........هشة ...........رقيقة
دى مش مميزات على فكرة .........دى عيوب ............البنت الرقيقة الهشة البسكوتة
بيبقى جرحها صعب اوى ..........ومشاعرها حساسة جدا .............وبتتعب اى راجل
يتعامل معاها ...........لأنها بتعامل الناس برقة وحساسية ومحتاجة الناس
تعاملها نفس المعاملة

بس احنا فى مجتمع الرجل .........بيبقى فاهم الرجولة يعنى سطوة وعنف واهانة وسيطرة على الزوجة
وجرحها وعدم مشورتها
---------------------------------------------===================
لما رجعت بيت اهلى
لقيت بابازاد فى قلة الرجولة
وصمم بردو انى انزل وادور على شغل زيى زى اى ولد
غير كدا انا مش حاسة بالامان مع بابا
بالعكس ............انا مش حاسة ان فى راجل فى البيت يحمينا من الذئاب
يعنى هقولكم مثل ........................استحملونى شوية واعتبرونى زى اختكم
فى يوم كنت نازلة بشترى طلبات البيت كالعادة(اصل ماما لازم تنزلنى بليل اشترى طلباتها)
واحنا عمارتنا مفيهاش بواب
وانا راجعة كان شباب واقف وقاعد يعاكس على بوابة العمارة ......شباب صايع كدا
عيال مراهقة يعنى من الشارع
وانا خفت طبعا جدا وكنت هموت فى جلدى
وبقيت بسبح ربنا فى سرى واستغيث بيه

وحاولت اقفل بوابة العمارة لقيتهم واقفين مستنيين تحت
دخلت البيت بسرعة وانا بجرى
بصيت لقيت ابويا جوا البيت............بقولوا يابابا انا كنت بصرخ برة
انت مسمعتنيش ؟؟
قالى مسمعتش حاجة
قلتلوا حصل كذا وكذا
قالى سيبك منهم وملكيش دعوة بيهم
قلتلوا ازاى ؟؟ انت هتسكت مش هتنزل تبهدلهم؟
وانا مفروض كنت نازلة تانى .........عشان اغير الدوا لماما
لقيت بابا بيقولى انزلى وايه يعنى لما شباب يقف يعنى همسكلهم المطوا
نزلت وانا بعيط بحرقة
وكأنى بستنجد بيهم هما
ونفسى اقولهم .....................انا اهو مش خايفة منكم
لأن فى الاقوى منكم هو ....................ربنا
صحيح انا مليش راجل يسندنى
بس لى ربنا
.......................سبحان الله .............لقيتهم زى ما يكون خافوا منى واترعبوا معرفش ليه
وجريوا كلهم
=========================
بعدها قررت انى البس عبايات وتبت الى الله من لبس الجواكت والجيبات
ووسعت لسى جدا وكل لبسى ساتر وقاتم
طبعا بابا وماما رفضوا شكل لبسى
بس الحمد لله رضيوا بالامر الواقع
======================================
حاجة كمان بتحسسنى ان مليش راجل فى الدنيا يخاف على ويحمينى وياخدنى فى
بابايا .............بيسيب البلكونة مفتوحة .........ممكن اى شاب من الجيران يبص علينا جوا البيت
ويكشفنا
وكام مرة انبهه على كدا ........وياخد الموضوع بهزار وضحك ويزعل
ويقول انتى هتحرمى علينا كل حاجة
المصيبة بأة الكبيرة اى بتكسف اقولها لحاد
ان بابا ممكن يدخل على راجل غريب
ايوة ...........صدقوا ..........بس ازاى تصدقوا !!
انا نفسى مش مصدقة
ممكن مثلا بتاع الغاز يدخل وانا مش لابسة حجابى ويدخله علينا فجأة
ممكن النجار او السباك .....اصحى من النوم الاقيه فى وشى
رغم ان بيتنا فيه ستاير
مرة كنت نايمة ولقيت صوت راجل غريب هيدخل اوضتى اه والله
بابا كان بيحسبنى خرجت برة البيت
لولا انى صرخت ......الراجل النجار خاف واتكسف
ممكن مرة لو سافرت مع بابا
وركبنا اوتوبيس
يركبنى جنب راجل وهو يركب جنب راجل
طبعا كلكو بتضحكو ا دلوقت ......................مواضيع كوميدية جدا ........شفتوا ازاى
مرة زمان ركبت معاه المترو..........ركبنى مترو زحمة جدا وكله رجالة وتحرشوا بى و
هو واقف محلك سر
مرة سافرت معاه.......وركبت ميكروباص........يدخل يركب هو الاول وبعدين انا

لولا انى بحترم بابا ......لكنت كرهته .............ولولا انى بخاف ربنا
لكنت هربت من البيت من زمان
كان ادامى فرصة اسافر دولة عربية اشتغل فيها
وكان فى فرصة للهجرة لأمريكا
بس خفت اسافر لوحدى وحد يعملى حاجة وحشة
=============================
يا ترى لو كنتو مكانى كنتو هتعملوا ايه؟
يا ترى كل واحد فيكو شايف ان لسة فى رجالة فى البلد؟
يا ترى لو ليك اخت او بنت عمة او بنت خالة فى مكانى كنت هتتصرف ازاى؟

اسفة انى كشفت ليكم حقيقة غايبة عن ازهان كل المسلمين والمصريين
ان البنت المصرية مكتوب عليها تبقى راجل وست فى نفس الوقت ...........طب ازاى !!!

ازاى كل شاب بيتمنى يرتبط ببنت رقيقة ورومانسية
وفى نفس الوقت عايزها تصرف عليه وتساعده فى المعيشة وكمان عليها كل مسؤوليات البيت؟؟
هو دا عدل يا شباب مصر ولا ايه؟؟
==========================
الى حصل فى النهاية
ان بدل ما الاقى الناس تتعامل معايا بشفقة على الاقل
الناس طمعانة فى
وناس حاقدة عليك
تقدروا تقوليلى ليه؟
ليه مجتمع النساء كلو كدا؟؟ انا بحس ان المصريات بالذات
لأن لى اصحاب اجانب وعرب .......معنهموش الحقد دا والغل والحسد دا
طب طمعانين فى ايه؟
تخيلوا طمعانين لما عرففوا انى مطلقة ولى مؤخر صداق
طب حاقدين على فى ايه؟
حاقدين على البؤس والشقاء الى انا عايشاه؟
انا عمرى ما عملت فى حد حاجة وحشة وكنت بساعد الناس كلها
ومع ذلك كان المقابل ......................الغدر ............الخيانة ...............الاهمال
ليه كل عريس دلوقت بيجى .........عشان المطلقة دى منبوذة ودرجة تالتة
ولازم تتنازل عن حقوقها الشرعية لأنها مش لاقية راجل يلمها
ليه كل عريس دلوقت بيجى بيدعى التدين .......وانه بتاع ربنا
وهو معندوش ريحة الاخلاق ولا الذوق ولا الادب
ليه تلاقى عريس محترم ومن عيلة محترمة ومؤدب وتلاقيه يجرح فى بنات الناس
عشان سبق واتجوزت .........يعنى مستعملة قبل كدا

طب ما السيدة خديجة رضى الله عنها
كانت متجوزة قبل كدا مرتين ومع ذلك النبى صلى الله عليه وسلم حبها حب كبير اوى
وكان سعيد جدا معاها
انا عايزة اقول رسالة لكل شاب بيفكر كدا فى البنت المطلقة الى ملهاش سند فى الدنيا
ان ربنا .........ذو انتقام ..........ربنا اسمه الديان
هيجى اليوم وبنتك او اختك يحصلها كدا
==========================
الى حصل ان كل واحد بيدخل بيتنا .........بيقول مقدرش اتجوز من البيت دا
بيت الراجل ملوش كلمة والام هى الى بتفكر وتدبر
بيت الام مش بتحترم الاب
بيت مفيهوش راجل اتكلم معاه بخصوص الجواز واتفاهم معاه
طب حد يفهمنى
انا اجيب راجل منين؟
البس ماسك واركب شنب واعمل نفسى راجل البيت وبعدين
ادخل اغير هدومى والبس انثى؟
انا مش بهزر
انا بتكلم جدا

لا حول ولا قوة الا بالله.

ربنا يعوضك بالزوج الصالح اللي يعوضك عن كل اللي شوفتيه ان شاء الله.

تقريبا قرات اغلب الموضوع
وفي حاجه مهمه جدا لازم تخدي بالك منها
اللون الاحمر في الكتابه مخصص للاداره فقط .

لا حول ولا قوة الا بالله
معلش المؤمن مصاب ، قربى من ربنا اكتر ، انتى اكتر واحدة عارفة ربنا لطف بيكى قد ايه في حياتك ، انتى كان ممكن مع كل المعطيات اللى قلتيها دى يكون وضعك اسوأ من كدة بكتييييييييير فوق ما تتخيلى ، فالحمد لله على كل حال ..
ان مع العسر يسرا ، ان مع العسر يسرا .. ان شاء الله فرج ربنا قريب ، وثوابك بإذن الله كبير في الاخرة وربنا مش هيضيع تعبك ومعاناتك في الدنيا ، ان شاء الله كل اللى مريتى بيه يكون سبب في رفعة درجاتك يوم القيامة في الحياة اللى بجد ، الحياة الابدية

ربنا يصلح حالك ويسترك في الدنيا والاخرة يا اختى العزيزة ويعوض صبرك خير اللهم امين يارب العالمين ،خالص دعواتى لكِ بظهر الغيب ربنا ينورلك طريقك ويبعد عنك ولاد الحرام

للأسف مش لاقية ايكونة تعديل المشاركة عشان
اغير اللون الاحمر

ربنا يعوضك الزوج الصالح.

بالنسبه لموضوع "بيقول مقدرش اتجوز من البيت دا
بيت الراجل ملوش كلمة والام هى الى بتفكر وتدبر
بيت الام مش بتحترم الاب
بيت مفيهوش راجل اتكلم معاه بخصوص الجواز واتفاهم معاه"

ده بيبقى عن جهل ان البنت بتبقى زى امها فا بالتالى انتى كمان هتعملى كده.

ربنا يصبرك.

والله الواحد فعلا مش عارف يرد ..... مشاكل بتزيد مع بلد بقى فيها ناس بتأكل فبعض ..... كل إلي أقدر أؤلهوليك إنه ربنا كبير و قريب جدا و هو الوحيد هيخرجك من عسرك و بكرة تشوفي كرم ربنا..

ربنا يفرجها عليكي ويرزقك الزوج الصالح ويجزيك خير

العبد في هذه الدنيا معرض لصنوف من البلاء، والاختبار، وما ذلك إلا ليعلم الله ـ تعالى ـ من العبد صبره ورضاه؛ وحسن قبوله لحكم الله وأمره، قال الله تعالى
{ الَّذِي خَلَقَ الْمَوْتَ وَالْحَيَاةَ لِيَبْلُوَكُمْ أَيُّكُمْ أَحْسَنُ عَمَلاً }.

والإنسان عندما يصاب بمصيبة، فإن له أحوالاً في تقبل تلك المصيبة، إما بالعجز والجزع، وإما بالصبر وحبس النفس عن الجزع، وإما بالرضا، وإما بالشكر.

قال ابن القيم (ت751هـ) ـ رحمه الله تعالى ـ:( والمصائب التي تحل بالعبد، وليس له حيلة في دفعها، كموت من يعزُّ عليه، وسرقة ماله، ومرضه، ونحو ذلك، فإن للعبد فيها أربع مقامات:

أحدها: مقام العجز، وهو مقام الجزع والشكوى والسخط، وهذا ما لا يفعله إلا أقل الناس عقلاً وديناً ومروءة.
المقام الثاني: مقام الصبر إما لله، وإما للمروءة الإنسانية.
المقام الثالث: مقام الرضى وهو أعلى من مقام الصبر، وفي وجوبه نزاع، والصبر متفق على وجوبه.
المقام الرابع: مقام الشكر، وهو أعلى من مقام الرضى؛ فإنه يشهدُ البليةَ نعمة، فيشكر المُبْتَلي عليها)


الدنيا دار ابتلاء وامتحان؛ لذا فهي مليئة بالمصائب، والأكدار، والأحزان، كما قال الله سبحانه وتعالي :

( وَلَنَبْلُوَنَّكُمْ بِشَيْءٍ مِّنَ الْخَوفْ وَالْجُوعِ وَنَقْصٍ مِّنَ الأَمَوَالِ وَالأنفُسِ وَالثَّمَرَاتِ وَبَشِّرِ الصَّابِرِينَ )،

وقال عز وجل:

( لَقَدْ خَلَقْنَا الْإِنسَانَ فِي كَبَدٍ ).



ندعوا الله ان يرزقك الزوج الصالح . وان تكوني زوجة صالحة له .

مشكلتك ليست عندك فقط فهناك كثير عندهم نفس المشكله تقريبا
من اب ضعيف الشخصيه ..عذرا
لمجتمع محيط يحتاج فعلا اعاده تأهيل الا من رحم ربى
ومشكله عدم الاختيار الصحيح فى بدايه الزواج أو الخداع فى بدايه الزواج.... مع ان فى حكايه ان زوجك كان يفعل المستحيل ليرضيك لدرجه انه ممكن يغضب ربنا والعياذ بالله وفجأه انقلب واصبح يضربك ويهينك ومكنش له كبير وايضا انتى لم يكن لك كبير
وعلى فكره بردوا انت تتحملى جزء كبير من المشكله لان اخواتك البنات من نفس الاب ونفس الام بسلبيات الاب و... ومع ذلك حياتهم مستمره
ان شاء الله يرزقك بالزوج الصالح وتجدى فيه الرجوله وتحمل المسئوليه ويعمل بقول رسولنا الكريم .. الرفق بالقوارير

اولا
ربنا سترها معاكى ان الزواج لم يسفر عن اطفال وهو اخطر ما فى الموضوع

ثانيا

انت تحملين والدك مسؤلية كاملة عن اختيار زوج فاشل !!! واين كان رايك الشخصى طالما لا ترين فى والديك النصح والارشاد والخبرة الكافية فى الحياة !! الزواج معروف انة يتحمل مسؤليتة الزوجين فقط وليس الاهل!! وعلى هذا فانت من اخترتى وليس اهلك وبتعية فالخطاء الاكبر منك انت شخصيا

ثالثا

انت تنظرين الى كل رجل على انة ينظر اليك بنظرة الدنيوية والشهوة فقط وكما يوجد مطلقات محترمات فيوجد ايضا رجال محترمين وعلى خلق ودين

رابعا

اشعر من طريقة كتابة كلامك انك مازلت لم تتعلمى من التجربة السابقة رغم قسوتها !! وانك ممكن تكررى نفس الغلطة وتنخدعى فى المظاهر الكاذبة اوحتى كلام من شخص حنون وعاطفى تفتقدية بسبب صورة الرجل الاب السيئة فى عقلك الباطن وهو اسوء ما فى حكايتك حتى الان

خامسا
سوال يجب ان تسالية لنفسك لماذ تغير سير حياتك الزوجية من ان الزوج يفعل كل ما فى وسعة لارضائك الى زوج قاسى يضرب بمشاعرك ضرب الحائط اكيد العيب ليس فية لوحدة واكيد الخطاء مشترك منكم واكيد زوجك القادم سيسالك نفس السوال ما الذى جعل زوجك يتعير من حال الى حال!!!واغلب الظن انك حملتى زوجك فى شئ ما فوق طاقتة مما جعلة ينفر منك ويتحول من حال الى حال وجعلة ينتقم منك بهذة الصورة البشعة

اخيرا

اعتذر لك على كلامى القاسى الشديد الذى ستعتبرينة كما اظن ...فية قسوة ومنفر وهروب من تحمل نتيجة اخطائك ومواجهة عنيفة مع النفس الامارة بالسوء ولكنها مواجهه عنيفة مع نفسك حتى لا تكررى خطائك مرة اخرى

والبداية سهلة جدا لحياة جديدة وصفحة جديدة شرط ان تعرفى من انت من داخلك دون تجمل او تدلل لتقييم نفسك

هيا دى حال الدنيا واصبرى واستحملى واكيد ان شاء الله الحال هايتغير وربنا يرزقك بالزوج الصالح

اقتباس:

---

المشاركة الأصلية كتبت بواسطة طارق _عبد السلام

مشكلتك ليست عندك فقط فهناك كثير عندهم نفس المشكله تقريبا
من اب ضعيف الشخصيه ..عذرا
لمجتمع محيط يحتاج فعلا اعاده تأهيل الا من رحم ربى
ومشكله عدم الاختيار الصحيح فى بدايه الزواج أو الخداع فى بدايه الزواج.... مع ان فى حكايه ان زوجك كان يفعل المستحيل ليرضيك لدرجه انه ممكن يغضب ربنا والعياذ بالله وفجأه انقلب واصبح يضربك ويهينك ومكنش له كبير وايضا انتى لم يكن لك كبير
وعلى فكره بردوا انت تتحملى جزء كبير من المشكله لان اخواتك البنات من نفس الاب ونفس الام بسلبيات الاب و... ومع ذلك حياتهم مستمره
ان شاء الله يرزقك بالزوج الصالح وتجدى فيه الرجوله وتحمل المسئوليه ويعمل بقول رسولنا الكريم .. الرفق بالقوارير

---

طبعا انا معترفة تماما بخطئى فى الاختيار واخطاء أخرى كتير
لكن زوجى السابق هذا لم ينقلب فجأة -هو كان كدا بعد العقد مباشرة
يعنى بانت حقيقته من اول يوم فى كتب الكتاب
وطبعا فكرت كتير فى الطلاق قبل الزفاف
لكن اهلى رفضوا
وبالطبع الحياه كانت مريرة من اول يوم فى الزفاف
انا قلت هو كان مستعد يعمل اى شئ فى الدنيا عشان يرضينى كأى بنت عادية
وهو كان من وجهة نظره ان ارضائى يكون بالهدايا والفلوس الكتير والالماظ والدهب

لكن طبعا منكم العقلاء يفهم ان البنت السوية الى عايزة تبنى بيت لا يكون ارضائها بالمال
والهدايا.....................والماد� �ات عموما .........اليس كذلك؟
اختى الكبيرة مهاجرة برة من زمان ولما بتيجى بتيجى كل كام سنة وتقريبا منعرفش عنها حاجة
اتصالتها بينا نادرة جدا ..............الله اعلم بحالها مع جوزها.......لانه كان اختيارها
واخواتى التانيين ..........عندهم مشاكل فى حياتهم ......وربنا يستر عليهم

لكن طبعا دا مينعش ان عندى اخطاء كتير وتقصير .........مفيش حد معصوم من الاخطاء

لاحول ولاقوه الابالله
حاولى تقربى من ربنا وان شاء الله امورك تتعدل وتتحسن وربنا يرزقك بالزوج الصالح

انا قرأت الموضوع كله لكن اول حاجة مش معنى ان تجربتك في الحياه فيها المأساه دي ان كل الرجالة في مصر بنفس الطريقة

ثانيا انتي جاني ومجني عليها في نفس الوقت يعني واضح انك انتي اللي بتسيبي نفسك تتحاوط بالمشاكل وبعدين تفكري تحليها او تواجهيها متأخر ( يعني الحمدلله عندك نفس مؤمنة مكنش المفروض تستسلمي للامر الواقع اللي وصلك لمعظم المشاكل اللي ذكرتيها مادام عندك الاستعداد انك تواجهيها من الاول )

ده غير انك بتعلقي خطأك في اختيار زوجك على والدك !! طب كان فيه رأيك وفكرتك اللي خدتيها عنه يعني حتى لو زوجك ده خدعكوا يبقي مش والدك بس الغلطان لانك انتي كمان اتخدعتي

مستغرب بردو من انك دايما شايفة الناس كلها بتبصلك بصات مش كويسة وطمعانين فيكي .. أكيد في ناس كتير في مجتمعنا دلوقتي بيعملوا كده لكن مش بالدرجة اللي انتي متصوراها دي ده غير انك واخدة بالك من الموضوع بطريقة مأثرة على نفسيتك ووصلتك للضعف فعلا زي ما وصفتي والدتك ( يعني اللي هيحسس نفسه ان هو ضعيف او ميقدرش يعيش لوحده هيبقى كده فعلا )

اما زوجك انتي بتقولي انه كان عنده استعداد يعمل اي حاجة عشان يرضيكي وقولتي انه تحول وبقا يضربك ويهينك
طب ايه اللي حصل عشان يحصل التحول ده !!
سامحيني كلنا بشر وبنغلط يعني زوجك او والدك او والدتك غلطوا لكن انتي بردو غلطتي بس معرفش ليه مش حابة تقولي تصرفاتك تجاه الاخرين وليكن زوجك اللي خلته يتحول في طريقة التعامل معاكي

النظرة فى المجتمع للسيدة المطلقة مش زى زمان, الطلاق بقى شىء واقع وعادى فى المجتمع فى ظل نسبة الطلاق فى المجتمع المصرى . بمعنى أن حضرتك ماتركزيش مع النقطة ديه تماما... ألألاف من حالات الطلاق فى مجتمعنا يوميا و أصبح شىء عادى و الناس بتنفصل و بتبص لقدام و بتقفل الصفحة القديمةو بتبدأ حياتها من جديد . فليذهب كلام بعض الناس للجحيم و أهم حاجة أن ألأنسان ينأى بنفسه من حياه زوجية كريهة مع حد لا ضمير ولا دين له. هو أبغض الحلال عند الله بس برضه "أبغض الحلال" ده بيكون انقاذ للأنسان و كرامتة و أدميتة .

هقولك كلمتين مش هزود عنهم

انت مؤمنة بالله .. وحالتك دي إبتلاء من ربنا و مش هقدر اقولك غير انك تصبري علشان أكيد ربنا كاتبلك الفرحة والبهجة في حياتك اللي تغطي على كل دة

ثانيا اللي بيعيش حالتك دي سواء بنت او ولد بيطلع شخص قوي و بيعرف يجيب حقه من الناس .. لأن التجارب دي كلها بتجيب نتائج

ثالثا .. لو انتي مطلقة عادي أنا اعرف ناس اتجوزوا مطلقات عادي .. لو حاد جالك يتقدملك ارفعي راسك السما و حسسيه انه بناقصه علشان تعرفيه انك لكي قيمة

بالنسبة لموضوع الجوازة الفاشلة فدة للأسف بسبب الوالد لأن الوالد المفروض يسأل على الشاب المتقدم لبنته و يعرف عنه كل حاجة مش مجرد انه كان قاعد مكسوف في المقابلة

و إن شاء المولى هيفرجها عليكي و هيبقى عندك راجل تعتمدي عليه و هيكون عندك أطفال حلوين .. بس ابقي قوليلنا سمتيهم ايه ان شاء الله :)

ماذا تفعل اليتيمة إذن؟
أدعوا الله إن كنت صادقة ان يعوضك خيرا
بس مش عارف ليه مش مصدقك

صديقتنا المواطنة
أنا قرأت الموضوع بأكمله رغم أنه طويل ولكن إن صدقت معاناتك فأعانك الله عليها فأنا وغيري تعبنا من قرائتها فما بالك وأنت تعبشيها كل دقيقة وكل لحظة من حياتك
ولكن
ماهو المطلوب بعد عرض مشكلتك هل تبتغين منا النصح واﻹرشاد ولا عايزة بس نصبرك ونشجعك ونطيب خاطرك بكلمتين ونطبطب عليكي ولا عايزانه نقول إنتي صح وباباكي ظلمك وأمك تقريبا ملهاش وجود من بعد نص القصة ولكن بما إني في المنتدى أحب أن أجيب خلاصة الخلاصة فموضوعكي كبير ومعقدر وأنا على إستعداد أنا ورفيقي في اﻹسلام الشيخ خالد وهي إمام مسجد معروف وعضو معنا في المنتدى لا مانع عندي وعنده من الحضور لبيتكم كذا مرة ولقاء الوالد والوالدة ولقائكم لمحاولة تقريب وجهات النظر ولا مانع كل من يتقدم لكب نسأل عنه ونعرف أصله وفصله هذا ما نقدر عليه بتوفيق من الله تعالى أما عرض شكواكي في أماكن عامة فلن تنفعكي بشيء حتى لو لم يعرفكي أحد وكلنا أنا وزملائي اﻷفاضل في المنتدى إخوتك إن عزتي شيئا أو خدمة تستقيم بها حياتك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

اللهم فك كربها ووسع رزقها وارزقها رزقا حلال طيبا وبارك لها فى عمرها وعملها وارزقها الرضا والإخلاص اللهم إنى اسألك لها الهدى والتقى والعفاف والغنى اللهم غير الحال إلى احسن حال اللهم وفقها إلى ما تحب وترضى

نصيحة أخوية

لا تعرضى مشاكلك على الملاء فيستغلها ضعاف النفوس بشكل أو بأخر وتضيفى فصل من المأساة الى فصول حياتك

كان الله فى عونك ورزقك الخير

اللهم فك كربها ويسر امرها واصلح احوالنا واحولها يا محول الامور حول حالها الي احسن حال \يا من تقول للشئ كن فيكون
يا ارحم الراحمين يا رب العالمين

السلام عليكم ورحمة الله وبركاتة...الى الاخت الفاضلة كاتبة الرسالة لن اتطرق فى رسالتك المعروضة الى كلاماتك المواساه والشفقة لانى لا ارى بد من المواساه والتطييب فى مشاكل ج\رية فى حياتنا تقلب مسارنا راسنا على عقب وتجعلنا ربما غير راضيين بالمواساه فما نحتاجه فى هذا الوقت هو حلول جذرية صارمة نهائية كانت او مؤقتة ...فى البداية عاوز اقوللك ان كل بيوت الدنيا فيها مشاكل ضاهرة منها والبعض مخفى لا يعلم عن الاخرون شيئا ولا يعلم بمضى ضيق صاحبه الا الله عزوجل ....لو قسمنا مشكلتلك هنلاقيها تنقسم لكذا حاجة منها المعقد ومنها البسيط فى وجهه نظرى المتواضعة فى البداية موضوع لبسك هما تقبلوه واصبح امر واقع ولله الحمد .....موضوع والدك وشخصيته فى البيت فشايف ان الموضوع ده هو عصب المشكلة وانا شايف ان ده مش هيتغير ومش بقوللك كده عشان احبطك بس نن شاي على شئ شاب عليه وبعدين الموضوع ده مش هيكون عقبة فى جوازك لكل الناس لان فى ناس بتتقهم المواضيع دى ومن مفهومى اصلن ان حتى الراجل حتى لو حماته مسيطره على حماه ومراته عاوز تبقى زى والدتها هو مش هيسمح بكدة...بمعنى ان معنى الرجولة المكتملة لما تتوفر فى عريسك القادم ان شاء الله المفروض ميلتفتش للحاجات دى لان الراجل لن يقبل اصلن ان تكون زوجته هى المسيطرة على البيت حتى لو كانت مامتها كدة فالخلاصة فى الموضوع ده ان الراجل الى بتقدمللك هو بيبقى المتحكم والله حتى لو حماته دى منين...هل معقول ارفض بنت لكون والدتها مسيطرة على البيت وهى سواء زى والدتها او لا يبقى ارفضها؟!! فى حالات كتير كدة يامى الاب بيبقى طيب ياما سلبى ...الموضوع موضوع هل الراجل الى هيتقدمللك راجل فعلن وواثق فى نفسه ولا لا ...لو واثق فى نفسه يبقى هيسيطر عليكى وعلى بيته حتى لو انتى نسخة من مامتك...حاسس فى كلامك انك انسانه محترمة ونصيحة اشغلى نفسك فى البيت باى حاجة وحاولى متسميعش وتتجنبى اى موقف مامتك بتزعق فيه لبابكى عشان اعصابك متتعبش وبردو متنفصليش عن العالم الخراجى وراجعى بذاكراتك لايام الطفولة والمدرسة اكيد هتلاقى انسانة محترمة ليها نفس دماغك وتتتاقلمى معاها او جارة ليكى ونصيحة متعرفيش حد من صحابك مشكلتك الا لما تبقى ميقنة تماما انا صديقة مخلصة وهتحفظ سرك وبالنسبة لموضوع الزواج فده رزق زيه زى الشغل والانجاب والصحة فمتتعجليش وان شاء الله ربنا يرزقك بحد يقدرك ...وربنا يهدينا جميعا وفى الاخر احل اقوللك كلمة بسيطة ...صافح وسامح واتق الله واصبر فانا وانت وهو وجميعنا راحلون ....ربنا يحفظك ويبارك فيكى والسلام ختام

مش عارف ابدا من فين

لا تتععجب عندما تلقى نظره على شريط ذكرياتك وحياتك فى الماضى من تضحيات وعثرات وطموحات وامال وكابه الحزن ودموع الفرح فتجد انه ما كاد ان ينتهى فى ثوانى معدوده وكان السنون قد اصبحت ساعات والشهور قد اصبحت ثوانى واوراق شجره عمرك تتساقط امام عينيك الضعيفه التى غمرتها المسئوليات وطاحونه الحياه لتجد نفسك فى النهايه قد اضعت عمرك باحثا عن السراب والادهى من ذللك انه حتى السراب يعرف طريقه واهدافه وجلس اليك ضاحكا ساخرا بعدما حطم اماللك على صخره الانانيه وعدم الكتراث ولم يلقى بالا بك حاضر او مستقبلا وترك وحيدا فى غمرات الحياه ولكن لاتتعجب كثيرا فقط تقضى عمرك فى التعجب بينما يمضى السراب فى طريقه...من خواطرى....الخلاصة العمر بيجرى ومتبصيش وراكى فى حاجات كتير فى حياتنا ممكن نعملها ننسى بيها همومنا (نقرب من ربنا اكتر نلعب رياضة نشترك فى نشاط اجتماعى نقرى كتب اكتر نساعد ناس محتاجه مساعدتنا) .....ربنا مبينساش حد ....لازم تلاقى لنفسك هواية ولو لقيتى شغل محترم يبقى افضللك ووقتك الفاضى قضيه فى العمل التطوعى ساعتها مش هتلاقى وقت تفكرى فى مشاكللك وهتلاقى ابواب الخير ربنا بيفتحاللك....وليقضى الله امرا كان مفعولا...متسبيش نفسك للحزن وتفائلى وان شاء الله خير

اقتباس:

---

المشاركة الأصلية كتبت بواسطة saddam

صديقتنا المواطنة
أنا قرأت الموضوع بأكمله رغم أنه طويل ولكن إن صدقت معاناتك فأعانك الله عليها فأنا وغيري تعبنا من قرائتها فما بالك وأنت تعبشيها كل دقيقة وكل لحظة من حياتك
ولكن
ماهو المطلوب بعد عرض مشكلتك هل تبتغين منا النصح واﻹرشاد ولا عايزة بس نصبرك ونشجعك ونطيب خاطرك بكلمتين ونطبطب عليكي ولا عايزانه نقول إنتي صح وباباكي ظلمك وأمك تقريبا ملهاش وجود من بعد نص القصة ولكن بما إني في المنتدى أحب أن أجيب خلاصة الخلاصة فموضوعكي كبير ومعقدر وأنا على إستعداد أنا ورفيقي في اﻹسلام الشيخ خالد وهي إمام مسجد معروف وعضو معنا في المنتدى لا مانع عندي وعنده من الحضور لبيتكم كذا مرة ولقاء الوالد والوالدة ولقائكم لمحاولة تقريب وجهات النظر ولا مانع كل من يتقدم لكب نسأل عنه ونعرف أصله وفصله هذا ما نقدر عليه بتوفيق من الله تعالى أما عرض شكواكي في أماكن عامة فلن تنفعكي بشيء حتى لو لم يعرفكي أحد وكلنا أنا وزملائي اﻷفاضل في المنتدى إخوتك إن عزتي شيئا أو خدمة تستقيم بها حياتك
وهذا ما لزم بيانه ودمتم
وبالتوفيق وإلى اﻷمام ومن نصر إلى نصر
ودمتم للنضال

---

كلام تمام

اقتباس:

---

المشاركة الأصلية كتبت بواسطة محمد عز

نصيحة أخوية

لا تعرضى مشاكلك على الملاء فيستغلها ضعاف النفوس بشكل أو بأخر وتضيفى فصل من المأساة الى فصول حياتك

كان الله فى عونك ورزقك الخير

---

جزاك الله خيراً على النصيحه لانى كنت عاوز ارد عليها نفس الرد ده
والاستاذ صدام برضه رد عليها وقالها الغرض من عرض مشكلتك ايه ان احنا نواسيكى ولا نقولك ان والدك غلطان ولا ايه

اشد بلاء الانبياء ثم الامثل فالامثل ويبتلا الناس على قدر دينهم

شكرا على كل أخ رد بالدعوات الصالحات ........وانار لى بصيص من الامل ان بلدنا لسة بخير
وشكرا بردو على كل واحد دخل والقى بكلمات جارجة وشكوك وظنون
وكأنى جاية اشحت او اعرض نفسى للبيع ...........حسبنا الله ونعم الوكيل
اما الى ظن بى سوءا وانى داخلة عشان اخد شفقة منكم او تعطفوا على كأنى شحاتة

والى بيستفسر انا ليه كاتبة الموضوع على الملأ .....رغم ان محدش يعرفنى هنا
اكيد حضرتك مقرتش السطور كلها ..........لأن لو كنت قريت السطور كنت هتعرف انى سألت اسألة
وفى علامات استفهام..............وكنت منتظرة اعرف أجوبة للأسئلة بتاعتى ......فى منكم جزاه الله خيرا وجاوب
على بعضها
وفى الى مجوبش .........لأنه وجد الموضوع لا يستحق القراءة......او جايز اسباب تانية لا داعى لذكرها
=========================================
عامة من بعض الردود ...........استنتجت ان حال البلد لسة بخير وان فى امل ان مصر ينصلح حالها
وردود اخرى ...................أدركت منها .......ليه بنات مصر بتتسجن وتتسحل وتتبهدل ........زى اختنا جهاد الخياط
الى اتبهدلت فى السجن بلا ذنب ...........و محدش قدر يعملها حاجة ...........كل الرجال وقفوا يدعوا لها
بس محدش قدر يحرك ساكن .................................................
===============
بالنسبة للناس الى عرضت على حلول عشان يوصلوا لبيتنا وييتناقشوا مع بابايا
دا مش حل منطقى ابدا
انى ادخل افضح نفسى على الملا
ولو كان فى حد قدر يعمل كدا..................كان عملها شيخ المسجد بتاعنا
وطبعا جزاهم الله خيرا على رغبتهم فى المساعدة
=============================
بالنسبة للناس الى نصحتنى بانى ممكن اقع فى الفخ
الموضوع بتاعى دا بقالو اكتر من تلات سنين
يعنى كان ادامى اكثر من فخ
بس انا مش هوائية اوى كدا ولا سازجة للدرجة دى
وطبعا شكرا ليكم على النصيحة ...........انا مش زعلانة .............بالعكس طبعا
انا كتبت الموضوع اصلا عشان اسمع صوت نصيحة ........من العقلاء
وعشان تتطمنوا كلكم
انا هلغى العضوية بعد ما اكون قريت اجابات واضحة للاسئلة بتاعتى
وبعد ما اكون وصلت رسالتى لاباء وشباب الجيل الجديد............يمكن يحسوا ويتعظوا

اقتباس:

---

المشاركة الأصلية كتبت بواسطة wounded woman

شكرا على كل أخ رد بالدعوات الصالحات ........وانار لى بصيص من الامل ان بلدنا لسة بخير
وشكرا بردو على كل واحد دخل والقى بكلمات جارجة وشكوك وظنون
وكأنى جاية اشحت او اعرض نفسى للبيع ...........حسبنا الله ونعم الوكيل
اما الى ظن بى سوءا وانى داخلة عشان اخد شفقة منكم او تعطفوا على كأنى شحاتة

والى بيستفسر انا ليه كاتبة الموضوع على الملأ .....رغم ان محدش يعرفنى هنا
اكيد حضرتك مقرتش السطور كلها ..........لأن لو كنت قريت السطور كنت هتعرف انى سألت اسألة
وفى علامات استفهام..............وكنت منتظرة اعرف أجوبة للأسئلة بتاعتى ......فى منكم جزاه الله خيرا وجاوب
على بعضها
وفى الى مجوبش .........لأنه وجد الموضوع لا يستحق القراءة......او جايز اسباب تانية لا داعى لذكرها
=========================================
عامة من بعض الردود ...........استنتجت ان حال البلد لسة بخير وان فى امل ان مصر ينصلح حالها
وردود اخرى ...................أدركت منها .......ليه بنات مصر بتتسجن وتتسحل وتتبهدل ........زى اختنا جهاد الخياط
الى اتبهدلت فى السجن بلا ذنب ...........و محدش قدر يعملها حاجة ...........كل الرجال وقفوا يدعوا لها
بس محدش قدر يحرك ساكن .................................................
===============
بالنسبة للناس الى عرضت على حلول عشان يوصلوا لبيتنا وييتناقشوا مع بابايا
دا مش حل منطقى ابدا
انى ادخل افضح نفسى على الملا
ولو كان فى حد قدر يعمل كدا..................كان عملها شيخ المسجد بتاعنا
وطبعا جزاهم الله خيرا على رغبتهم فى المساعدة
=============================
بالنسبة للناس الى نصحتنى بانى ممكن اقع فى الفخ
الموضوع بتاعى دا بقالو اكتر من تلات سنين
يعنى كان ادامى اكثر من فخ
بس انا مش هوائية اوى كدا ولا سازجة للدرجة دى
وطبعا شكرا ليكم على النصيحة ...........انا مش زعلانة .............بالعكس طبعا
انا كتبت الموضوع اصلا عشان اسمع صوت نصيحة ........من العقلاء
وعشان تتطمنوا كلكم
انا هلغى العضوية بعد ما اكون قريت اجابات واضحة للاسئلة بتاعتى
وبعد ما اكون وصلت رسالتى لاباء وشباب الجيل الجديد............يمكن يحسوا ويتعظوا

---

بصى حضرتك الموضوع مش محتاج كل العصبية دى و لا شيل الهم ده كله
1-ببساطة حتى لو بابا غلطان و مع احترامى كان ضعيف الشخصية و اختارلك حد غلط كان لازم تقفى وقفة جامدة لان ده مستقبلك و انتى اللى هتشربيه مش حد تانى
2-صدقينى مش مهم راى اى حد فى موضوعك بقدر ما هو مهم ثقتك بنفسك و بان ربنا سبحانه و تعالى لو صبرتى و اخترتى صح المرة اللى جاية اكيد اكيد ربنا هيكرمك و يعوضك
3-سيبك من الكلام عن الماضى او بابا كذا او انك اتجوزتى حد و طلع مش كويس او ان الناس المفروض تتعلم من التجربة بتاعتك و تخللى بالها لان كل ده مالوش قيمة قيمة دلوقتى قدام انك تتخلصى من الحزن ده و الاحباط و ربنا يكرمك باذن الله بالانسان الصح
و اخيرا هاقولك عن كذا تجربة نصحت بيها اصدقاء و جابت نتيجة كويسة و الله انا نفسى ماكنتش متوقعها لو تحبى طبعا تاخدى بيها اهلا وسهلا و لو لا براحتك
علشان كنت بادور لواحد صاحبى مرة على عروسة و كان لما تعجبه بنت معينة كنت باروح معاه نشوف نزور البنت و اهلها و نشوف يعنى بس الحقيقة ماكنش بتبقى البنات مناسبة لاسباب كتير و مش لازم انهم كانوا بنات مش كويسة لا و الله مظمهم كانوا كويسين بس مش مناسبين
المهم كنت قاعد انا و هو مرة على النت و لقينا موقع مجلة الشباب على النت و هى مجلة قديمة و معروفة لمعظمنا و اللى ماسكينها ناس محترمة الصراحة فلقيناهم عاملين باب لموضوع الزواج ده و موقعه الاتى
http://shabab.ahram.org.eg/Category/...F%D9%87/0.aspx
و هتلاقى عاملين باب لكل شهر من ساعة ما بدا الباب ده على الانترنت و فى صفحة كل شهر يقدر الواحد يدخل و و يكتب هو اللى هو عاوزه فى خانة الردود اسفل صفحة كل شهر و كنت باقوله اكتب بياناتك ببساطة و اكتب انت عاوز ايه بالظبط و يكتب ايميله او موبايله او الاتنين و بالرغم من ان الناس التانية كانت كاتبة بنفس الطريقة يعنى تليفونها و موبايلها الا انى قلتله ما تتصلش بحد خللى اللى عاوز هو اللى يتكلم احسن ما نجرى ورا حد
و قعدنا فى الموضوع ده حوالى 6 شهور و الناس تتكلم من كل المحفظات و بكل الاصناف و الانواع و لقينا كنوز مدفونة و ربؤنا بلدنا فيها ناس ممتازة ممتازة بس عاوزة صبر فى البحث و لقينا عروسة له فل الفل الفل و ربنا شاهد على كلامى و جربتها بعد كده مع واحد زميلى تانى و مشى الموضوع فاللى عاوز حاجة لا يبكى انه مش لاقيها بس يشغل مخه و يتعب و يدور كويس بحرص و اكيد هيلاقى مع الصبر و الثقة بالله

-----------------------

عدم التزامك بالاداب العامة يعرضك لعقوبة الايقاف انتبه فى اختيار الالفاظ اثناء التعبير عن وجه نظرك

مشرف 6 ب
7.17pm
14/1/2014

من وجهه نظرى الصغيره ارى الحل خطوات مع بعضها البعض وليس خطوه واحده كما يلى

1- البحث عن عمل سواء كان عمل بمقابل او عمل اجتماعى خيرى لان العمل يقلل من احساس الشخص بضغوط الحياه ومن خلاله ستزيد فرص تقابلك مع شخص امين يمكن ان يكون رفيقك

2- التزام الندوات او مجالس العلم اذا امكن فى المساجد القريبه منك وفعلا من جاور السعيد يسعد ( مقوله مجربه وحقيقيه ) فمن خلال اصدقاءء المسجد اكيد اكيد حتلاقى واحده او اتنين ينفعوا يكون اصحابك البنات ومشكله الوحده تتلاشى بس الحذر الحذر فى التسرع فى اعطاء الثقه المطلقه لاى واحده على الاقل لازم 3 شهور معامله لحين اعطاء بدايه ثقه

3- الدعااااااااااااااااااااا ااء وده مخ العباده وما رد قضاء الله الا الدعاء

واخيرا وليس اخرا نسال الله تعالى ان يزيح عنك همك وان يستبدل همك بفرح ان شاء الله

اقتباس:

---

المشاركة الأصلية كتبت بواسطة banzai

----------------

---

بعد اذن حضرتك اتكلم عن نفسك واقاربك وجيرانك ودائرة معارفك فقط ولا تعمم من فضلك.

تحياتي.

سلام الله عليكم ورحمته وبركاته

أختي الكريمة:ـ
بكل تأكيد قد عانيتِ كثيراً وربنا إن شاء الله يثيبك عظيم الثواب ويعوض صبرك خير
ولكن لي معكِ هنا بعض الملاحظات أتمنى أن تتقبلينها بصدر رحب مني:ـ
× ماذا يضير الشاة سلخها بعد ذبحها؟؟؟
والدك الآن أصبح رجل مسن ولا يحتاج إلا الدعاء فقط والرعاية مثل والدتك
ربما لم يكن ذلك تخاذلا منه وإنما شخصيته هكذا ولم يستطع تحمل مسؤلية شيء
فحاولي أن تأقلمي حياتك على ذلك وأن تتحملي مسوليتك كأنك بالظبط قد سافرتِ في أي بلد غريبة
× هل تعتقدي إن جلوسك بالبيت هو الحل وهو الستر؟؟
ربما كان الخروج للعمل فيه الحل لكثير من مشاكلك :ـ
1ـ إنك تشوفي الناس والناس تشوفك ده هيديكِ فرصة للإرتباط بزوج صالح إن شاء الله سواء من عمل أو عن طريق زميلة شغل او صديقة ولكن مع إلتزامك بالتدين والحشمة والحمد لله أنتِ تقولين بأنك هكذا.
2ـ وجود ناس أخرى بحياتك هيجددها وهيرفع من معنوياتك وهيخليكي تكتسبي
خبرات أكبر وتشوفي تجارب اكتر.
3ـ موضوع الشغل هيخلي عندك ثقة بنفسك أكتر وبالتالي قوة تجعلك تواجهي أي ظروف وأي إنسان
× ليه مش بتفكري بشكل إيجابي وعايزة تحبسي نفسك جوة معاناتك؟
يعني لو البكا على اللي فات هيرجع حاجة أكيد كنا كلنا عملنا كدة لكن إياكِ واليأس
أو أن تظلي طول الوقت سجينة شكواكِ ولكن دوماً اجهري بها فقط لله فهو صاحب المنة والفضل والقادر على تفريج همك وإرشادك لمافيه خيرك وصلاحك
× ممكن تكون الأم كانت شخصيتها قوية او .....إلخ (شفاها ربي وعافاها )
لكن حاولي إنتِ تصلحي الصورة دي في بيتك لما تتجوزي بمشيئة الرحمن
تكوني لينة الجانب ومتفاهمة ومتسامحة مع إحتفاظك بشخصيتك ودون المساس بكرامتك
× بلاش نبرة الحزن واليأس ده لأن ربنا سبحانه وتعالى موجود ولازم ثقتك تكون كبيرة فيه وإن أخرة الصبر خير إن شاء الله
× ليه عايزة تقفلي عضويتك؟ بالعكس حاولي تدخلي وتشاركي وتعرفي الناس هنا فكلهم
والحمد لله أخوة وأخوات أفاضل ودي حقيقة وده كمان هيخرجك من عزلتك
وكلمة أخيرة مهمة جداً
لو خليت لخربت يا حبيبتي يعني الرجالة بخير وكل حاجة لكن يمكن حظك ما أنصفك
إنك تشوفي غير دول لكن إن شاء الله ربك كريم
× ربنا يهديكي لكل خير ويرزقك الزوج الصالح اللي يعوضك عن اللي شوفتيه
ويزيح كل همومك ويبدلك عنها كل فرح وسعادة
اللهم آمين

اقتباس:

---

المشاركة الأصلية كتبت بواسطة elfarashah

سلام الله عليكم ورحمته وبركاته

أختي الكريمة:ـ
بكل تأكيد قد عانيتِ كثيراً وربنا إن شاء الله يثيبك عظيم الثواب ويعوض صبرك خير
ولكن لي معكِ هنا بعض الملاحظات أتمنى أن تتقبلينها بصدر رحب مني:ـ
× ماذا يضير الشاة سلخها بعد ذبحها؟؟؟
والدك الآن أصبح رجل مسن ولا يحتاج إلا الدعاء فقط والرعاية مثل والدتك
ربما لم يكن ذلك تخاذلا منه وإنما شخصيته هكذا ولم يستطع تحمل مسؤلية شيء
فحاولي أن تأقلمي حياتك على ذلك وأن تتحملي مسوليتك كأنك بالظبط قد سافرتِ في أي بلد غريبة
× هل تعتقدي إن جلوسك بالبيت هو الحل وهو الستر؟؟
ربما كان الخروج للعمل فيه الحل لكثير من مشاكلك :ـ
1ـ إنك تشوفي الناس والناس تشوفك ده هيديكِ فرصة للإرتباط بزوج صالح إن شاء الله سواء من عمل أو عن طريق زميلة شغل او صديقة ولكن مع إلتزامك بالتدين والحشمة والحمد لله أنتِ تقولين بأنك هكذا.
2ـ وجود ناس أخرى بحياتك هيجددها وهيرفع من معنوياتك وهيخليكي تكتسبي
خبرات أكبر وتشوفي تجارب اكتر.
3ـ موضوع الشغل هيخلي عندك ثقة بنفسك أكتر وبالتالي قوة تجعلك تواجهي أي ظروف وأي إنسان
× ليه مش بتفكري بشكل إيجابي وعايزة تحبسي نفسك جوة معاناتك؟
يعني لو البكا على اللي فات هيرجع حاجة أكيد كنا كلنا عملنا كدة لكن إياكِ واليأس
أو أن تظلي طول الوقت سجينة شكواكِ ولكن دوماً اجهري بها فقط لله فهو صاحب المنة والفضل والقادر على تفريج همك وإرشادك لمافيه خيرك وصلاحك
× ممكن تكون الأم كانت شخصيتها قوية او .....إلخ (شفاها ربي وعافاها )
لكن حاولي إنتِ تصلحي الصورة دي في بيتك لما تتجوزي بمشيئة الرحمن
تكوني لينة الجانب ومتفاهمة ومتسامحة مع إحتفاظك بشخصيتك ودون المساس بكرامتك
× بلاش نبرة الحزن واليأس ده لأن ربنا سبحانه وتعالى موجود ولازم ثقتك تكون كبيرة فيه وإن أخرة الصبر خير إن شاء الله
× ليه عايزة تقفلي عضويتك؟ بالعكس حاولي تدخلي وتشاركي وتعرفي الناس هنا فكلهم
والحمد لله أخوة وأخوات أفاضل ودي حقيقة وده كمان هيخرجك من عزلتك
وكلمة أخيرة مهمة جداً
لو خليت لخربت يا حبيبتي يعني الرجالة بخير وكل حاجة لكن يمكن حظك ما أنصفك
إنك تشوفي غير دول لكن إن شاء الله ربك كريم
× ربنا يهديكي لكل خير ويرزقك الزوج الصالح اللي يعوضك عن اللي شوفتيه
ويزيح كل همومك ويبدلك عنها كل فرح وسعادة
اللهم آمين

---

جزاك الله خيرا على هذه الكلمات المشجعة......بثت فى الأمل
افعل بامر الله بنصائحك........نصائح اخت وفية محبة
شكرا لك واتمنى لك الخير والسعادة
بالنسبة لانى الغى العضوية
لازم الغيها عشان محس بالحرج وسطكم وانتم عرفتوا قصتى

مش عارف أبدء منين الصراحة .. قريت كل إللي قولتيه حضرتك .. كان الله في عونك وربنا يفك كربك وييسر أمورك
يعني ممكن تتقبلي مني النصيحة مني كأخ أكبر من حضرتك أو أصغر .. كل إللي فهمته من كلام حضرتك إنك تدرجتي في طريقة اللبس من اول مش محجبة لحد ماشاء الله ربنا كرمك بـ اللبس المحترم ده كان جزء من المشكلة والحمد لله إنتي حليتيها بنفسك وموضوع والدك ووالدتك يعني الصراحة ربنا يعينك وبدعيلك ربنا يكرمك بالزوج الصالح .. يعني أنا بصراحة من الناس إللي مبتحبش موضوع إن البنت عمومآ تنزل للشغل بسبب موضوع الإختلاط ده لأن مشاكله كتير بس في حالتك يعني ممكن لو نزلتي شغل محترم هتكتسبي خبرات أكبر في التعامل مع الناس وممكن ربنا يرزقك بإبن الحلال إللي يصونك وتحاولي تتعلمي من الإبتلاء ده إن أكيد ربنا هيكرمك علي صبرك بكل الخير وحاولي تتعلمي في بيتك إن شاء الله من الغلطات إللي كانت مع والدتك ووالدك
وممكن تحضري دروس دينية في مساجد قريبة من بيتك بردو وإقرأي قراءن دايمآ وِرد يومي
أسأل الله أن يزيح كل همومك ويرزقك الخير والسعادة

خير ان شاء الله بصي أنتي محتاجة تفضفضي فخشي أي وقت أحنا كلنا هنا أهلك وأخواتك فضفضي معانا وخبطي بس بالراحة يعني احنا روحنا رياضية وبنتقبل النقض وهنعتبرها من أنواع المزاح لأن طبعاً في رجالة محترمين مش علشان واحد أو أكتر سيئين يبقى كله كدة ومفيش فضائح ولا حاجة موقفك مفيهوش حاجة تعيبك .

جزاكم الله خيرا على النصائح المفيدة
ان شاء الله احاول انفذها
بس محدش جاوب على الاسئلة ليه؟
غريبة!!
وبعدين فى ناس طلبت منى اكمل كلامى وشكوتى .......بدون ما اخبط فى حد
يبقى انتو الى عايزين طبطبة ...............مش انا ...........ولا إيه ؟؟

اقتباس:

---

المشاركة الأصلية كتبت بواسطة wounded woman

جزاكم الله خيرا على النصائح المفيدة
ان شاء الله احاول انفذها
بس محدش جاوب على الاسئلة ليه؟
غريبة!!
وبعدين فى ناس طلبت منى اكمل كلامى وشكوتى .......بدون ما اخبط فى حد
يبقى انتو الى عايزين طبطبة ...............مش انا ...........ولا إيه ؟؟

---

ممكن تقولى الاسئله فى صورة نقاط واحنا نجاوب

دى الاسئلة الى سألتها فى اول مشاركة

اقتباس:

---

المشاركة الأصلية كتبت بواسطة wounded woman

انا مكنش لى اى طلبات فى شريك حياتى
سوى انه يكون واحد بيخاف ربنا ويحبنى ويراعى ربنا فى .......كنت مستعدة اقبل انسان بسيط
جدا ومتواضع فى مادياته ...........ونبدأ من الصفر سوى
ليه المجتمع الزم المرأة انها تشارك فى اساس البيت؟
ليه اى اتنين ماديتهم بسيطة ميبدأوش بحاجات بسيطة وبعد كدا
ربنا هيوسع عليهم؟
-----------------------------------------------
سبت الشغل لأنى زهقت من الاختلاط والارف
واقتنعت تماما ان الاختلاط دا اخرته سودة
وان البنت بيتكسر قلبها ..............وبتتبهدل اخر بهدلة
..........................................
دى رسالة لكل اب ارجوكم ارجوكم ارحموا بناتكم واستروهم وخبوهم
ليه تبهدلوا البنت الى ربنا عززها فى القرآن؟
---------------------------
ازاى كل شاب بيتمنى يرتبط ببنت رقيقة ورومانسية
وفى نفس الوقت عايزها تصرف عليه وتساعده فى المعيشة وكمان عليها كل مسؤوليات البيت؟؟
هو دا عدل يا شباب مصر ولا ايه؟؟

[/size][/b]
[/center]

---